一年8760個小時,最緊張就係渡海泳嗰幾粒鐘,點解仲要玩?

今年完咗,真係有諗過唔再玩,次次都驚住落,為乜? 我記得我寫過篇「唔驚我唔嚟,嚟咗就唔驚」,我知,但落水前個心噗噗跳,做 MC 上台,見好多人,好急好趕,幾大生意都好,我都唔多緊張,唯獨一個「悠優」落水游1km硬係心慌慌。今年我已經落多十幾次海,游到大浪灣都被山竹摧毀為止,期間歷史性游出赤柱個浮台 (其實一個人出浮台仲危險過渡海泳),仲有次落九龍仔都3.8米深咁跳落水,花咗唔少努力,到今日我都係驚,明明完成過3次都係緊張,講真我對我自己都有啲失望。

唔通有啲嘢真係無辦法再進步,真係得咁多?

帶住呢個問題,今年我係白痴到: 好,落水 (已經叻咗),平時我係要一落就要游,唔係我又騰,然後都好唔妥,點解我個頭又唔想放入水?


原來我副泳鏡喺額頭,但對比第一次游俾撞甩泳鏡的徬徨,我輕鬆用頭挨住浮波整好,仲得閒V住影相,見圖。

一心覺得今次學有所成,感謝九龍仔夠深,點知一群人雞泡魚互打互撞起步後,又真心係好大浪。

然後又遇上呼吸短促症,呼唔夠盡,吸唔夠深,不斷俾個浪打斷,我心諗又係呢個位,見圖已經好咗,教練 Kitty 一齊係附近,仲好爽肝同我影咗幾張相。

一分鐘後,終於順返,又係正常發揮時間。

眼前會展越來越近,去到中段開始跟大會口號,我不怕浪,我就是浪,但我是小浪,敵不過大浪,渡海泳最得人驚係其實你游緊跑步機,機快過你就 PK,呢個位係非常哲學,究竟要保留體力游慢d而前進唔到,定去得到游快d而後勁不繼?呢個狀況至少持續15分鐘,2016年我由西灣河過唔到太古就係咁。

又一次教練 Kitty 非常爽肝抱住浮波等我,同我講:左邊呀。

又過咗最不知所措的階段,對手唔係好遞得起又吓吓被自己條水泡帶阻住,最後鼓其餘勇⋯

完成,但失望多過滿足。

停滯不係我嘅條件、心態定階段? 唔想咁,係咪樣樣都要追求卓越我先會心息?

喺自我要求上,唔前進就後退,我又回想我點解29歲學游水,因為我要玩三鐵,宜家一樣,當我見到周子雁用11小時完成我個 Big Dream 全程三鐵,而我只係有一日限時內完成呢個 Big Dream。

我相信,唯有定立一個更高更遠大嘅目標先係唯一辦法,就算失敗都係無悔,就算做唔到十成,最終都可以從容完成一個奧運距離。

30歲呢個黃金十年過咗一半,我就將40歲與 Big Dream 連結,跨出一大步。

Fitz連結: https://fitz.hk/?p=105751


更多:
Fitz Facebook專頁
[維港渡海泳2017] 如何能夠成為 心口有個「勇」字 的人?
[世界上最遙遠的距離] 嘉亨灣與鯉景灣之間
Law少 許耀斌@Fitz.hk


文章為作者意見,不代表Fitz立場。

歡迎投稿: https://fitz.hk/contribute/

廣告
Law少 許耀斌
人稱Law少,前電台主持及監製,酷愛體育運動,多次參加馬拉松及毅行者活 動,近年更嘗試進軍三鐵及渡海泳。對於跑步、對於行山、對於比賽,均有深刻而令人動容的看法。著有《原來在沒有盼望 的地方才需要盼望》。