馬拉松比賽的選手包內一般都有本賽事手冊，但即使設計得再精美的賽事手冊，都未必吸引到每個跑友打開黎睇，最多都係望兩望。不過筆者就認為，賽事手冊內其實有好多資訊可以令到大家比賽前準備得好，比賽時發揮得更好。閱讀賽事手冊很多時候，會是跑友們容易忽略的其中一項賽前準備環節。
當然，唔係話要將賽事手冊背到滾瓜爛熟，但係入面有些資訊係筆者覺得可以幫到大家在比賽時有更好的發揮，所以借今日的機會同大家分享一下。
1. 賽事日期、起跑地點
曾經有跑友不幸記錯海外馬拉松的比賽日子，還要是到達當地後才發現。當然，渣馬咁大的香港跑界盛事，比賽日前大家的facebook都會被洗版，所以日子方面大家都應該記得係2017年2月12 日。另一樣要留意的係10公里的起跑地點係東區走廊，而半馬全馬則於尖沙咀，大家記得唔好去錯，因為真係曾經見過有跑友係尖沙咀問十公里的行李寄存位置…
2. 起跑時間
另一樣跑友們最常記錯的是起跑時間，每年各組別的起跑時間都可以有更改，所以最好都係睇清楚賽事手冊最安全。
3. 比賽時間流程及地點
呢一頁的資訊都好重要，包括有各組的號碼布顏色(最好就對下自己果張有無錯啦)、建議到達場地時間、行李寄存時間、行李寄存車的位置、起步地點及時間、截跑時限、領取行李區位置等。其中比較需要留意的係行李寄存開始及關閉的時間及截跑時限，因為於比賽當日係會比較少有關方面的指示。
4. 賽道圖及高度圖
呢頁的重點當然係賽道圖和高度圖啦，因為可以根據有關的資料分析補給的安排，包括帶幾多包gel，幾時食gel或者其他自行準備/大會的補給品。而高度圖更可以用以分析配速的安排及體力的分佈。
5. 比賽日物品清單
可以讓跑友檢查各項基本裝備是否帶齊
6. 特別交通安排
呢頁應該係大家最常留意的一頁，入面包括港鐵、巴士等交通工具的特別安排，方便大家可以預早計劃當日早上的行程安排。（＊小貼士：建議當日乘坐公共交通工具，因為當日起點附近會有大型的封路安排，的士或其他司機未必太了解有關安排，從而影響跑友們到場後的準備時間及心情。筆者真係不幸地曾試過多次於外地坐旅遊巴/的士前往場地時，因封路問題而行程受阻。）
7. 行李安排
留意需要使用大會提供的行李袋及行李牌，並根據大會指引將行李牌繫於行李袋及於行李袋上填寫個人資料。筆者建議跑友們用膠袋或防水袋放好貴重財物，特別是電子產品。因為大會的行李袋並不包100％防水，上年就有跑友因天雨而令到行李袋內的電子產品壞掉。
8. 起步區安排
跑友們最需要留意的包括最方便的港鐵出口位置、行李寄存位置、廁所位置等，以便當日可以的行程可以更順暢。
9. 重要事項
其中重中之重係大會呼籲唔好停留拍照。
10. 大會競賽規則
有關參賽資格和賽道規則係好需要大家多加注意，其中跑友們需要特別留意的包括轉讓號碼布的情況，及在比賽中途接受外來幫助的規則等。
11. 打氣地點
大會建議多個打氣地點，讓其他沒有參賽的朋友都能夠一同感受比賽的氣氛。
12. 參賽者名單
大家可以試下搵下見唔見到你自己個名！
希望以上呢幾項重中之重的重點，可以幫到大家大約知道應該點去睇呢本賽事手冊。當然入面的內容都仲有好多地方需要大家留意，最好就梗係仔細睇一次啦！
>
更多：
Fitz.hk Facebook專頁
[渣馬備戰] 領取跑手包攻略
[渣馬小貼士] 本地跑手領取跑手包的重要事項
[渣馬小貼士] 一個月前的準備
[愛．跑回家] 黃竹坑至沙田篇
[I go to school by BUS] Human VS 巴士(Round 1)
Fitz Running 跑步
一個喜歡運動，愛四圍跑，可惜經常患病的沙田友
