[倫敦馬拉松2019] 女護士慘被褫奪世界紀錄

由

2019-05-08

Fitz > 運動 Sports > 跑步 Running > [倫敦馬拉松2019] 女護士慘被褫奪世界紀錄

9/5/2019 更新

《健力士紀錄大全》卒之承認，話佢哋護士制服標準不合時宜，向 Jessica 認錯，仲會將佢做出嘅3小時8分22秒列為世界紀錄。

倫敦馬拉松一場比賽38項世界紀錄，其中一項由 Jessica Anderson 所創，佢著住平時返工嘅護士制服跑倫馬，以3小時8分22秒完成賽事，創出「著住護士制服最快完成馬拉松」嘅世界紀錄。

不過個幾禮拜後，《健力士紀錄大全》通知 Jessica，話佢著嘅制服唔合規格。《大全》嘅規則訂明，要破呢項紀錄，所著嘅護士衫就係要白色或藍色嘅連身裙，頭上要戴住護士帽。所以 Jessica 嗰一套短衫長褲，並唔符合當局嘅標準，要取消佢嘅世界紀錄。

Jessica 對於無咗個世界紀錄並唔介意，不過佢好奇怪《紀錄大全》嘅標準，可以咁不合時宜。喺英國皇家倫敦醫院擔任護士嘅 Jessica 話，今時今日好多護士制服，都唔係著連身裙，著褲反而方便做嘢。

網友群起攻擊《紀錄大全》

Jessica 就話唔介意紀錄被取消，不過英國民眾就覺得《紀錄大全》對於護士嘅形象充滿性別歧視意味，並發起網上運動 (#WhatNursesWear)，希望有關方面可以正視問題。

其實，只要睇下美劇《Code Black》或者《Grey’s Anatomy》，劇中嘅護士 (甚至醫生) 都成日短衫長褲，有幾出奇呢?

資料來源: BBC