「我哋有敏怡!」:「世界山徑越野跑錦標賽」香港代表張敏怡

人善被人欺，人蠢冇藥醫，人壞左冇得唱歌，人細個唔讀書大咗做運輸。咁樣，人讀書叻做醫生、人手長腳長、人跑完298公里仲生還、人笑點好低、人純品但又揸電單車….，又點呀? 咁佢會叫張敏怡。

「世錦賽」是三個含金量好高的字，具武林高手決戰光明頂的氣勢。11月5日敏怡穿起代表香港的制服，參加在泰國清邁的世界山徑越野跑錦標賽 (World Mountain and Trail Running Championships WMTRC)。「香港代表」這四個字在這日和敏怡聯起上來，結果發生了一次神奇的旅程，一次自我的發現，同有一個人好激動!

香港代表隊 – 80公里組 (攀升4800m) 有黃浩聰、 張敏怡和梁影雪；40公里組 (攀升2400m) 有阿歹 (謝覺偉) 和怪獸 (曾福祥)，11月5日順利完成泰國的世錦賽。11月7日早上收到敏怡 whatsapp:

「我返左嚟啦，阿孫你係唔係度?」
(乜野料，我雖然係樂悠咭持有人，但仲行得走得，冇咁快唔係度囉!)

隔住個 mon 都 feel 到那種小朋友第一次去迪士尼樂園級數的興奮，搞到我真係有少少想快啲聽下佢係泰國的經歷。

8號晚，敏怡剛剛在柏架山操完落番嚟，背心短褲，頭髮一貫的少許凌亂，笑容一貫的燦爛，雙腳一貫的修長，(如果有一隻蟻，由佢四頭走到落去腳趾，應該屬於蟻界的一場超馬)。

一班人一路食住煲仔飯，一路飲敏怡由泰國帶回來的酒，一路聽她的激動。

世錦賽前傳

「參加選拔賽 (香港山路錦標賽2022) 前，山賽都是虛擬，我冇玩，可能太耐冇賽事，狀態好低迷，冇動力，自己完全迫唔到自己練，主要係跟班 friend 玩下，hea 跑，衝柏架山道，強度低。」 (大家用困惑的眼神互望，衝柏架山道，強度低?)

「選拔賽當日落到場，女子組主要係我、影雪和美欣鬥，上八仙嶺果啲 technical 路段我或者有少許優勢，但在較平坦的路況，就是影雪的天下，好快連尾燈都見唔到。影雪好勇猛好有鬥心，好想爭取代表香港的機會。我同佢前前後後數次，當有人鎅左影雪，佢好 determined 要追番。不過當影雪過咗我，我就係算把啦，我認輸!」跟住大笑，鬥心指數係綠色: 極低。

「聽你啲語氣，好似呢場世錦賽對你唔係有好大意義?」
「都可以咁講，其實80K的賽事唔係我嘅戰場，我係想玩100K，或者100 miles 的長途賽。我只當係參加「泰國By UTMB®超级越野賽」(12月8-11日舉行) 前的一場適應賽事。」

「你冇乜嘢香港情懷、為港爭光的心態咩?」
「又真係唔係咁強囉!」又狂笑一輪。(死啦，田總會唔會覺得有啲伏?)

「在50K的選拔賽後段我發現自己跌速好多，根本冇力去追，發現自己耐力唔夠，可能太缺乏長課。完咗選拔賽其實只剩四個星期時間就到世錦賽，於是計劃每星期迫自己跑100K。更一口氣參加左雷利 (敏怡是雷利大使) 同 HK50。」
「咁你都唔係咁頹。」
「其實因為有免費位。」

「跑雷利果場，係東洋山我鎅左某男教練 (冇回頭望)，有少少 high，自己鼓勵自己，要 keep 住唔好俾佢過番，於是我跑得好快，終於都 keep 到。其實最開心的是果場後段冇跌速。跟住跑 HK50，全程都keep 到 pacing，感覺狀態慢慢返嚟，兩場都得第一。」敏怡遙遙見到信心的尾燈。

其實敏怡絕不頹，她為了加操，雷利比賽當天她由鰂魚涌家跑去雷利起點 (陽明山莊)，當係加操。完左42K，再操多轉大帽山上落波頂。反映她著重操練多過勝負。

「話晒代表香港，其實都有少少任務嘅!」 (又大笑)

賽前48小時

「因為遲報名，田總原定安排3/11才到泰國，但3號已經是開幕禮，而且冇時間試路，在影雪力爭下，終於可以1號到，2號試左20K，千多攀升，等於走左次 Lantau Two Peaks，但覺得好攰，3號我同聰sir、影雪都唔想再跑，去左動物園睇動物。

夜晚參加開幕禮，泰國方面都幾重視，放左成10分鐘煙花。跟住各國代表持旗出場，我是第一次穿起制服代表香港出賽，由浩聰持旗，出場跟英文字母，跟住香港後面出場是匈牙利，得兩個人，就是 Eszter 同佢老公阿 Paul，見到 Eszter 超興奮，係我超興奮。」

賽前一日 (4號) lunch 我去左同John Ellis、Vlad Ixel (代表澳洲)、Jeff Campbell (代表加拿大)、Eszter 食飯，原來佢地自己 book 另一間 Villa，好鬼正，我哋住大會指定酒店，因為遲報名遲 book，真係弱左少少，令我哋有成抽葡萄。」

「比賽日，開賽前要係 call room 做 gear check，其中一項 mandatory item 是要有件 120gm 的風褸，原來真係磅，我著雷利件風褸，唔夠秤，要暗中加條頭巾至過關。賽道的標誌十分清晣，大會令跑手走到每一條 ribbon 時，必定會見到下一條，唔可能走錯路，這是國際標準。」

決戰光明頂

「係飛機上同聰sir 雪姐討論好唔好用 pole，用 pole 上山係慳到力，但落山又嫌佢阻定。賽道是由起點一開始要走8、9K上1000m，到 CP1 要走兩個大 loop 再返終點，所以會經過3次CP1，可以俾 supporter 進駐，田總派了兩位極富經驗的 supporter 隨隊，好幫到手，我哋可以在那裡drop pole同攞pole，十分方便。

第一次體驗到真正的國際水平，起步先跑一段平路，我開4分半披，但前面果班衝出去跑緊3分幾，好快已經同佢地距離成500米，好痴線。上左1000m到CP1，我排名54，係後半的位置。

跟住走第一個40K大 loop，上到最高是千六米，我決定呢個圈唔用pole，希望加速追近一些。呢段我有啲 high，不停過人，過左之後唔想俾佢追番，而且目標是鎅下一個，好有動力。鎅到男跑手當然開心，但實際對我的排名冇幫助，最想過係女選手，咁至可以提升名次。

呢個大loop 會經過村莊，村民好friendly，小朋友沿途揸國旗打氣，好開心同有氣氛。跟住的 CP 不准supporter到，亦只有簡單的水、能量飲品和生果，選擇不多，但有糯米飯，不過冇芒果，sorry，如果唔係我一定食晒啲芒果。

去到CP3見到 Janet (Janet Ng, ITRA 新一屆主席)，佢話俾我知我排緊40，心裡踏實一點，因總共有八十多位女選手，現在是中游位置，有得交待，而且我有留力，keep  番目前 pacing，覺得好大機會12小時內完成任務。

不過要再追前面的選手好難，他們都是速度較高的。其中有一段好長的 technical 落斜，見到前面有幾位外籍男跑手，於是立志鎅佢地，過左之後佢地好似唔係好忿氣，狂追住我，好彩最後都成功拋離左。Yeah!

跟住要走最後一個20K細 loop，首先喪落10K似柏架山道的路況，再走6K上1000m，超斜勁難捱，呢次用 pole 至搞得掂。沿途冇女跑手，即係名次冇進帳，只得一個鬼佬沿途追過我，算把啦!

最後一次到CP1，我的名次約是35，用了約8.5小時，剩下12K，主要是落斜，覺得可以舒舒服服完成。落坡是我較強的優勢，連鎅了幾位女跑手，去到後段上埋最後一個200米既山仔，就係全落斜，個心雄起來，起勁跑，怎知跣了一下向前仆倒，手腳都流血，但看見前面不遠有個女仔，我用左10秒立即彈起身，追。

其實開始有少少痛，不過慢慢習慣了。最後要繞湖跑一段平路回終點，在我前面有一位穿綠色衫的女跑手，我好想衝線前鎅埋佢。佢明顯唔想被我追到，佢開4分半披，我跟到喘晒氣，超攰。心諗算把啦，都係過唔到。

還剩約400米衝線，見佢慢下來，機會嚟啦，我用盡氣力好似跑 anaerobic 一百米咁，終於超前左。向著前面個拱門衝，這時候突然阿歹閃出來，俾支區旗我，我冇理佢，因為綠衫女跑手就在我後面幾米，唔可以有任何分心俾佢鎅番。

原來過了此拱門，還有另一拱門才是真正終點，真磨人。去到最後一百米時超爆，此時阿歹又再塞枝區旗俾我，我成手鮮血攞住，擺上頭頂，隨風飄揚，大步跨過終點的線，成為第31名女子完賽，好激動！

跟住我就瞓左係地上好耐，綠衫女仔都有過來慰問，原來她是葡萄牙跑手，十分 nice，其實佢後段是好輕鬆跑。(佢心諗：你搞乜鬼，博晒命，流晒血，爭第31同32名?)

我以9小時57分49秒完成，比我預計的快了兩小時，我未試過80K可以sub-10，有12.x EP，ITRA 有680分，是歷來最高。以往都只是620至640之間。所以好激動 (咁易激動)。

我要特別提提，我好欣賞雪姐的意志力，其實係 CP1 已經聽到雪姐拉傷了，但係佢好堅持，處理到自己的傷患，後段佢已經可以跑得番自己嘅速度，唔係咁易做到。另一方面又諗，雪姐傷左，代表香港的重擔好像落了在我身上。」

The magic of「香港代表」

「敏怡，聽你講一個咁激動咁熱血的比賽，好似同平時係香港山賽見到嘅你，都幾大唔同?」

「係呀，係香港我係享受比賽，可以自由自在，無拘無束奔跑，完左可以同班 friend 吹水、玩，名次唔係我最重要追求，因為又不是全部勁人都落場砌，名次唔代表乜野。

但係代表香港參加世錦賽時，有兩個感覺好特別好新鮮，第一係世錦賽我快極都只係中游位置，我係香港好少係呢啲位置跑 (此時花生友起哄，想爆佢樽)，發覺好正，可以真正跑自己 pacing，沒有很大壓力，但加速又可以鎅下前面，好開心。

第二，係有香港代表的心態，最後我同葡萄牙跑手鬥時，如果係我個人名義的比賽，我一定唔會追，算啦，鎅左佢為乜。但果刻我堅唔想全香港人睇住我最尾都慢人少少，唔去追，好樣衰。我想像到如果最後我係 hea 跑，果啲 sportXXXX、FXXX…..係會點寫。」(大家都笑翻了)

「我果刻覺得作為一個香港人真係要爭氣啲!」跟住我哋全部人都不約而同一齊嗌左出嚟:「我哋唔係垃圾!」好鬼激動真係!

香港代表，我哋有敏怡!

彩蛋

敏怡說參加選拔賽時，遲左交報名費，險些報唔到名 (語調又有少少激動)。

「呢啲會唔會係由性格走出嚟嘅經常事情?」我一貫的 mean。我看見她身旁的花生友在狂點頭，跟住敏怡反了他們白眼!

附: 世界山徑越野跑錦標賽 80公里組別地圖