九龍東跑者唔易做 | 寫於啟德承豐道跑道公園地盤意外之後

大家有睇新聞應該留意到啟德冧棚架死工人嘅新聞，我見到幅鳥瞰圖嗰陣，一眼就睇到呢個係我剛剛開發嘅新跑步路線，壓到嗰個絕對有機會係我，所以本來想寫篇《由紅磡搬去啟德—仲可以跑去邊》都改咗上面個題目。

一般人唔會留意呢單意外，其實對跑者其實係幾咁危險，亦講出咗喺香港練跑甚至比賽都會經過地盤係一件幾咁痴線嘅事。我十年都唔報一次10km ，幾年前跑科學園，賽事路線都係經地盤，其實香港有無咁多樓要起?

路線1: 啟德地鐵站去啟德郵輪碼頭

首先呢條路線對於我呢個新住客基本上係迷宮，因為google唔到，佢會guide你去未起好嘅啟德體育館，然後你發現無行人路可以去到郵碼碼頭，結果我就去咗土瓜灣 (路線3再講) *其實N年前跟HNR跑過去郵輪碼頭，嗰陣已經覺得要經地盤外圍，夜晚都太烏煙瘴氣，係要去到碼頭嗰邊先好少少

要去郵輪碼頭，必然會去到意外現場，因為正確路線係先由啟德經國際學校去mega box 再穿新醫院地盤路去到兒童醫院，喺條啟德河兜個U字就去到跑道公園，公園環境靠河嗰邊非常好，靠樓其實唔差但就睇到香港個樓市狀況，有樓無人住，仲有大把未起好，U到中間 (意外地點) 轉左就係跑道公園，你跑到盡駁返去空中花園兩邊都係未起好樓，有少少係喺裝修緊嘅屋企食飯嘅感覺，呢度地盤工人保安最多，其次係少量住客，第三多就係跑者。

所以呢單新聞個焦點會係工人安全，但實際上亦係跑者安全，因為跑者真係24小時都可能會跑 (睇電視保錡話會收工半夜跑，睇 youtube 阿修係四點都拍緊跑步)，其實喺地盤旁邊跑真係有事都無人知，而呢條路線絕對唔係例外。最特別係你如果跑空中花園條路，佢一定要走回頭，折返點望落去個位正正係體育館又未直接通得返去啟德嗰邊嘅迴旋處，簡單講大家被迫跑緊一啲未ready 嘅路，亦即係大規模地盤未ready 就開放附近嘅路，講危險其實空中花園仲危險，近河嗰邊係未入伙，但空中花園兩邊係未起好。 (雖然兩邊懸空都算有個空間，但都今次意外就係19樓嘅棚架跌落嚟，可以塌到幾遠無人知)

路線2: 啟德地鐵站去茶果嶺公園

頭段去megabox 係一樣，到過咗啟德消防局，就可以決定係咪跟有圖畫嘅橋躉一路去觀塘海旁，路線唔難認，但九龍灣已經夠多燈，去觀塘更多係站站停，其實跑馬路都少少危險，去觀塘海濱終於有返一公里安樂茶飯，但係去到觀塘碼頭明明可以 guide 條海旁路直去，偏偏要喺巴士站左穿右插，俾你去茶果嶺公園 (剛剛新年有人爆煙花嗰度)，偏偏個條海旁路又封咗，要兜返出去跑馬路邊，你話係咪天才。

路線3: 啟德地鐵站去黃埔

首先要講啟德住宅區兜圈都可以有兩三公里長，偏偏係延伸唔到出去 (情況同路線1一樣)，跟 google 去體育館就會經成一公里地盤路食塵然後先入到土瓜灣，捱多500m你終於去到土瓜灣碼頭，享受個海心公園再兜少少工業區穿商場先駁到去黃埔個尾尾 (都係嗰句，有無人諗過打通個幅牆俾大家直去?) 咁尖沙咀碼頭直去就唔止四公里。) 呢d位就不得不羨慕日本人成日可以圍著條護城河跑步仲要無乜燈位又夠長，又有植物又有水。

路線4:啟德地鐵站 去斧山道 去扎山道

喺九龍唔想經地盤同碼頭，唯有就經啟晴邨條隧道去彩虹地鐵站上斧山道轉山路上沙田坳道扎山道，迫完人一公里捱斜路都唔緊要，你一樣避唔開山路上d車，有時仲要好快，多車嘅時候一樣要步步為營。

路線5: 搭車去跑沙田大埔

唔想俾車撞同經地盤同等燈，唯有坐屯馬線 (大圍轉車算方便) 去跑沙田大埔，由沙田婚姻登記處起到大王爺廟，中間都係一個燈位，撞都係撞單車，至少有10km 8km 路直去。

總括而言，點解香港咁多越野跑好手，其實真係為勢所迫架啫，而規劃上話得事嘅係九成九唔會跑街，所以唔會明白你推廣運動嘅配套最簡單就係整條平路無燈位無地盤直去到咁簡單。(好記得細個有個廣告有d小朋友唔知死走去地盤水氹游水，一腳踏入個釘版上面，仲浮咗句「游水最緊要安全至上」，其實跑步都係一樣。)

我祖家喺北角，所以非常懷念捱幾個燈位喺煤氣公司直去筲箕灣都有5km嘅路 (已經夠哂長) 最慘以前紅磡坐十分鐘船都值去對面海跑，宜家喺啟德就no la。

(將來真係可能要搬入西貢跑東壩先可以好好享受一段10km路)