因為一團火，速遞嚟遲咗

你熄咗未?

這是 Reels (90秒IG短片) 的年代，碌手機已經可以日夜都繽紛 (出去廟街? 咪玩)! 但有位小童，不睇Reels，唔打機，冇開Netflix，一條友出街射籃，竟然。

細路在屋前空地射籃的Reel，有729萬views，75.9萬like，2.4萬回應，9.1萬分享，竟然!

小鎮一塊凹凸不平的石屎地，有個殘舊的籃球架，沒場地線。一個小童獨自在射籃，絕對是一人之境，冇隊友，冇街坊，甚至連專欺凌細路的技安也不在。就是孤獨小童，單挑百年孤寂的籃球柱。

 

寧靜的馬路上，UPS 貨車緩緩駛過，停下來，司機是位扎著長髮的年青男黑人，樣貌有點似那位經常笑容滿滿的前巴西國腳朗拿甸奴，他步下了駕駛座，沒有拿大包小包的貨物，兩手空空，但急步走向場地。

雖然他們沒有對話，作為波友的小童，好快意識到這是 ”I’m in” 的訊號，二話不說，用力把球傳給他。「朗拿甸奴」接過，隨即作遠距離投射，中框邊不入，大叫：OMG! (沒有叫 “Fuxk”，證明有相當教養)。跟著衝向籃底，示意小童傳球，小童乖巧地把球推向離框邊不遠處的高空，朗拿甸奴躍起凌空反手向後把球投入框中，bingo，多麼典型的 NBA 片段。

跟著朗拿甸奴持球，左右擺動身軀作勢扮進攻，小童也交戲伸出雙手緊身攔截，朗拿甸奴有時會在隱形的3分區起手，有時會高速走籃突襲，他們二人輪流進攻防守，投入了一場二人籃球賽，雖然冇記分、冇觀眾、冇歡呼聲，甚至二人冇任何對話，但完全感覺到有團火，有溫度，有友情，小童晚上睡在床上會有一段美好的回憶。

朗拿甸奴用了偷來的數分鐘玩夠了，趕忙走回貨車，繼續派送包裹。字幕出現：”If this is the reason why my packages are late, I’m totally fine with it”，我想說，我都fine。

講起團火，又令人想起「少林足球」，星爺去夜總會想說服大師兄復出：我心中果團火係唔會熄。大師兄話團火一吹就熄。係嘅，為生活 (即係為層樓)、冇時間 (又有時間去日本)、年紀大 (冇叫你開4分披)，團火好易吹熄。

只要有團火，就是永遠的戴志偉

不過星爺話團火一直藏於心底，可以歷久常新，一撻就著番。又真，球場見好多叔叔伯伯，赤膊或著件白色背心，帶住個波同肚腩，一條友係度射龍門或者射籃，一見有幾個細路係度玩，就挑引佢哋係開波，叔叔冇速度，有技術；冇core，有拼勁。

個天黑晒落緊貓落緊狗，仍見球場有人冒雨在跑；坐小巴窗外見班跑友熱血地jog上柴斜；7月烈陽下有山友一級一級地攀上九龍坑山。當你好不幸星期六要返工，喺地鐵見條友皮膚拗黑，咩個S記袋、前胸插兩個水樽、著T7褲、穿H記山鞋，你心中那團微弱火種，會有反應，心跳輕微加速，四頭肌小小收緊，單起右腳向後拉筋，好想出去鍊番轉。

有人話: 做人冇core，咁同條咸魚有乜分別? 有分別，有團火，就有生命。

今次唔寫五千字長文，冇埋彩蛋，因為我和肚腩有個約會，趕住落街跑步。「喂，帶埋你張樂悠咭呀！」阿仔大叫。

這是我們的例一 (2021年10月開始)，幾條友夜晚由柏架山道腳全jog上到波頂，4.5K，keep住團火，雖然對我來說是減壽。

嚟緊週日，每個人都有自己sub乜sub物的目標，達到自然開心出post，做唔到唔緊要，或多或少總搵到個理由原諒自己。最重要keep住團火同心跳，人生又有番目標。馬友，加油！