唔好俾你副body限制，阻止你去追求 | 一年內跑入sub-3 身體篇

估唔到話要跑入sub 3，大家咁有反應，生活有d衝擊都好吖，我唔介意成為一陣花生，歡迎享用。至於留言，正面會放喺最近用，負面嘅放喺將來用（「唔好衰俾人睇」相信都好有力量），做香港人好多情緒要放，彼此盡量去理解，其實你個反應可能對我無乜影響，但日積月累對你自己影響會更加大，所以唔好睇少自己影響自己嘅力量，一句說話，一個動作，一個月嘅km數，一年嘅追求，結果可以好大分別。不過，認同「有目標未必要講出嚟」，所以我更加要專注喺當初點解要講出嚟：最想分享呢一年挑戰sub3 過程嘅身心靈變化，希望鼓勵更多人喺唔同方面有追求同認識自己多d，所以過咗一個月訓練，先講認識身體。我嘗試列出幾點，唔知你有無同感?

1. 有時見到人跑姿好靚，但自己跑姿唔好睇，係咪方法問題定身型問題？(我小腿短就點後蹬都唔悅目架啦，當我見到自己天生小腿肌同四頭肌差唔多粗（如果有睇麥兜就知乜係黎根條腿），都會懷疑自己係咪太獨特唔啱跑步）
2. 見到人材比例好好，身短腳長跑得好輕身，我地呢d係咪點練都事倍功半？（我自問身長腳短、腳掌細，無嘢啱，扮猩猩最有potential)
3. 其實我細個都無跑開，唔似人地有運動底，玩學屆，一練就上手，想追都唔夠人快，無乜心機去認真練 （我真係入大學宿舍o camp 先第一次跑10km ，跑完虛脫，廿幾年前）
4. 點解d友仔一拉筋可以成個瞓哂落去咁柔軟?（我出名硬筋點搞⋯⋯）
5. 年紀又開始大，宜家先操點夠後生跑吖，操咁行，遲早實受傷，有乜謂吖⋯（我疫情期間無熱身，想睇吓自己1km 最快跑幾多，跑個3分幾順便確診埋足底筋膜炎，抖咗幾個月）

同做好多事都一樣，賴吓d先天條件同環境因素先啦，不過當你唔係要做世界冠軍、贏第一、攞名次嘅時候，跑步其實只係挑戰緊自己此時此刻此body，仲要同所有香港人一樣平衡好哂所有嘢都執行到個訓練計劃先係最好玩嘅地方。講真，我最後跑到sub 3 或者3:01 關你咩事吖，8月巴黎奧運嘅金牌選手你都數唔晒啦，可況我呢d nobody，但係認識自己嘅過程嘅好寶貴，相信同好多人可以共鳴到同埋有機會激勵到人，咁就值得去記錄同分享。

我做完換肝手術都係因為定咗要參加三鐵比賽而去學游水，所以到29歲先學識。就算宜家無乜玩，我都識咗游水。不過好快就知自己唔太想追求游水或單車有進步，行山跑步之間揀，雖然都玩過十幾次毅行十幾次全馬但慢慢發覺朋友越玩越長，而且越野跑技術要求更高，我技術膽識都不足，相反馬拉松42公里剛剛好，就算我先天幾咁不足，步幅唔夠大，步速唔夠高，(可能要用好密嘅步頻搭夠) 都唔緊要，至少係一個相當難但仍然有機會挑戰嘅目標，都算 SMART 吖，specific（全馬）、measurable（sub3)、achieveable（相信係）、realistic（每月增加）、timely (1年）。

一年斬開十二個月，暫時訂咗儲km作為頭兩個月嘅基本目標，2月第一階段月跑200km，除咗儲km數外，仲有幾個焦點：

1. 每次跑完全馬，手肘位都超攰，話哂都擺咗幾萬吓，所以我特別加一set 20 吓掌上壓喺練跑嘅中間，做完又可以擺返鬆隻手。（其實我先天爆發力不足，上肢弱又無力，又好憎做 gym（我成日話我有一日跑唔郁再去練大隻，所以唯有微調）
2. 長課完最攰條腰，皆因我條腰板真心硬，所以 sit-up 同 plank 之間，我揀咗sit-up 每日都只係20吓（我係無人㩒腳做唔到嗰種硬），但一個月已有成效。
3. 懶拉筋，呢個廿年嘅習慣，唯有喺浸浴嗰陣做多d，希望事半功倍，過咗一個月係稍有所成，起碼拉筋由腳指摸到落半隻腳板。

做好多事都一樣，都要了解一下自己擁有嘅條件，運動就一定要睇自己身體特性，好似我平時50零60心率，全馬跑到平均19X，究竟係隻錶唔準定唔猝死已經感恩，我唔清楚，但我知道要腳踏實地，循序漸進，一步一步，講埋3月嘅目標係月過250km，同埋開始研究吓 interval （因為最憎咁chur)，所以真係成世無跟人認真跑過，四月身體篇再報告。

（雖然自己教練自己做，但跑步教練嘅價值，真係經驗，相信好教練實見過我呢d騎呢身形嘅同學，咁有咁多人做參考當然會俾到好建議啦，不過我就自己摸下自己個底先咁解。）

其實練一年 全馬由4:00跑入3:00真係咁難? 點都好，就當一個月快5分鐘，lets go。俾個身體感受到進步，先可以享受個挑戰過程架嘛。

咁大個人一定試過俾人話你「樣唔得」、「身材唔得」、「度嘢唔得」、「讀書唔得」、「做嘢唔得」、「個人唔得」、「家底唔得」、總之乜Q都唔得，又係嗰句，做到係自己嘅，做唔到都係自己嘅，唔會因為人地把口就阻止你去定目標。

如果「定目標」都唔得，咁平時點鼓勵年青人追求自己想做嘅事呀？可能要等佢老咗先叫佢報中年好聲音啦。

我就參加中年跑馬仔啦。