Steven Poust 同7歲囝囝 Chase、4歲囡囡 Abigail,齊齊揸船去佛羅里達嘅 St. Johns River 玩。爸爸喺船上釣魚,兩位小朋友就落河游水,點知突然水流轉急,爸爸即刻落水拉返兩位小朋友上船,可惜只係捉到著住救生衣嘅囡 Abigail,但就捉唔實無著救生衣嘅囝囝 Chase。

混亂之間,Chase 離爸爸越嚟越遠。呢個時候,Chase 大叫:「我游上岸搵救兵!」爸爸當時六神無主,只能回應一句:「I love you!」父子就咁失散咗。

Chase 雖然無著救生衣,游水又唔叻,但佢絕無放棄,用咗1個鐘頭游1英里,上岸搵人報警救助。多個政府部門派咗幾十名拯救人員,再用咗1個鐘時間搵到爸爸同妹妹,一家三口重聚,皆大歡喜。

爸爸被網民狂鞭

事後,Chase 當然被激讚,因為佢憑住一股勇氣,用狗仔式同背泳游咗1英里,班到救兵救出爸爸同妹妹。不過冷靜下來,唔少網民都覺得爸爸 Steven 處理好有問題:

  • 點解4歲妹妹有救生衣,7歲哥哥又無得著?
  • 咁細個嘅小朋友唔應該畀佢哋單獨落河玩
  • 爸爸係咪飲醉酒? 點解會放心畀阿囝一個人游水走咗去?
  • 有熟悉河流嘅網民話,河水係流動,泳術唔好嘅根本唔應該跳落河游水。爸爸容許小朋友咁做,已經好有問題。
St. Johns River

不過亦有人反駁話,當時情勢危急,爸爸 Steven 相信係情急之下先跳落河救人,大家都唔使過份怪責佢嘅。

資料: Daily MailWJXT

 

首頁 > 運動 Sports > 游泳 Swimming > 一家三口墮河7歲囝囝游1英里搵救兵,網民怪爸爸缺乏安全意識