Fitz > 運動 Sports > 跑步 Running > [有毒慎入] 識玩,一定要帶女友去玩呢個 (後篇) Eiger Ultra Trail

 

圖: 「大佬」真係做到了,而家無野可以再難到佢~~~~

續上篇《[有毒慎入] 識玩,一定要帶女友去玩呢個 (前篇)
*文長慎入,唔想睇文,可以feel free跳去最尾睇片

承上回,由去年10月報完名後,其實曾經都有D懷疑過女友 (下稱「大佬」) 究竟完唔完成到,因為始終「大佬」都算係新手,而且未試過行超過35km山。 再加上之前完成過 E101 既 Cap William 都話要穩陣地限時完成,起碼要擁有24小時完成毅行者既實力 (雖然行完之後,我覺得未必要….haha) ,所以即使係去到起步前,我都係得8成信心。

9個月後既今日,經過一番操練及努力,我地真係做到了……….雖然過程有D艱辛!

因為全程都幾趕急,有興趣玩既就必須要留意後面有關 Check Point 既分享。

圖: 選擇早上6:45am 起步,氣氛唔錯

起步 ~ 偷15分鐘Buffer

當日起步時間分為2段 (目標9hrs 30mins內的6:45am ,目標9hrs 30mins後的7:00am),但其實大會 Cut off 係計當地時間,所以唔洗理佢,當場係早D出發有著數 (間接多左15分鐘buffer)。

圖: 除左頭4km 是可以跑既平路,一如所料都係上山上山同上山

頭25KM ~ 無止景的爬升

當日一起步,所有跑手都係一窩蜂的衝,同係香港比賽一樣,外國跑手都係比較鐘意一開波就衝,係人群中我地2個身型較小的香港人不停被「界」……..而頭4km都係平路+小小斜波,尚算輕鬆。

圖:上山開始拉龍,想快都有D難度

4km後開始有一少段梯級上山後,就開始係碎石Trail地的爬升,同香港山徑唔同,外國的山徑主要是天然Trail 泥地及碎石為主,與香港的梯級上山係有D唔同。大約行8-9km左右就到了第一個水站 Grosse Scheidegg (8.4km),去到水站 (約2000米高) 勁凍,勁大風,好多人都即係著番厚衫或風褸,而之後既路段都一直係維持係高過1800米以上既水平,所以全程都無再除過,幾乎去到尾先暖番D。而過完第一個水站再行多6km就係第一個 CUT OFF CP-FIRST。

圖: 第一個 CP ~ FIRST 既鐵索橋係必定既影相位…..唔好錯過

FIRST (14km) 係第一個 Cut off (限時係10:30am),我地當日10點左右到,賺到約30分鐘Buffer,就邊行邊影相。到Check Point後,就把握時候食野/補給。去到 Check Point 係有D失望,當時補給站分開左101km/51km AREA,眼見101km有 ham,cheese +面包,但51km只有大會既 power bar/snack + 蕉 (我本身已經袋著成身powerbar + Gel)。 無計! 硬食……..睇著人開餐,唯有食2-3條蕉繼續上路……行到約20km到第2個水站 Field 終於見到有 ham、cheese + 面包……………thanks god its food~~~

圖: 「大佬」終於體驗到我平時比賽食野係有幾咁~~~「餓狗搶X」

「餓狗搶X」後,就繼續上路打 BOSS。2650米高的 CP2 Faulhorn (25km) (限時係13:45要到達)。由 Field 上 Faulhorn 大約只有不足5km的路程,但爬升卻有約600米。大會俾既時限係1hr30mins,其實好 Tight。上到一半左右「大佬」已經有啲頂唔順,越行越慢。而個段路有啲似鉛礦坳向四方亭 (大亂石上山) 個段路,但難啲,又斜啲,又上極都未上完咁既Feel………但時間有限,雖然有30分鐘buffer係手,但其實要輸番晒係好容易既事……..所以出動拖拉上山。

終於撐到了…….Faulhorn (25km)! 真係上到嘔茄。

大約13:09上到 Faulhorn,堅守到兼賺多左少少有36分鐘 buffer!

當時信心大増,「大佬」完成不是夢!

圖: 「大佬」一路上一路爆粗…….拖拉完一段我都要回一回。我只敢在後面緩媛死跟.

後26KM ~ 無止景的落斜

圖: 不停的碎石地下山

上完25km後,打後的一半路段都係落山為主。大家唔好輕視以為落山好輕鬆,其實D路都算幾Technical,全碎石下山。 而且一落就落11km先再到 CP3 Schynige platte (中途有一水站但真係得水…餓死)。對雙膝都幾大壓力 (廣告時間: 好在我地都貼左KT TAPE 減輕雙膝壓力)

圖: 有D路段都唔係講笑…..幾Technical 下!

「大佬」上完 Faulhorn 其實都死死地…….但行多左幾km後竟然開始回魂 ~都 keep 到 4km/h pace,我地16:03到達了 CP3 Schynige platte (36km,cutoff time 係17:00) 我地當時已經有57分鐘 buffer 喺手,心諗: 「無問題,一定掂」!

圖: 全程13km碎石路落山,由近1850米高一落到尾,「大佬」ITB開始發作了

過 CP3 Schynige platte (36km) (又係無乜野食,得薯片同一D凍既咸湯)後,懷著信心繼續上路!

由 CP3 去 CP4 Burglauenen (44km) 路程約8km,但係由近1850米高一落到尾…..都真係幾甘下! 而此時暗湧到來,「大佬」ITB 開始發作,腳痛……….大鑊!

>

圖: 「大佬」靠自己意志撐到去最後一個CP …….有D感動!

「大佬」落山速度減慢,而且可能CP3真係無啖好食,「大佬」已經有D疲態畢露,但落山好難出拖拉繩,只可以靠「大佬」自己意志撐落去! 最後真係做到…….於18:51我地到了最後一個CP Burglauenen (44km) 距離14個鐘限時,尚有2個鐘9 分鐘,要完成7km 平路應該無問題了。

圖: 最後6-7km,拖拉車出動帶著半死既「大佬」完成最後任務!

最後6-7km,主要係石屎平路 + 少許上落。知道只要 keep 到快步行5km/h pace 都一定頂到衝線。 行左1個鐘左右,終於見到個Town,最後1km上埋一條斜到PK既大斜路 (真係好L斜,拉完大佬,我累到要企定定左20秒先回到氣)。

最後1km,見到夾道歡迎既途人,我地都十分興奮。眼眶都有D濕…….估唔到真係完成到。

最後,用左13hrs 21 mins衝線,成功在限時14小時前完成!

*** (Garmin 錶最後計到係行左55km,足足送多左4km )

圖: 「大佬」攞到夢寐以求既 Finisher Tee

對新手「大佬」來講,完成呢 51km (實情係55km) 仲要係 Ultra Trail World Tour Level 既比賽,真係可以講係 mission impossible……對佢來講,已經係超額完成……..勁呀!

圖:成功完成除左Finisher Tee外,仲有一塊 Eiger 石頭既 Finisher Rock
圖: 一人身兼拖拉員,攝影師,補給員,心理輔導員,Pacer …….好難忘的50km 哈哈

唔想睇文,可以睇片

送上小弟過程既影片(第一次用 iPHONE 剪片,劣作勿插) :

有興趣參加既朋友留意

特別注意 CUT OFF TIME~ 勿留戀美景

圖: 51km的 CUT OFF時間是頭「緊」尾「鬆」,當中 CP Faulhorn(25km) 係十分關鍵

其實全程51km的 CUT OFF 時間是頭「緊」尾「鬆」,而關鍵係第25km的 CP Faulhorn。

當日起步時間分為6:45am 及7:00am。其實事前,已經有心理準備頭25km不停爬升上斜,而且死線是13:45要完成一半路程,即係7個鐘頭內要到 Faulhorn。即係要 keep 到上山有約3.8- 4km/hr pace 先比較穩陣。而完賽後,Check 番成績,當日有好多選手在過完 CP 1 FIRST 之後,紀錄為 DNF,估計應該係在 Faulhorn 前趕唔切而被DQ了。而亦可以分享,頭25km 的風景比尾25km的確係靚D,所以相信有朋友可能掛住影相,影到唔知時間都唔出奇!

如果大家有興趣就準備十月報名啦:
https://www.eigerultratrail.ch/en/e51-couples.html


更多:
Fitz Facebook專頁
[有毒慎入] 識玩,一定要帶女友去玩呢個 (前篇)
[怯~你就輸了!] 一對踏上大賽頒獎台的地球人
[全馬初體驗] 全馬同100km 邊樣辛苦D?
識揀,一定係揀跑「山」女做女朋友
壞人 [email protected]
Fitz Running 跑步


文章為作者意見,不代表Fitz立場。
歡迎投稿: https://fitz.hk/contribute/