救生員落泳池游水要警告? 網民聲討區議員譚香文無理指控

黃大仙區議員兼星河明居法團主席，前立法會議員譚香文，喺社交平台投訴屋苑泳池救生員，話有人於清潔泳池期間游水。佢聲稱如事件屬實，會通知管理處跟進以及撤換呢名救生員。

其後，譚香文發表圖片，顯示管理公司已向該名救生員發出口頭警告。

呢件事引來游泳界以及網民激烈反應，唔少人第一時間問:「救生員落泳池游水有咩問題?」

「救生員落泳池游水有問題咩?」

唔使專業人士解答，一般人只要有少少常識，足以回答上面呢個問題。救生員落泳池游水當然無問題，因為救生員嘅工作，並唔止係坐定喺度等泳客求救。一般而言，一位游泳池救生員，日常工作包括:

1. 緊急救援
2. 清潔游泳池漂浮垃圾
3. 檢查泳池，以保障泳客健康
4. 檢查泳池底部有無甩磚等破損，以免整傷泳客

就算譚議員無呢方面常識，都應該識得 Google，搵下康文署救生員嘅招聘廣告，會發現「 協助執行清潔工作」係工作一部份。咁救生員落泳池，並一定係游水。

更何況，緊急拯救係救生員最重要嘅職責，如果救生員唔操好體能，唔練好泳術，遇到有人求救又點可以作出快速反應，拯救遇溺人士? 按佢哋嘅邏輯，各行各業嘅打工仔女真係注意一下:

• 消防員唔可以喺 on duty 時打排球
• 警察返工時唔可以去靶場練射擊
• IT 從業員雙手唔可以離開 keyboard/mouse
• 巴士司機返工時間唔可以落車
• 廚師唔可以離開灶頭，去買餸都唔得

網民聲討之餘，有專業嘅游泳會亦加入發聲。就好似 天空體育會 Sky Athletic Association 發文「嚴厲譴責黃大仙區議員譚香文」，團體以其專業知識反駁對救生員嘅誤解。

救生員職責係救急扶危，係專業工作，外行人真係唔應該喺不明情況下指指點點。