樂仔: 人生翻盤的故事 | 專訪 Translantau 140 港一廖科樂與命運對賭

如果有條友又爛賭又打交又讀唔成書又紋晒身咁，吓，仲要成30幾歲人? 你會話: 咁玩完啦! 佢唔一定係壞人，但一定唔會有乜成就囉計世俗話 (其實關有紋身乜嘢事)。

你咪理，有一日，佢係 Translantau140 (128K)，以20小時29分完賽，港一，總排名第九，只慢 Jeff Campbell 3分鐘衝線 (Jeff Campbell 喎)。仲有，佢有能力戒晒以前的陋習，全職走進另一個專門對付自己的世界 – 越野跑。

新進的越野跑手廖科樂，是個人生翻盤的故事。

(樂仔約我在和宜合道運動場集合，跟住去城門水塘，他的街坊場做訪問，我問應該係大窩口定葵興地鐵去較方便? 他說不如去葵興地鐵接我，咁體貼，先加兩分。)

脫軌少年

要成為一位邊青，必須要具備中三或之前離校學歷，食煙飲酒、爛賭、紋身、爛蒲、同屋企反晒枱水火不容、會做飲食業、間唔中當然要同人開片 (點解打交?「望乜嘢”o靚”仔」– 就係原因)，樂仔是個完美樣本。

我們約地鐵站集合，樂仔準時出現，見到我即時雙手合十打招呼:「早晨孫生。」站在我前面是位溫文有禮的年青人，修長身形，樣貌有點馬浚偉 feel，一身S記整齊校服，髮型修剪熨貼，仲要談話全程未碌過手機冇加任何粗體語 (追加3分)，現在的樂仔是陽光青年的樣本。

「以前讀書我冇心機上堂，得英文同中史 (全班第二) 好少少，其他科唔掂，中三我決定唔讀，無謂浪費光陰。阿媽冇乜壓力俾我。老豆好少出聲，一出聲就鬧得好甘，阿哥又好唔妥我。所以唔想返屋企，試過幾次搬出去同 friend 住。」典型邊青劇情。

「阿媽叫我去她的美容院幫手，其實冇興趣做，跟住去間日本壽司餐廳由”o靚”做起。後來轉去一間中環會所返工，算安定下來，一年內升左三級，做到師傅仔，叫做有啲”o靚”係我下面。」

「點解老細會咁賞識你?」
「可能因為我做嘢快又唔計較，對自己做嘅嘢有要求，有啲食材要切到頭髮絲咁幼。」又睇唔出這位又邊又廢青做事咁認真。

賭神的墮落

放工去賭錢是飲食業的普遍文化，「乜都賭，賭馬賭波，主要玩排九。佢哋玩得好大，一晚可以上落十幾萬，我就一萬幾千。」

「賭有乜咁吸引?」
「我第一次跟friend 過澳門，見佢一路贏錢，買乜開乜，由500贏到6千，覺得原來搵錢可以好易。」

「有時我哋玩百家樂會親自睇牌，試過連贏十鋪八鋪， 後面啲人跟住買跟住嗌，一反牌就中，全部人一齊起哄鼓掌，一齊收錢，high 爆。有時明明連續幾鋪紅，自己買個藍，都中，感覺好似神一樣，掌握著眾人的命運，好型好英。」明嘅，大家活係食物鏈最低層，有幾何做到神。

這是沉迷賭博的 Chapter 1。

Chapter 2 是這樣的:
「後期買馬賭波，試過上半場買巴塞5000，睇形勢唔理想，於是再買5000下半場平，一場波落一萬蚊注，果時我人工只得二萬幾，好癲。」

「有次出糧，自己一個人去永利賭，輸左兩萬，超唔開心，成個禮拜冇出過聲，但後來就麻木，輸錢冇乜感覺。」

「有一次同個 friend 每人帶兩萬蚊過澳門玩百家樂，諗住贏幾千就走，點知半個鐘內買乜都輸，一次都未贏過，好快輸晒兩萬。好唔甘心，冇理由半個鐘就走。」

「我哋繼續賭，當然繼續輸，輸到慌，唔敢自己落注，要搵賭場的鎗手幫我哋落，輸贏唔關佢哋事，贏左會收取茶錢。佢哋可以冷靜分析，捉下路。結果都係輸，到天光我輸左十幾萬，差不多是全副身家。好大打擊。」

「賭仔心態是贏就計，輸就唔計。賭錢會發達? 果個一定唔係你。永遠都係贏錢唔願走，最終一定輸埋。」雖然好公民教育，但由過來人講，有說服力。

「有冇問人借錢。」
「冇，因為還唔到，都係輸自己錢。」算佢識諗。

賭神的醒覺

幸好還有 Chapter 3 – 「點解突然會有醒覺要戒賭戒煙，係乜嘢引發?」
「好多時我哋輸左錢都會走入煙房食煙，其實入得煙房都係輸錢果班，因為贏錢你唔會行開。裡面大家都係愁眉苦臉，有時諗，為乜要咁?」

「有一晚放工，覺得好無聊，見到兩個人跑步，好似好有目標咁，心諗都可以試下跑。於是去『運動家』幾舊水買左對 Nike 跑鞋，第二日仲晒俾同事睇，覺得有少少型。」

「以前好少跑，讀書時試過跑1,500米，全場最慢返嚟，跑完瞓係草地，超辛苦。」現在樂仔的10K時間是37:26，全馬是3:05，仲要話唔係咁理想，應該要做好啲，絕對係要推佢落樓系列。

「食煙飲酒賭錢有朋友，但跑步冇朋友，你可以做到?」
「係呀，食飯時佢哋食煙飲酒，我自己會坐開另一面，初頭有少少壓力。但果刻好想改變，唔想一世都係都咁生活。佢哋問我點解坐開，我話飽。過得一兩個星期，大家又習慣適應左。」

「頭幾次出青公跑步，俾到好實在的感覺，無壓力，好開心。」
「以前試過戒煙，斷斷續續都戒唔到，今次好有決心，打開locker見到有成條煙，二話不說，送左俾同事，從此再冇食過。」跑步的救贖，真係咁神奇?

踩入跑界

「係網上見到有個大嶼山21K的山賽，我每次跑步都係10K，覺得21K唔會有問題。唔知原來山賽要上山，去到大東山，見到芒草和連綿不絕的山坡，覺得好正好舒服。見到前面的跑手行都快過我跑，唔明點解上斜上樓梯可以跑。由大東落南山兩隻腳都抽晒筋，四野無人，要自己解決，好辛苦，至知越野跑原來是這樣的。」

「跟住在印尼和沙巴神山玩左兩個100K山賽，當為旅遊活動，因為唔洗自己計劃，大會安排晒。」將100K比賽當旅遊項目，cool喎!

「2018年參加 Translantau 100，衝番終點時 (16:09)，見到 supporter 都在拍掌，原來得到第五，是人生首次上台領獎，也是第一次嘗試到好實在的成功滋味。我去澳門賭錢，贏錢時的快感會好快消失，下一鋪已經冇左。當勝出比賽，好多事情都值得回味。但你唔會回味賭錢時曾經摸左隻煙屎返嚟。」

冷知識 – 樂仔經常掛在口邊的實在感，是正向心理學家 Seligman, M. E. P. (2002)說較高層次的快樂(good life)，是認識和發揮個人的才能和美德 (signature strengths)，透過努力和挑戰而獲得成果，才是真正的滿足，此種快樂是持久和經得起挫折，非單純物質或享樂 (pleasant life)可以比擬。

在山賽中認識了 Jacky Leung 梁俊強，2018年S記贊助的 Jacky 毅行隊欠一位隊員，於是他邀請樂仔加入，其他還有 Jeremy Ritcey 和 Max Lau，都是江湖中一等一高手。「點解佢會搵你?」「可能佢見我成身S記掛，但其實果時我冇贊助，只不過自己喜歡成身穿同一牌子的裝備，覺得好似好型咁。」其實唔係裝備型，係你 carry 到型。

結果他們以13小時31分跑第五。「對於我來說，那次毅行是一場啟蒙的賽事，Jacky 經驗豐富，從他身上學識好多越野跑的知識和策略，點樣補給、控制 pacing、編 schedule、準備食物等。跟住 Jacky 就推薦我入S記。」

2019年樂仔參加 UTMB，「我睇 youtube 見到 UTMB 跑手又頭燈又成身裝備，埋CP會換鞋，超型，好似F1埋站換車呔咁緊張，我又好想換下鞋，睇片見到衝線條跑道堆滿人群在歡呼打氣，勁震撼，覺得成件事好夢幻。」畢竟樂仔都係個後生仔，追型尋high。

樂仔說起步時的情境，與他看 youtube 片的一模一樣，氣氛熱爆。結果他以31小時13分衝線，可惜那時是深夜，終點只有寥寥幾位工作人員在迎接，有點失望。

2020年的 HK100 他原本想做時間，怎知起初開得太快，去到基維爾已經抽筋，冇乜鬥志，「去到畢架山見到 KFC，他對我說怪獸 (曾福祥) 只係你前面3分鐘，心諗有得追，成段都諗起呢句說話。又有番戰意。奮力去追，不過去到終點都未見過怪獸。結果以12:51完賽，慢怪獸6、7分鐘。」我懷疑KFC對每個跑手都講同一番說話。

決戰大嶼成為港一

「Translantau 140 你有冇原定的目標時間同大概位置?」
「都有，我估計19小時，希望守在10名內。一開始覺得跑手好快，完全望唔到第一同第二集團，不過我keep番自己 pacing。」

「第一個灣我俾敏怡過左，上山時我輕輕過番佢，我同佢互相鎅過3、4次，果時質疑自己是否真的太慢。」真chill，俾敏怡鎅左會質疑自己跑得慢，我要記低呢句攞嚟用。

「第二次過大佛時約70K，身體出現狀況，開始嘔，又頭暈，食不下東西，可能有些反胃。Supporter 叫下一站的人俾多啲鼓勵我，因我果時精神好恍惚。」

「我係好多個CP都見到戰神 (楊志成)，佢先到先走。去到尾二個 CP 東涌 (約100K) 又見到佢，叮左一聲，個心定下來，即係自己沒有落後太多。我哋一齊出 CP，戰神狀態唔錯，好多嘢講，我就超攰，講唔到嘢。」

「戰神同我講，樂仔，我上山先 (黃龍坑)，你落山快，一陣你追番我。」
「我有好強信念要跑入頭10，果時我剛好守在第10名，如果有一個跑手從後趕上來就會失敗。我同自己講，一定要追到戰神，唔跑得嘅都要跑，我要利用落山較強的優勢去追。」突然間戰雲密佈。

「去到愉景灣最後一個 CP (下午5時06分，距離終點9.5K)，死，唔見戰神，工作人員同我講戰神早我5分鐘離開。果時我記得追怪獸果3分鐘我都追唔到，而且戰神上山好強，我信心唔係好大，但都要力拼。」

「Jeff Campbell 快我15分鐘到愉景灣，我仍然係排第10。Supporter 俾左粥我食便催促我上路，go、go、go!」

「我一出愉景灣有條好直嘅行人路，我試下快跑，感覺返番嚟。上水塘條大斜路照跑。過水塘之後入林，山徑好窄好 technical，我加速，見到戰神，佢話Jeff係前面，你追佢啦。」

「果時我鬥志好高，想知有冇可能追到，差不多每10分鐘食一包gel，奮力去跑，唔開頭燈，免得後面的跑手見到我。」原來這段路樂仔開4分披，係跑了100K之後的速度，好癲。結果以第九名20小時29分衝線，只慢Jeff 3分鐘，成為港一，亦開闊了樂仔的前路。

事業急轉彎

疫情期間，世界停頓，食肆生意慘淡，樂仔膽粗粗開展網上生意，販賣蜥蝪爬虫和南美洲曱甴，「那時留家的時間大增，飼養爬虫好受歡迎，一個月賣出九條，後來更自行繁殖蜥蝪的昆蟲食糧。」樂仔的變速能力好高。

返一份工和經營一門生意，令樂仔的操練時間大減，比賽成績不理想，狀態不佳，頗為困擾。適值移民潮，先後有教練和 Jacky Leung 邀請他在運動界發展和教班。「我心諗傻咩，我而家咁穩定，冇理由轉去一個前景充滿不明朗的世界，而且要返工根本冇時間做。」

「到了今年年頭，Nicole (賽事搞手) 問我有冇興趣合作經營健身和教班的業務，我要辭去飲食業的工作全時間投入，那時我已晉升至二廚，人工不俗，而且好有機會幾年間做到大廚，轉去運動界卻是自己的興趣，而且一直都好想知道自己的實力可以去得幾遠。」那期間經常心裡面有兩把聲音在搶咪。

處於人生交义點的樂仔，詢問了幾個 friend 的意見，決定去馬，「其實當我拒絕了 Jacky 時，我同自己講，如果再有第三個人叫我去運動界發展，我要相信和接受這是命運的招手。結果真的出現了第三者Nicole。」

樂仔知道自己教班是由零開始，要開2分披去追，他專研 pose method，考證書 (Pose Method Running Technique Specialist (Certified))，買了很多有關的書，觀看了百多條教學片段，全是英文的影片，他 cap 了數百張圖，跟 subtitle 查字典翻成中文。

「阿媽見到我而家成日睇書，print 好多紙，又用螢光筆劃重點又盛，覺得好奇怪，唔明點解當初決定唔讀書。」應該連樂仔都係咁問自己。

「樂仔，前面條路點走?」
「短期我想做好嚟緊嘅 HK100，想再玩 UTMB，期待有明顯的進步。更希望全馬做到 sub -，因為我覺得是基本要求。明年初還有大挑戰，要加緊操練，好想知道自己的實力是否可以應付到。」stay tuned，留意season II。

人生翻盤，真的可以嗎？

都30幾歲，人生劇本仲有得由頭嚟過？樂仔嘗試唔認命，來個絕地反擊，高速從後趕上來，就好似佢係最後一個CP，仲可以開4分披，超戰神趕Jeff。樂仔的人生急轉彎，表面好像是一場賭博，拿青春賭明天，冇人知今次開大定開小，洗唔洗再入去煙房撫傷。

「係香港做全職跑步，別人會覺得痴線咩? 我而家未做出成績，又冇一份叫做正職定期有糧出。總有少少腳步浮浮嘅感覺，間唔中有聲音叫自己回頭返去啦，都幾煎熬! 不過我會俾多幾年時間去闖。」令我諗起同路人還有阿歹、怪獸、KC等，好需要大家的支持同鼓勵。

雖然都腳步浮浮，但做過嘅長課、流過嘅汗、抽過嘅筋、爆過嘅肺、登過嘅鳳頂、磨過嘅意志，上過嘅凸台…..，一切一切都係好踏實，長存身上，永藏心中，冇得輸。

人生翻盤，痴線咩？又係KFC出場嘅時間:「未試過唔好話唔得!」樂仔，聽到未?

彩蛋

同樂仔行完水塘一周，在小巴站上面的茶水店飲野吹水。問起佢身上面的紋身。右手臂有一單色的圖案，黑黑沉沉的。另一個在大脾，是一位色彩斑斕的美貌女士。

「呢兩個係紀念兩段已逝去的戀情。」
「傷嗎？」明知故問。
「都….都….都….都…都傷呀。」「都」左五次至講到，都知有幾傷啦。

頸上面有另一個完全唔同感覺的公仔，「呢個代表我開心的心情，有啤酒，有卡樂B、有火箭。紋係頸上面，想俾人見到我開心的一面。」見到一個童真的樂仔。

「咁而家有冇拍拖？」硬係要返番去問啲膚淺八掛嘢，咁你想唔想知先?
「冇啦，而家咁忙。」大家留意番，呢個係貨架上的靚仔筍盤，應該唔放得好耐。
「但係拍拖應該幾開心，而且係精神之柱。」再入位。
「唔洗啦，而家想專心跑步，開心唔開心都會去跑，又可以減壓，跑步能醫百病。」

樂仔突然說:「孫生，我見到有架小巴埋站。」
收到，樂仔明顯唔想繼續答埋啲又離題又低能嘅問題。

坐在小巴等開車，窗外見到樂仔已除下風褸，如風向主壩奔去。