Fitz > 運動 Sports > 跑步 Running > [HK100] 這一年 我由半馬跑到100公里

上年一月 我堅跑完我第一個21K
今年一月 我完成咗100K個人賽
無諗過過去一年我會累積左咁多里數 呢一年都攰啦
所以都係簡單啲 嚟十條自問自答總結一下吧

Q1: 點解會參加HK100?
答: 因為抽中左

Q2: 咁點解會去抽?
答: 同毅行一樣 麥四字典(毅行隊友)叫我抽我就去抽

Q3: 自己一個行驚唔驚?
答: 一開始……驚! 最怕夜晚自己一個行 所以知道自己中嗰陣 報咗 Dark45 練膽
不過依家無咁怕啦 因為我知道相信山神會眷顧我嘅

多謝花姐靚相 十分有心 為咗影晒每個參加者花咗好多心思 雖然只係第一次見同只見到個幾秒 但感覺好陽光好活力~見到花姐心情特別愉快!

Q4: 自己一個行會唔會好悶?
答:又唔會呀 望吓風景 食下野 哼下歌 間唔中同唔同嘅人傾吓計~咁都嫌悶嘅話 有力嘅就行快啲囉~時間都好快過嘅

Q5: 比賽中途有冇諗過放棄?
答: 有! 諗過無數次 因為太肚餓啦~
但諗起大家嘅支持同埋我知道我放棄咗一定會後悔一世! 而且如果唔係身體出現咗狀況 我相信無人會想退出嘅 所以只要我仲郁到 我都會碌到去終點 唯有快啲去下個CP開餐

Q6: 港百條路難行嗎?
答: 同毅行比,就係無咗麥九同十嘅環塘
個22k加插咗係頭半後,除咗麥四至八係正常,其他就會喺行行吓熟悉嘅道路上加碎石啊上山啊沙灘啊泥地啊草地啊 臨尾衝線嗰3K以為係全落斜 都突然間又轉彎 又係碎石落下 上下 再落山咁樣 多咗嘅五百米攀升就係咁樣切出嚟

對慢腳仔嚟講 主要難在要30個鐘內完成 同埋頭段嘅 cut-off 都比較早 即係要逼你跑下

咁即係難嗎? 我都拎咗件完賽威威褸 感覺都算還可以吧 (其實行緊個陣係#*#%?!%*)

為咗追CP cut off time…頭段就要開始跑下

Q7: 覺得港百安排尚算妥當嗎?
答: 好鍾意大會提供 有印曬距離 高度 CP資料嘅印水紙 賽tee 同埋可以有兩個補給包
一個係行咗一半嗰陣可以拎 一個係終點

大會好着緊參賽者嘅安全 所以參賽者必備嘅清單入面有銀氈 電話 等等 臨上馬鞍坳之前仲有檢查 確保大家上到山凍都有嘢包住

Helper 們都好熱情 係一啲奇怪嘅轉彎位 臨到CP 到咗CP都會聽到佢地熱情地打氣聲
順便會有人 check 埋你個號碼布 影下你相同埋睇下會唔會有人陪你行咁樣啦

每個CP嘅嘢食飲品都好充足 我依啲咁遲去到嘅人都仲有唔少嘢食 雖然食嘅嘢就唔係好啱我口味 不過基本嘅水同飯絕對有貨

Alex真係唔話得!睇佢面青口唇白但都出現咗

Q8: 點解當初會想玩咁長嘅山賽?
答: 純粹想試下自己嘅耐力可以去到邊
慢腳仔雖然無速度 但如果可以靠毅力完成到嘅野 我都想試下
事實證明 原來我都可以 巧開心
最後發現有多個得著 就係我認路叻咗 少少咁啦

亨爺先係真正嘅籤王  幾乎次次比賽都見到你 多謝沿途相遇一直幫我打氣  恭喜完賽

Q9: 仲會唔會想繼續玩咁長嘅山賽?
答: 行緊個陣諗 絕對唔想再虐待自己!
發明咁長嘅山賽嘅人都傻嘅! 再長啲個啲癡線嘅!
行完嗰陣話 我短期內都唔想再掂山
隔咗一陣……等我練好啲 再嚟過~

Q10: 玩山 長跑又攰又痛 點解要咁辛苦自己?
答: 全身肌肉痠痛嘅感覺其實真係好實在
身邊不時會有人同你講 都唔知你咁樣作賤自己做乜 乖乖地做一個斯斯文文嘅女仔咪算囉 (blablablabla)
其實就算唔跑 我都唔會斯文
其實就算唔做運動 行咗一日街都會攰啦
就算唔出街都可以病 加上最近流感高峰期
的確玩咁長嘅山賽 點都係會有少少過度疲勞嘅
再加埋賽後感冒發燒 簡直好似全身火燒骨咁
另加少少行動不便實屬正常 不過代表係盡咗力嘅證明 所以就算係攰左啲 我都好滿足
比人話係會有啲唔開心 但了解我 明白我 支持我的嘅人仲有好多 而且我喜歡現在這樣活著

唔少得仲有HNR 真係十分有心!  最後100米聽你地把聲真係成個人都醒晒  #HNR嘈爆everywhere 拎住棉被睇我衝線一定係怕我跑完凍啦 雖然嗰陣太陽好猛烈 一定唔係因為咁啱跑接力賽 又拎咗獎 有禮物嘅 多謝大家

最後最後
你話我自己完成咗100k好叻叻? 少少咁啦
但相對地我更加覺得自己係一個幸運嘅傢伙
由報名諮詢平時操山到比賽十卜終點打氣
身邊一直有一班好好嘅同伴們
加埋籤神嘅眷顧同每次比賽嘅天公嘅造美
我先可以拎到塊閃令令牌同埋件完賽威威褸
真係好多謝大家

期待2019同大家跑更多 行更多山🏃🏿‍♀️

撰文: Yvonne (2want)

HNR 跑步團隊 Facebook 專頁

Fitz連結: https://fitz.hk/?p=112336


更多:
Fitz Facebook專頁
[HK100 2018] 最快衝線中國跑手 沿途犯規被DQ取消資格
[山界盛事] 香港100越野賽 HK100 Ultral Trail Race
香港山賽 (越野跑) 的 半馬 全馬 及 超馬
[香港的馬拉松] 全馬 半馬 及 超馬
Fitz Running 跑步


文章為作者意見,不代表Fitz立場。