[渣馬備戰] 10K寄存行李多規距

渣馬10K有3萬5人參加，就算分成6組起跑，每組五千幾人，一齊到場，一齊上線、一齊去廁所、一齊寄存行李都成為一個頭痛問題。有參加過10K嘅跑友話，每次都見到唔少人要拎住行李跑足10公里，似乎呢問題都幾嚴重。(見：渣馬10K奇聞錄)

10K賽寄存行李安排：

1. 行李寄存區設於維園草地，大會指示參加者，若要寄行李，就要由銅鑼灣地鐵E出口行至維園，由皇仁書院對面嘅維園入口(16號閘)進入。(早兩年有人喺天后站行過去都得，比銅鑼灣站去行少好多路。)
2. 參加者要在起步前45分鐘寄存好行李。(每組可寄存行的時間不同，各位必須依照選手手冊列出之時間到草地存放行李。)
3. 行李必須放入大會派發之寄存袋內，並貼上專用標貼。
4. 參加者差不多要行勻成個維園，先可以去到東區走廊之起跑區。保守估守，路程要15分鐘。
5. 根據過往經驗，臨近起步時間存物會排長龍。
6. 唔寄存行李嘅話，可以由天后地鐵A2出口，直接抵達起跑區。
7. 注意：跑完取回行李要依時依候，更有可能輪候多時。

講到咁麻煩，咁跑手有咩解拆方法？

1. 依大會安排，早啲去到，行多咗嘅路當熱身。情願預多啲時間排隊去廁所，鬆下腳，補下水。
2. 想辦法將所需物資孭晒喺身，唔入維園同人逼(起跑區內有廁所，唔入維園都得)。 講真，天氣唔係太凍呢個辦法都諗得過。

其他注意事項：

1. 最最最最緊要帶備號碼布，無號碼布乜都唔使諗。
2. 記得帶扣針
3. 會場人多擠逼，唔好寄望喺起跑前可以好方便咁酙到水，自己帶樽水啦。(起步前放入回收箱或水站)。
4. 起步區在起跑時間後10分鐘會封閉，遲到無得跑。
5. 參加者要喺起跑前30分鐘進入起步區（銅鑼灣消防局側）。有經驗跑友，去到呢度先至熱身。而且天橋上大風，注意身體保暖。
6. 10K參加者人數多，快腳、慢腳，甚至「龍友」(以影相為主嘅參加者)都有，起步後大家注意人潮，小心為上。
7. 呼籲：要影相，要打卡，甚至要卿卿我我，就唔該企埋一二面，令真正跑步嘅參加賽免於受到不必要干擾。

(按：部份資料依照過去兩年渣馬大會參賽手冊，請各位留意官方最新公佈。)

更多：
Fitz.hk Facebook專頁
[渣馬備戰] 10K 賽道攻略
渣馬10K奇聞錄
Fitz Running 跑步