比賽日的10件蝦碌事

踏入九月，香港跑季正式開鑼，咪以為參賽經驗多就唔會發生蝦碌事。competitor.com訪問咗十位長跑運動員，佢哋發生過蝦碌嘢，唔少仲係一失足成千古恨。

1. 無帶號碼布及晶片：
練得咁辛苦，點知去到現場先至唔記得帶布！返屋企拎？定係照去跑放棄個官方成績？（有啲比賽連起跑線都唔你入）簡直係人生交叉點。仲有係，記得帶埋扣針呀。

2. 起跑先至嚟內急：
一場比賽閒閒地都一千幾百人參加，臨起跑先發覺自己有人三急，到時排隊去廁所都未必趕得切。年年渣馬，有唔少人未過西隧，就已經要排隊去廁所，有人仲要搞到就地解決添。

3. 跌太陽鏡落廁所：
呢件蝦碌事竟然打入十大。據講正正係田為大家太急於去廁所解決，結果太陽眼鏡、手機等隨身物品，一個唔留神就失落廁所。損失嘅並唔係財物，最大影響肯定係賽跑時嘅心情。

4. 手錶無電無訊號：
時下啲GPS手錶未必可以頂到一場馬拉松比賽，比賽前記得試清楚佢嘅續航能力有幾強，更加記得之前一晚要叉足電。而起跑前，亦早啲連接好衛星訊號。

5. 無帶短褲：
呢個係competitor.com總編輯私人提供。佢話有朋友去到現場換衫，先發現自己無帶跑褲，結果要將長褲剪短出賽。其實唔單止跑褲，跑衫、跑襪，甚至跑鞋都要早一晚準備好啦。嗱，跑步群組嘅朋友好鍾意早一日將全身裝備影低，果然有先見之明！

6. 無巴士搭：
話說佛羅里達州一項跑森林嘅比賽，有1700人報名，但主協單位只係安排咗1000人嘅巴士，結果搞到要將比賽取消。呢件事雖然唔會喺香港發生，但係可以提醒我哋，比賽前了解一下到達嘅交通工具。臨出發先發現無車到，call Uber都未必call得切啦。

7. 遺失行李：
去海外比賽嘅跑手留意。機場唔見行李時有所聞，所以最穩陣方法，就係將比賽用嘅物資裝備跟身上機。萬一唔見行李，都可以繼續參加比賽。

8. 蕩失路：
無論幾富經驗嘅老手，都唔會場場比賽都參加過。所以，比賽前點都要認識一下賽道。而比賽嘅大會亦未必有清晰嘅指示。萬事靠自己，跑錯路真係恨錯難返呀。

9. 扯斷earphone：
一跑到廿幾三十公里，身上嘅裝備甩下甩絕不為奇。其中最常見係，跑手跑下跑下，會將有線耳機一嘢扯斷！好彩而家有藍芽耳機，呢個問題可以避免。不過隨身裝備就真係要諗辦法收好。有人試過跑跑下腰包啲engery gel爆開晒，要一路跑一路搵水沖身。

10. 跑到賴？
唔係啩，咁都得？我真係孤陋寡聞。

更多：
Fitz.hk Facebook專頁
跑友最愛分享的10種相片
[跑友中伏記] 聽人講不如信自己
Fitz Running 跑步