賽事贊助商 對參加者真係好緊要

金SIR話，好嘅比賽會令參加者帶來難忘回憶。這個跑季參加了幾場賽事，而剛去星期日的Asics 10K賽，我相信算係金SIR所講嘅「好比賽」。

朋友聽到我咁講，第一個反應就係：「你要讚田總？」咁個比賽搞得好，又未必完全只係關主辦單位事嘅……

呢場10K賽，令我最滿意嘅地方，可以話係：

1. 由進場、儲物、熱身、去廁所，以至上線起步，絲毫沒有無何阻濟；
2. 賽道寬闊，規劃良好，夠位爬頭，要收慢亦阻唔到人；
3. 水站唔多，但及時；
4. 跑完，拎水飲，取行李，離場走人，可迅速完成。
5. 你要留喺度影相，玩遊戲都得，悉隨尊便。

當然，比賽地點天水圍濕地公園，完全有足夠地方令人不覺擠擁。但值得注意係，主辦大會以及贊助商，識得咩係過猶不及。除咗對參賽者必要嘅儲物、廁所、飲水等設備，就只有贊助的幾個影相及遊戲攤位，而呢影相同遊戲，你鍾意玩就得，唔玩可以匆匆走過，唔會阻到你。

而最重要係，大多數參賽者對於贊助商嘅品牌亦唔抗拒，佢哋會樂於喺Asics嘅大標誌影下相，而介紹跑鞋攤位更是人頭湧湧。我就算比賽完出番屯門，亦見到唔少參加者去指定波鞋舖，即刻買佢哋嘅跑鞋（比賽日憑號碼布有折頭）。

呢個，咪就係品牌嘅忠誠囉。

如果一個活動，係由一個大家都接受嘅品牌主辦，自自然然會吸納佢嘅愛好者參加。比賽日舉目所見，超過一半選手都係著Asics。咁呢個活動，就已經成功咗一半嘞。

諗番起今年參加過嘅幾場比賽，有送個頭飾要你扮動物，有個要穿過樂隊表演先可以拎行李，咁呢場10K賽，就真係做到無多餘嘅嘢，令人跑得開心。

更多：
Fitz.hk Facebook專頁
[圖騰跑] 我中途退出了，因為……
香港長跑行山比賽
國際大型長跑賽事
Fitz Hiking行山