四港人出戰英國毅行者2022，12小時28分25秒奪平民組冠軍

香港嘅樂施毅行者實體活動唔知幾時可以舉行，不過9月23日英國樂施毅行者 Oxfam Trailwalker GB (South) BC 順利舉行，香港人仲贏得組別冠軍!

來自香港嘅隊伍 “852 Runner” 以 12:28:25 完成100公里，奪得平民組 (Civilian, 非軍人組別) 冠軍，全場第8，當中成員包括首位 HK4TUC 香港四徑挑戰 Sub-50 跑手 Jacky Leung 梁俊強。

根據 852 runner 隊員 Andy 喺 Run UK / 跑馬去英國 嘅帖文話:「我哋遍佈英國唔同地方，賽前無夾過。喺香港我都只係小薯一名，無諗過有機會同大神們一隊，落到場時大家分工做得好好。」

據說，支援隊行山跑步經驗不多，但憑住大家互相合作，群策群力，隊伍得以順利完成﹐發揮香港人精神。更多消息可到 Run UK / 跑馬去英國 爬文跟進。