圖: 坐上了呢架飛站衝燈的紅 VAN,乘客暈車浪係好合理

話說之前屎忽痕,贍粗粗走去問香港4徑紀錄保持者,針山十登王……(下省一千字) Tom Robertshaw,有無興趣組隊玩比賽。 弱弱的我諗著都會食檸檬……點知Tom竟然二話不說的就答應了……而故事就係咁開始……

圖: 近幾個月都有間中同 Tom 拍跳下,感覺都未算好得人驚……..心諗應該跟到Der~

比賽前,都同 Tom 操左4,5,6,7課,以為大概都對佢既步速有啲感覺,跟唔到就預左 (佢上針山都 jog 著上,我當然唔會跟佢啦),但佢都應該會就著我來玩……心諗小弟都「不是省油的燈」,就算比賽應該死唔去! 但去到比賽又另外一回事!

圖: 受山竹影響,原本DARK 45 由原本m4-8變成近乎石屎公路賽

比賽到了,受山竹影響,本身 M4-8 變成近7成都係石屎路跑,玩法完成唔同晒。本身走 M4-8 會有較多的攀升,坡覆較多會有多啲位可以回氣,起馬上山可以放慢啲。 但改路後,全程條路40km, 有30km都係可跑性極高……應該係話要做成績就唔跑唔得。

圖: 開始了……….車多路窄   Photo Credit: Angel’s Sky Gallery

一開波,城門水壩路較窄,開始都有啲塞塞地,預左一入石屎斜唔可以渣流灘,一定要跑。頭9k 環塘,無得揀一定要跑……三十幾分跑完出環塘,繼續去。 再來城門 > 金山 > 大埔道條路又係好好跑,個人仲好 Fresh,應該無問題 keep going……! 1個鐘多啲,到大埔道,心諗逆上畢架山應該有得回下,Tom 應該上山唔會push我掛……! 點知……

圖: Tom由大埔道到基維爾…..全部上斜都拖晒…..我完全無位hea (Photo Credit: Eddie Kwan)

滿以為上山有得放慢休息下之際,Tom 轉個身就隊條拖繩俾我……我諗都好俾佢拖下都可以一樣休息下………! 點知越上越唔對路,Power Walk + Jog 不停交替……條拖繩+我既重量好似對 Tom 既速度無影響……對,我力真係用少左……但呢個速度上山根本無得休息……平時上山我多數都 hea……呢晚完全係另一回事。轉眼間,2個幾鐘已經到基維爾回程……..走左個9km/hr既pace……有啲疲態好合理。

圖: 全程……開著近Max HR既心率…….好似無休息過咁…..

回程了,一開波又係石屎上斜……Tom 又隊條拖繩俾我……(由個一刻開始,我對條拖繩有產生少許恐懼)……拖唔緊要……拖著來 jog 個下大鑊。 未幾,終於上番大老山位,又來落石屎斜,甩繩後,再隊落獅子亭………! 由城門到而家全程都開著近 Max HR 既心率…….好似無休息過咁……大脾肌肉已經開始跳動……作抽筋了!

圖: 呢條野…..不得了,好Work…….但好L難飲!

落到獅子亭再上畢架山,Tom 又回頭……俾條拖繩俾我……我忍唔著開口同Tom講……要慢少少,我有啲攰……Tom 就話好會 keep a easy pace。點知我話慢少少係錯……我應該同佢講我行唔到,腳就斷………先會係行我既 Easy pace。 用左幾耐走完畢架山我真係唔知……我只知道呢晚我覺得條麥徑好似短左好多咁。

途中,呢架紅 van 實在開得太快,又衝燈,又飛站……跑跑下我大脾抽筋了,幸好坐得呢架紅 van 我早有預備~ CRAMPFIX-SHOT (Frankie店長介紹)…呢條野,可以話抽筋界既印度神油,一飲即掂,30秒內見效! (無Sponsor,堅真心話),但味道好L難頂……真係好L酸x100,頂得著陣味就神仙。「啪完針」後,繼續跑…………

圖: 司機~~~~ 可唔可以開慢少少…..我…有…D…想嘔….!

但跑跑下,乘客終於暈車浪……加上可能飲唔夠水,CRAMPFIX-SHOT 陣酸味,久久未散…….跑跑下,突然反胃……我嘔了。 司機麻煩揸慢啲……最後,呢部來回城門的外星紅 VAN……只用左4個幾鐘就番到終點……….呢$40蚊 (40km) 車費…..真係抵!

圖: 全靠呢架外星紅Van……..! 又快又準確,但手車真係有D辣….

Fitz 連結: https://fitz.hk/?p=104796



更多:
Fitz Facebook專頁
[逆轉反勝] 與 Salomon 神人們玩接力
[HK100賽後感] 有種福氣叫「食得跑得」
[有毒慎入] 識玩,一定要帶女友去玩呢個 (前篇)
[怯~你就輸了!] 一對踏上大賽頒獎台的地球人
壞人 [email protected]
Fitz Running 跑步

廣告
壞人Ryan
八十後,現職某大型連鎖店之營運經理,自2011 首次參與毅行者後,漸漸愛上越野跑。參加過大大小小之香港路賽,山賽 (凡人一名)。講究裝備,正宗『裝備L』 一名。 堅持屎波都要架生多。同時亦熱愛足球, 死忠曼聯迷。