[上海國際馬拉松後記] 我與波士頓的距離是四分五十五秒

Everything happened for a Reason!

每個跑馬拉松嘅人都有佢跑馬嘅原因，有人為咗挑戰自己，有人為咗要完成一件事，有人為咗贏一次輸賭，有人為咗心理治癒，我聽過最正嘅係有朋友因為佢女朋友話如果佢完成到一個馬拉松就嫁俾佢，佢完成返嚟之後佢女朋友話佢知佢去練馬拉松嗰段時間撘上咗佢個好兄弟，而我朋友無咗個女朋友但因為咁無啦啦愛上跑步，多咗好多朋友，同埋識咗個正過佢前女朋友好多嘅新女朋友再變成佢老婆!

本人開始跑馬拉松嘅原因更簡單……係因為被騙!

2012 年本來一班好友十來人柴娃娃報名 日本大阪馬拉松，但其中幾位想起他少鍛鍊實在是危險，報了名便算! 又有別個勇敢的成員，為了要共愛侶一起更甜，靜悄靜悄便決定轉身竄! 又有為了朋友的勸勉，跑下跑下會猝死會腿粗，罷了罷了便歸家往後轉! 結果真正最後踏上征途的只有四人，而我們在未跑超過10 公里，更未跑過半馬之後第一次落場就完成了全馬，我完賽時間係5小時43分鐘! 跑完後我雙腿累得叫苦連天，但那一份喜悅是未完成過不可能任務嘅人不可能明白的! 之後第二日我要揸拐杖先行到路，但莫名其妙地這個被騙的故事令我跟這運動結下不解之緣，然後臨老學吹打玩水陸兩項，Triathon，Half IRONMAN，Full IRONMAN，此乃後話!

每一個 Fall in Love with Marathon 嘅人都有個終極目標就係參加六大，世界上最 Top 嘅六個馬拉松賽事，而其中門檻最高嘅係 波士頓馬拉松，男性18至34歲必須要達到完賽3小時05分標準，然後每年馬五年加 5 分鐘咁大把，女仕就由 3 小時 35 分開始! 3:05要跑完一個42.175嘅全馬即係要幾快? 即係每一公里要用4分鐘23秒完成，即係每小時要跑13.70 公里 ………….. 總之 就係好很快係啦! 作為一個跑者，能夠達到標準及參加波士頓馬拉松絕對係本人 Bucket List 之一，而我嘅年齡標準係3:30先可以報名!

上一次京都馬拉松我成功 Sub 4，做出咗3:38嘅PB，對真正高手嚟講當然不值一提，但對於一個四十尾先開始跑步而家年過半百有突嘅阿叔，我覺得對自己已經有交代! 而本來預計在將至嘅上海國際馬拉松 應該好大機會可以達到3:30之內，一路來練習越跑越順亦令我充滿信心可以達標……………但人算永遠不如天算，直至突然發現身負頑疾要入院治療及停止一切運動一段時間，幸好因爲我長期保持高強度運動新陳代謝比一般人好一點，康復時間縮短了很多，但亦平白浪費了很多練習時間，應該有的長課一一付諸東流，體能未回到應有的水平，達標應該好難很難好很難了!

But……….既然報咗名，報名費俾晒，又未跑過上馬，醫生又話我可以回復正常運動，幾大就幾大，梗係照跑!

11月12號凌晨 05:30，上海外灘!

我今次的起跑區被排在E區，前面有專業國際跑手，慈善報名跑手，精英跑手，A 區，B 區，C 區，D 區，兩萬八千跑者應該有大約兩萬五千在我前面，所以我唯有0400起床梳洗趕在0530到達現場，在其他人到達之前佔據 E 區第一排起跑線，捱著外灘的凜冽冷風等待賽事開始!

0700，不知是那一個市領導沉悶的演說後比賽正式開始，但因為E區實在排得太太太太後，足足慢行了七分多八分鐘我才到達真正起跑線，邁開腳步起跑，我前面除了人群還是人群，我選擇咗靠大隊邊緣跑，儘力越過一堆人群一堆人群又一堆人群，出乎意料地一眾本地同胞跑友非常有禮貌，每次我講 “讓一讓 讓一讓 “ 時候，前面嘅人都會躲在一傍，滿嘴的說 “您先走，您先走! “ 甚至會同前面嘅人講 “大家讓開一下，讓快的朋友先走!” ， 不是一個兩個，而是接二連三幾乎每一個跑友都是如此友善反應，與一般香港人印象中的國內同胞可說是大相逕庭，這我只能解釋說喜愛運動的人都是比較有品的，其餘則可能要勞動國際關係或心理學家去分析嘞!

因為要不斷越過人群，不自覺間我嘅 pacing 越來越快，由頭兩公里嘅塞車狀況5:20左右一直加速保持住 4:30左右，急於越過主人群嘅心理同逢人過人嘅快感令我忘記晒賽前嘅部署，要在三小時三十分之內完成，我應該保持 4:58 pacing，太快易爆特別係我長課訓練不足，太慢可能追唔番，去到第24公里我竟然開始覺得倦同無乜力，配速慢慢每公里減慢，5:05 ……. 5:16 ……..5:24 ……… 5:30，不認不認還需認，我知道大勢已去，3:30無希望了! 如果我強行提速，結果可能係未到終點就爆晒不能完賽! 心念至此如釋重負，我馬上把心態調整爲 享受比賽，雙目尋找好看嘅景象好睇嘅美女 (不多但總算有!)，除下耳機雙耳細聽沿途嘅人聲風聲環境聲，放鬆心情雙腳用我最舒服嘅 pacing 前進，保持住呼吸平穩住心跳，有人過我由他去吧，我過到人笑笑感恩，望一望賽道傍邊嘅指示牌，原來不知不覺間已經跑到第 38 公里，我從腰帶後攞出 好朋友高手上次京馬傳授嘅秘密武器，喺最後幾公里分兩三次隊晒佢，力竭筋疲之下終於見到終點所在嘅 萬人體育館，睇睇手上嘅Garmin ，竟然無慢過上次京馬? 喜出望外之下用埋飲奶之力衝過嗰度代表完成賽事嘅拱門，3:34:55! 我完成唔到波馬嘅報名最低要求，但出乎意料地我做咗我另一個 PB ！

“我一直認為馬拉松是個極度浪漫的運動，兩千五百年前，要不是傳令兵斐庛得斯連續跑了一天一夜，向斯巴達王求援，希臘根本不可能戰勝波斯大軍，而最後他再跑回雅典通報勝利力竭而亡；往后數千年，世界上仍有無數的人在跑著馬拉松，甚至是超級馬拉松，這何嘗不是一種極其壯闊而具大時代感的浪漫情懷！” [ 我跑 • 歐陽靖 ]

我非常同意Gin呢段說話，我亦會繼續呢個極度浪漫嘅運動，330波馬標準依然係我下一個目標，我相信……希望…..我好快會達成，畢竟我同呢個目標已經又走近咗一大截!

我與波士頓的距離係四分五十五秒!

P.S. Photo Credit: 網上圖片