2021年大阪女子馬拉松，賽前焦點係劍指日本女子馬拉松紀錄嘅一山麻緒，以及為佢破風嘅川內優輝。最後，一山挑戰失敗，只能跑出2:21:11，與日本紀錄相差2分鐘，但仍然刷新大會紀錄。另一邊廂，史上第一位女子60歲以上 Sub-3 跑手弓削田真理子 (Mariko Yugeta) ，就於同一賽道跑出2:52:13，以第48名過終點，並創下W60組別世界紀錄。舊紀錄2:56:54，同由弓削田真理子保持，所以今次佢快咗足足超過4分鐘。
呢場係今年62歲嘅真理子，第109場全馬賽事，佢話大阪馬拉松呢種「閉門式倉鼠跑」，過程相當辛苦。好彩佢一向keep住最強訓練模式，夏天每個月可以跑800公里，加埋每個月一個全馬賽事，令佢長期維持最佳狀態，更話應該可以再跑快啲。
弓削田真理子下個目標，將會係3月舉行嘅名古屋女子馬拉松，佢希望可以跑到2:50，再破世界紀錄。有關真理子さん更多故事，可睇《六十一歲的十三妹》。
資料: Sans Po
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。
