從來無諗過，跑步勝地青山公路都可以咁多人。
3月14日星期六，下晝3點，我揸住部錢七諗住泊喺大欖轉車站然後跑下步。點知去到發現停車錶位full晒，然後向荃灣方向，一路搵位:
- 青龍頭: 滿
- 青龍頭碼頭避車處: 滿
- 深井深慈街路邊: 無晒位，部份車泊上行人路
- 機場核心計劃展覽中心停車場: 滿
- 舊青山公路 (汀九村): 滿晒，學神都無位學車
結果，我要去到山邊別墅嘅小路邊，先搵到一個周圍都係垃圾嘅位。
嘉頓係重災區
搞咗一大輪，先可以開始跑步，但呢個周末青公人潮眾多，我遇過最多人一次，係某年渣馬前一個禮拜，由近水灣至麗都灣一段，粗略估計有成百幾二百人一齊跑，不過當日因為大家都係跑步，所以都叫秩序井然。
但係，而家青公嘅人潮以慢步人潮為主，有啲無良街坊更踩部單車上行人路。大家要明白，青山公路部份路段都幾窄，只有三至四呎寬，你一行兩三人打橫行，其他人真係唔夠位過。
我都好明白條路人人有份 (踩單車嘅朋友唔該唔好踩上行人路)，你有你慢慢行，我有我哋鳩衝，不過唔該留番啲位畀其他人，唔好塞住條路。
重災區可以話係嘉頓 (向荃灣方向) 上斜一段路 ，唔少人就咁企喺路邊照相，又唔理附近有無人行過。
咁究竟嗰個下晝青公有幾多人? 我真係無數過，但我喺汀九跑咗兩圈，一共8公里，前前後後講咗十次八次「唔該借借」，呢個數字係我跑咁耐青公都未試過。
「跑步就戴番個口罩啦!」
大家為咗抗疫，肯到戶外絕對支持，所以跑步人士同行人只要互相禮讓，係完全無問題。不過，當我喺麗都灣，畀一家大細阻住行唔到，我講完「唔該借借」之後，有人竟然同我講咗句:「跑步就戴番個口罩啦!」
人多要防疫，戴口罩好應該，所以嗰一刻我真係駁佢唔到。
或者，我下次跑步要搵過條路線，或者搵過另一個時間。
不過，仍然要提醒返大家:
- 疫症時間，遇到人多嘅時候，無論戶外定室內，最好戴返口罩
- 行人路未必好闊落，慢步走或跑步請唔好阻路
- 行人路不要踩單車
- 勿亂拋垃圾
去去，武器走！
