馬拉松秘技之笑到最後

到了最後關頭，全馬前一星期，搞睡眠質素，搞飲食習慣，搞按摩拉筋，搞衫褲鞋襪，搞當日糧草，搞當日歌list，因為再講練習都無用。根據本人多年練習不足嘅經驗，人越心虛，越多姿整，整色整水，最終成績最多15分鐘誤差。

回顧吓多年來幾個小策略得失（因為未必work，所以唔提前分享)，應承自己再練好d，今年算做到一半，所以先敢講兩句，免得放蕉皮害人。

幻想一下，馬拉松跑道上，大家就好似孖寶賽車一樣，有自備道具，有喺路上執嘅道具，用唔用點用都係見仁見智。

1. 背囊：因為睇完本書講唔夠水對人嘅精神有好大影響，呢個情況往往係25KM後先出現（尿黃），要解決就係之前25KM都持續有水飲，同樣地，肚餓都係25KM後嘅事，其實我呢類個肚裝唔得幾多嘢食又怕凍嘅人，同時要顧及飲食同保暖問題，頭10KM其實係要豐衣足食，（好似網上瘋傳大叔坐喺跑步機尾部，邊坐邊行邊隊花生嗰條片咁先啱。）所以出發前有諗過揹背囊，好在臨出發見到金教練篇文，無錯，水係夠，加上就算背囊都唔會袋太多嘢，又可必額外應付背囊嘅重量呢？唔建議。
2. 手攜：出發前一星期以朱古力奶同香蕉做早餐，等個胃適應，準備比賽當日想帶蕉同奶。結果將三盒奶入樽手拎住跑，10KM 已經可以掉，蕉確實唔重，一手拎一隻剛好，策略非常成功，唔肚餓，唔口渴。建議。
3. 去小便：一句到尾最緊要快，行開毅行唔怕通山痾，草叢或渠口絕對好過流動廁所，而且快痾快行無機會HEA，亦唔使焗親同等得太耐痾到腳震。(男士專利）
4. Power gel: 對需時超過四小時完成全馬嘅人，唔建議，HIGH得快，DROP得快，拉平均食蕉同朱古力奶好過，蕉係逐啖食，保持唔飽唔肚餓。唔建議。（毅行頂眼瞓另計）
5. 水站：好狀態時飲多d，腳痛嗰陣就變成令你更慢嘅引誘，同打麻雀一樣，站站停就做站長，相反飲咗水就同自己講係食咗孖寶粒星星，唔該TURBO一陣。
6. 衣著：有人質疑我著太多衫，又帶手套，我自己知自己事，我血壓低，人易凍，緊身衣透汗保暖，起步階段唔會凍，亦唔使用圍扔膠笠，建議。
7.  腰belt：強烈建議，兩至三包朱古力，一包鹽，電話，紙巾，一帶通行。

以上包括衣、食、行，最好事前試驗下，每個人情況不同，不過除咗裝備同策略，最重要係心態，今次想點跑，能夠實踐賽前4小時40KM的計劃先係令我最滿意嘅地方，因為我了解我自己嘅極限，盡量做到最好。

以下係今年同以前十年跑全馬都唔同嘅地方

1. 準備好令人振奮嘅詩歌：強勁節拍可以喺有力時幫你加快，但詩歌激勵嘅力量比起節奏感更有力，尤其係你覺得攰嘅時間，穩定你情緒，讓你感動有希望。
2. 不同嘅手部動作：重覆同慣性活動會令人發呆同胡思亂想，但投入歌曲，忘我演繹，相信我係全馬最多手部動作嘅參加者，一時朝天，一時打心口，做歌舞劇，輕鬆過渡精神狀態下跌嘅時間。
3. 笑：心理影響生理，生理亦影響心理，提醒自己面帶笑容，當我走到無力，我笑，我要享受挑戰，當我疾步如飛，我笑，我享受速度，越過一個又一個參賽者。尤其到最尾，笑讓我擊退痛楚，因為痛代表我盡力，因為跑得唔HEA先會痛，痛代表努力有成果。還有，笑讓你在沒有察覺鏡頭的情況下被捕捉最自然的神情。（見上圖）

為今年的馬拉松定調？是辛苦、興奮、滿足、失望、還是享受呢？

在這特別日子的二至六小時，你大部分的心情是怎樣？

為快樂而跑，帶笑容而來，一直到最後，那是人生吧。

（小弟多年浮沈於4:30-5:30的時間完成，今年多了一點斜路練習，有游水有做掌上壓，時間終於階段性地進步至4:18，將來拭目以待）

更多：
Fitz.hk Facebook專頁
跑步總有退下來的一天
[渣馬2017大數據] 一張圖睇下自己成績屬百分之幾
[渣馬2017] 我和我的初馬
[用鏡頭參與2017渣打馬拉松] 在銅鑼灣糖街拍攝跑手英姿
Fitz Running 跑步