大約一年多前，即是仍然係疫情 Lock down 之中 ，Yes，係 “ Lock Down “ ，出街人人要戴口罩，出入境要隔離 14 日嘅日子? 忘記了? 好遙遠? 其實只不過係三百幾日之前，連續兩年幾三年，不想但不能忘記，更加唔好再試，但願大家今生今世都唔會再遇上呢啲日子!
話說喺疫情嘅中後期，健身室有限度重開，户外運動容許豁免戴口罩，尖屁股嘅賓叔叔當然第一時間返去慣常嘅健身室做運動舉鐵，教練介紹我認識一位師兄，除咗都係玩三項鐵人，長跑之類，佢仲做咗一項香港嘅創舉 ….. 連續25個週末，每個週末圍繞香港島跑一次，一共25次環島，呢個記錄好似至今都未有人打破!
同師兄傾開，我問佢點解你要咁做呢? 佢話反正疫情期間無賽事悶悶地，户外跑步又唔使戴口罩，佢計過連續25次應該無問題應付到嘅 ( 呢點相當耐人尋味!) ，於是 Why Not?
傾下傾下，賓叔叔醒起我自己跑過十幾次全馬，好幾次 IRONMAN ，HK100 山賽之類之類，就係未試過圍繞我生於斯長於斯嘅香港島跑一圈，問下師兄全程大約幾長? 師兄話大約六十公里多少少，做開 廣告同 Activation 嘅叔叔靈光一閃，我就快六十歲，如果六十歲時跑一次環島六十公里都幾有紀念意義喎！但我唔識路，獨跑肯定迷途唔知走咗去邊，於是同教練及師兄商量之後，師兄義無反顧話帶路兼跑足全程無問題，教練更話既然係咁，不如到時候叫埋平時一齊練習嘅朋友仔一齊跑，咪重盞鬼？咁好嘅提議當然即時記抵佢，然後等待叔叔耳順之年到達，跑佢60公里去也。
時光荏苒，討厭嘅疫情終於過去，大家生活重回正軌，正常生活，正常運動，正常比賽，一下唔覺意，叔叔踏進六十歲嘅日子唔聲唔聲就到咗!
但問題嚟嘞，今年嘅渣打馬拉松啱啱就喺預定日子一個星期之前舉行，而原本應承參與嘅朋友大部份都會參加渣馬，由十公里，半馬至全馬不等，得一個星期休息恢復，會唔會令好多人唔參加呢? 於是唯有同教練商量一下，教練 W 師傅聽完我嘅擔憂之後，笑笑口咁話……
“ 正常人，跑完個渣馬真係應該唔會同你癲！ “
“ 係囉，咁典好呢？”
“ 不過，你呢班朋友，幾時正常過?”
於是著手安排一切，因為未必位位朋友可以有充足時間同體力陪我跑晒60公里，所以成個行程安排咗好幾個 In Out Point ，大家可以隨意喺任何路段加入同離開，務求輕輕鬆鬆無乜壓力之下，吹住水完成環島一週60公里。
考驗人品與人緣嘅時候到了，通知咗朋友們要喺渣馬之後一星期跑60公里，真心有少少擔心無人陪我癲，最後得師兄同叔叔兩個 HeHe 跑哂佢 ….
結果，W 師傅無講錯，我啲朋友係唔正常嘅，竟然有廿幾三十人舉手參加，人生有一班精神狀態相近嘅朋友，係幸福嘅。
起步前幾日，渣馬之後，好少凍嘅香港竟然凍到單位數字，有少少擔心起步嗰日會唔會凍到大家縮沙，畢竟跑完渣馬加上天氣嚴寒，縮沙係十分之合情合理嘅。
好在當日天公做美，乾爽十幾度天氣，無猛烈太陽無寒風凜冽，簡直係長跑嘅最好天氣，0700準時起步，由鰂魚涌順時針方向圍住香港島進發，有石屎路有斜路有山路有引水道，沿途有山有海有樹有草有木，最緊要係有友情。60公里中間設定咗 Lunch Break 同8個 Check point，有人陪我跑全程亦有人中途離開或者加入，最後用咗12個鐘返回鰂魚涌起步點，中途離開嘅隊友已經準備咗香檳薄餅煲仔飯油雞滷味喺度等我哋返嚟，好好味，更好味嘅係有錢都買唔到嘅人情味，呢60公里一啲都唔長!
難題嚟嘞，下一年搞乜好呢? 唔通跑60公里中間落海游一公里? 定踩30跑30游1公里好呢? 好在，有一年時間去諗，明年再算!
感謝所有參與的好朋友，叔叔愛你!
老餅廣告人，資深美指。貪威識食，惡死睖瞪，腌臢腥悶，姣斯躉篤！熱愛運動，業餘中嘅業餘三鐵運動員，酷愛貪靚臭美程度至長期健身控制飲食，考埋 PT 教練牌！
>
