[郁民教室] 抵抗酷熱練跑7招

睇天文台嘅天氣預測，見到個熱到溶嘅公仔之外，亦睇到日日最高氣溫去到成33、34度，真係情何以堪！天氣熱去跑步，唔單只影響表現，仲隨時會中暑、缺水。以下呢7個預備工夫，可以減輕酷熱天氣對大家嘅影響：

方法一：起步前要先降溫
有研究話，起步前為身體降溫，其實對於喺炎熱之下鍛練並無明顯幫助。不過，喺心理上，相信對唔少人都有幫助。大家可以試下喺起跑前先沖個凍水涼，話唔定可以幫助你適應炎熱環境。

方法二：注意衣著
衣物以快乾、排汗為首要要求。出汗反而可保持體溫唔會過高。

方法三：改變訓練時間
一係早啲，太陽無咁曬時出動；一係夜晚，等太陽落山。總之，避開熱辣辣嘅太陽，無咗太陽嘅煎熬，點都會涼快啲。

方法四：飲水飲水飲水
身體缺水會減輕調節體溫嘅能力。天氣熱唔熱都要飲水，而天熱更加要飲多啲水。

方法五：跑慢啲
天氣熱絕對會加重心肺嘅負荷，呢個情況下，未必要再加強鍛練強度。跑慢啲，等身體真正適應呢類天氣先再計劃加強訓練啦。

方法六：提早適應
其實應該喺春天時，已開始適應高溫天氣嘅訓練。不過，而家香港嘅春天已越嚟越短，大家只係唯有硬食暑天囉。

方法七：唔好搏
留意自己身體嘅反應，特別係頭昏、全身無力、口乾，都係中暑前嘅徵狀。總之一覺得唔妥，就即刻停止訓練，飲水，以及令身體降溫。

「烈陽神功」唔係人人啱練，一句到尾，注意自己身體狀況，做任何事都無需要用健康以至性命做賭注。

資料來源：Competitor.com

更多：
Fitz.hk Facebook專頁
[炎夏推介] 行山跑步至醒神補品!
在月球上跑步會比較快嗎?
Fitz Running 跑步