Fitz > 運動 Sports > 跑步 Running > [輸在起跑線] 小朋友賽跑比賽被攝位 執輸行頭慘過敗家?
筆者花了很多時間在相片中打格,但若有人覺得相片有冒犯或侵害任何人的私隱,敬請向本網站反映

嚴重利申: 本文純綷以家長身份討論小朋友參加賽跑比賽的態度,並非探討個案中的誰是誰非,更無意針對任何人。

呢一日,有跑友喺網上群組 長跑長友 發表帖子,「抒發」佢帶個女參加長跑比賽嘅感受。

簡單講,有位家長帶住小朋友參加比賽,一早企喺起跑線前面等起步 (第二排)。但係起步一刻,因為其他小朋友「不守秩序」,令到佢囡囡要第四排起步,「蝕」咗。

就係「蝕」呢兩個位,令呢位家長大為不快。

鬥快由企位開始

大多數網民對於呢位家長嘅感受,極不認同。大概論點歸納如下:

  1. 叫得做比賽,梗係鬥快! 而「鬥快」就係由未起步開始。只要你有「技巧」,就可以進佔頭位
  2. 任何長跑比賽都係咁,小朋友都要認識現實世界
  3. 只要比賽無犯規就得,咁比賽大會都無話唔畀攝位,所以小朋友企得後,係佢唔醒目
  4. 如果企位係要先到先得,咁唔使比賽啦,排隊去攞獎牌啦

上面呢啲論述筆者完全同意,但係如果對象係小朋友,我哋係咪需要另一種想法呢?

綠公仔閃唔好過馬路

記得小朋友讀幼稚園低班時,老師教佢過馬路嘅燈號。自嗰時開始,當行人過路燈閃緊嘅時候,佢都會捉實我,然後同我講:「老師話綠公仔閃緊唔好過馬路呀!」

相信大多數人都同我一樣,見到綠公仔閃,就梗係跑快兩步過埋去。而法例上,咁做亦唔算犯法 (警察唔會捉啩……)。但係喺小朋友面前,我係唔會衝過去。點解? 因為我哋希望,小朋友喺我哋教養之下,可以達到較高嘅情操。我唔係要佢做聖人,只係希望佢評定是非的標準,唔係跟法例,係由替人設想,為人正直嘅個心態出發。

比賽起跑線上,大家攝位,你推我撞亦可能無違反任何大會規例。不過教小朋友嘅時候,我哋係咪剩係教佢規例的最低標準,而唔教佢做人接物上應有嘅態度?

講到呢度,我確實理解發帖家長嘅心情,亦明白佢點解點解咁嬲。

我唔係話要鼓勵大家在起跑線前要互相禮讓,但規距、法例之外,其實仲有人情。

近年,當年輕人大模施樣坐喺地鐵,唔讓座畀有需要嘅人就往往在網上受公審。(假設呢位年輕人唔係有病唔係好攰唔係心情欠佳等)。唔少人會反駁,年輕人畀咗錢搭車,佢當有權坐低。不過,事實上讓座呢件事根本唔係法例要求 (除非係關愛座),所以討論要針對嘅,係大家仲有無人情味,仲識唔識得為人設想。

見到有人隨街屙屎,一般人嘅第一個反應就係:「嘩,咩人咁唔知醜!」而唔係:「哦! 佢犯咗法,千五蚊走唔甩。」法例之上,其實仲有人情。

遲過人上線,但靠住攝位將自己走去起跑線頭位,咁做無犯規,但一樣黑人憎囉。

教養小朋友,唔係教佢唔犯法就得囉。

按:事後呢位家長經過討論亦有迴響,有關帖子亦已刪除了

Fitz 連結: https://fitz.hk/?p=100534

更多:
Fitz Facebook 專頁
從跑步中見識香港人有幾仆街
Fitz Running 跑步


文章為作者意見,不代表Fitz立場。