從前，有一位廿歲出頭的小鮮肉，自卑、自閉、怕社交、唔敢向人say no，好驚表達意見，覺得自己冇樣掂，眼神閃縮 (我想像的)、毒性高。有一日，見到中大校外進修部 (以前的名稱) 竟然有呢個course -「自信心提升班」- 好難得連工聯會都冇嘅課程，於是立即填表申請。又有一日，這位青年人站在舞台穿上戲服做話劇 (不是扮石頭，有對白的)、唱歌，做電影演員 (「踏血尋梅」飾演交通警)，打破毅行紀錄，開跑班做教練、創辦火車站體育文化天地、搞戲劇工作坊。成件事，好周星馳，十分喜劇之王。
這是個毒男變火車的故事。
來到2023年，已是火車sir的林成業 Thomas，約我由藍田上五桂山做專訪，是他的街坊線。過了五桂山，聽見我呼吸聲愈來愈大，一條問題要分幾次至問完，接近W026時，他知道唔可以對我有什麼寄望，說:「阿孫，呢度轉右會去茅湖山將軍澳，左轉去馬游塘井欄樹，都可以坐低傾，你想去邊?」聽見小息鐘聲當然開心，記得井欄樹有間好有風味的茶記，於是提議向清水灣道進發。
(期間經過狹窄的山徑和行人道(翠琳路段)，不能二人並肩同行時，火車sir在前頭帶路，總是走在一旁，讓出中間較寬敞的路徑給我行，間中還會回頭保持眼神的交流，令我不是對著他的背脊說話，這自然流露的舉動，背後是一份修養和人情世故。)
跑出來的高速火車
火車第一個10K是參加1998的渣馬，在未啟用的新機場跑道舉行，相信是歷史唯一的一次，好珍貴。1999玩第一個山賽已是100K的毅行者，30多小時完成，這個時間已經令他懷疑人生，不過覺得好好玩。初馬是2003年的渣馬，4:39，之後兩年的成績分別是3:59和3:30，進步神速。經過有系統的訓練，後來火車全馬的PB是2:46，2008年馬拉松香港排名第10，半馬1:17，2010年馬拉松香港排名第8，10K是35分。相對同輩，火車發現自己原來有一樣特異功能，就係跑得快，自信心返晒嚟。
同時亦反映火車十分著重路跑的訓練:「要提升越野跑水平，追近國際水平，必須要從根本的路速開始，內地越野跑選手的全馬時間好多都是2:30左右。」記得訪問KK sir和怪獸仔，都說越野跑手需要努力提升路跑速度，越野界新進高手兼香港代表阿歹 (謝覺偉) 在11月5日的紐馬跑出2:30 (PB是2:29)。這份漫長艱辛的苦工，越野跑手不能缺課。
原來火車初期都玩過三鐵，是奧運距離，1.5公里游泳、40公里單車、10公里跑步。「我玩三鐵果陣鷹鷹 (曾進傑) 都未出道。」跟著主要是參加路跑和山賽，在玩RTI (Round The Island，其中一項標誌性的經典香港越野賽)時，火車、鷹鷹、楚健 (羅楚健)、五金四人經常互相陪跑(賽事容許)，並決定組成UFO參加團隊組別。
很多外星級的越野跑手，都朝著超馬的方向去追，即係愈跑愈長，愈跑愈瘋狂。也包括在我身邊這列瘋狂火車。他完成了四徑 (55小時32分)，無數次的毅行、玩了兩次UTMB 170K和HK168、橫越台灣246K、國際雷利旋風156k、UTMF 170k、24小時耐力賽走了205k，PTL (UTMB 系列) 311K…..，你只能在「失智」或「變態」中選一個來形容。
三場不能忘懷的賽事
「246K的『橫越台灣』是其中一項難忘的賽事，由東向西劏過台灣，用了42小時，當中絕大部份是馬路，是我首次跑咁長，要跑上3276m的武嶺，而且接近零度，好辛苦好凍。不過途經的義工和市民十分熱情，會問跑手飲唔飲熱湯，感到濃濃的人氣和溫度。可惜今年開始因路線太危險已不再舉行。」
「另一場是2015年的毅行，我哋四個UFO成員都分別試過12小時多少少完成，好想以UFO挑戰12小時內，2013和2014都嘗試失敗，2015第三次再闖，當日天氣炎熱，成27、28度，大家信心不大。」但係佢哋好大決心，記得訪問鷹鷹時，他說為了節省時間，四個人要一齊小便。結果11小時58分衝線，破了華人隊伍最快時間，燃燒青春，留下歷史的一刻。
說到最令腎上腺素標升的，一定是今年UTMB系列賽的PTL，全長311K，爬升25267m，跨越法國、意大利及瑞士的阿爾卑斯山山脈，火車、楚健和鷹鷹組隊參加，行了6日5夜133小時46分，其間睡了11小時20分，即係122小時都在行走，係乜嘢玩法? 112隊參加，55隊DNF，57隊完賽，他們第28隊完成，仲有呼吸。
「我係第二次玩，今年天氣特別惡劣，一開始已遇上大風雪，積雪8、9吋，又甩皮又凍僵，經常PK跣低。最出事的是大會GPX有大幅偏差，我肯定佢地冇實際行過，只係跟地圖繪製，其實山徑已經湮沒很久，冇路可走，甚至帶你去到懸崖邊沿，失足會粉身碎骨，令個人好tense，好虛脫，超越極限，榨光了最後一滴體力，有諗過冇命返嚟，我唔推薦參加。」就算係生意失敗、失戀或失智都唔好去。
「你玩過咁多超馬，嚟緊仲有乜嘢賽事會令你想去挑戰?」
「我都想試下浩聰早前參加的巨人之旅Tor des Geants，賽事系列除了TOR330 (330K)，仲有TOR450(450K)，我都有興趣，不過要先完成了TOR330才可以報名。」
「另外都想玩一次係台北舉行嘅48小時倉鼠跑 (即係48小時內放題任跑最長的距離)，據我所知香港只有4個人玩過，3個人完成，包括邦邦 (羅啟邦) 同楚健，楚健跑左340幾K。我四徑用了55小時走298K，但四徑攀升14,500米，所以我諗我可以做到。」玩過四徑嘅人，好似解鎖了一道心理屏障，覺得塵世間再沒有不可能完成的賽道。
「你點克服48小時咁重複沉悶嘅機械活動?」
「我係香港玩過幾次24小時倉鼠跑，其實冇想像中咁悶，時間好快過。跑果陣要不停計數，如果目標跑200公里，每個鐘要跑幾多，瞓覺唔好可以超過幾多，幾點鐘要食嘢，幾點鐘有邊個friend嚟輪流support、陪跑，似社交活動，好鬼高興。」講到好好玩咁，每次聽呢啲外星人描述賽程，都要保持頭腦清醒，知道自己仲係地球生活緊，地球是有地心吸力的。
火車的大佬風格
「2012年我考了個田徑教練牌 (火車有超多牌/證書，自己睇 教練介紹 – 火車站體育文化天地，去珠寶玉石廠商會 (亦是火車現職的行業) 開班教跑步，陸續好多非業界朋友問可唔可以嚟上堂，於是我決定自己開班，到現在有6班路跑、兩班越野、一班體能，共九班，我自己教兩班路跑，另一班越野是輪流教。」又教班又返工又話劇又超馬又寫文，要開好多列火車。
「教練是一班的大佬，你點形容自己的領導風格? 你啲同學背後點講你?」
「佢哋呀? 佢哋會覺得我係比較溫純，唔係魔鬼教練果種。有啲同學會私下同我講俾佢哋啲program要嚴厲哋，否則同學會怕辛苦跟唔足。」
「有說嚴師出高徒，你點睇?」
「我會俾功課同學做，check下佢哋做成點，會指出邊個位揸流灘，要改善，都會有壓力。」相信都係好斯文好溫柔的溫馨提示。
「可能係乜嘢學生跟乜嘢教練，我覺得我哋學生都係斯文淡定。如果個教練有紋身，學生之中也會有些紋身的；有些跑會跑完去飲啤酒講粗口，咁會一班喜歡呢種風格的學生參加。」我沉思緊試跑員X號應該去邊個跑會?
>
「你本性溫純，會唔會對自己的要求都係咁soft? 你點迫自己嚴守紀律?」
「我會將要達成的目標要做的功課寫出嚟，會跟足做，逐樣去達成。要有成績必須做功課。慢慢會養成習慣，痛苦就會減低。有些人說玩長跑好辛苦，但唔辛苦有乜好玩!」相信這便是成魔之道。
「想過程開心啲，可以同一班人一起操，會起到互相激勵互相迫害的效果，一個人跑得短，一班人跑得遠，我都係咁樣建議同學去克服艱苦的操練。」這是要交學費去上跑班的原因，那裡你迫害人，人亦能迫害你，進步，原沒有半點偏心。
戲劇世界改變了火車軌道
「我係唔覺意闖入戲劇世界，不小心參加左工聯會一個戲劇班 (工聯會課程包羅萬有，是人才搖籃，政府應該係呢度搶人才)，認識了一班志同道合的人，約2000年有一個大型的舞台劇，由灣仔劇團製作，話劇界著名導演何偉龍執導 (已辭世)，需要casting好多臨記路人甲等。記得是我的第一部喜劇，扮李澤楷。」
「做戲劇好似做了幾世人，在劇中明明已經死了，又可以翻生出來謝幕，跟住又進入另一角色的世界，體驗過不同的人生，過程好有滿足感。」
「你除了工作，其餘的時間唔係跑步就係戲劇，呢項投資你得到什麼回報? 係唔係有好高的生命性價比?」
「我都係第一次聽生命性價比呢樣嘢 (因為我都係第一次講)，我覺得運動同戲劇嘅性價比好高，因為會帶嚟健康、朋友、成就，仲有一份自信，呢啲都係好珍貴。我上台做話劇要面對觀眾鋒利的眼睛，必須拿出勇氣和自信。記得第一次出台，雙腳不停地打震。」唔知食gel有冇用?
「你以前咁缺乏自信，點解會去玩話劇?」
「因為我相信戲劇能夠培養一個人嘅信心，幫助打開自己，係戲劇治療。我舉辦嘅戲劇工作坊，要求報讀者填寫參加的原因，和期望得到什麼，有不少就係寫自信，希望大膽啲。」最近火車監製了一個舞台劇《移民物語 – 我們的故事》，搵了一班青少年在台上講述他們的故事，雖然演技尚待磨鍊，但情感真切，現場十分感人，同時打開他們很多的心結和纏繞。
「我是過來人，以前自信心好低，低到要去中大校外課程報讀提升自信心的course，記得有份功課要寫自己的優點和缺點，我寫自己怕醜、唔敢say no，就算唔合理都唔識得拒絕人，好驚向別人表達意見。我仲買咗好多怎樣尋回自信嘅書。」少年火車雖然無自信，但好上進。
「不過透過運動同戲劇才真正令我改變，因為要迫自己行出去舞台，你就冇得驚。演出唔同角色，有朋友睇完好讚嘗，發現投入了角色之後便無需理會台下觀眾目光，令自己愈來愈大膽，夠膽創作新的元素，向導演提出自己的意見，導演話幾好喎，好開心同有自信。我相信戲劇確可治療。」
「其實我接受咁多次訪問，從未提起過去讀自信心提升班呢件事。」
應該冇人會為意一個具傑出成就而隨和的火車，曾經歷過一段生命的掙扎。其實每個人都會拖著一卡沉重和隱藏的車廂，令速度減慢。不過到了今天，努力上進的火車已過萬重山，他踏著S記跑鞋，開3分披向前方奔去 (S記，如果你哋想送對鞋俾我，可以pm問地址)
彩蛋
與火車係井欄樹「田記茶檔」食完早餐，我跟劇本說：「我請啦，唔好同我爭呀! (有點生硬地)」懂人情世故的火車當然會同我爭，一如既往我慢鏡取出荷包，一如既往爭輸左 (多謝火車)。
跟住我哋過番行人隧道去對面馬路巴士站搭車出彩虹地鐵。上到地面，即見部91M埋緊站，那時距離巴士站約50米，只有幾個人等候上車，我哋必須開3分披追，這麼短的距離火車都輕易抛甩我，去到巴士門口hold住道門，向我展露親切的微笑，等候著5分披的樂悠咭持有者跑過來。
火車你放心，你講過一定要提升路速，我會記住。
- 林成業 – 華文影劇數據平台 (moviecool.asia)
- 【運動情侶 – 越野跑篇】四徑中 Tracy 化身火車之廚娘 二人從戲劇學習相處之道 ｜ 運動筆記HK | hk.running.biji.co
- PTL 2023來稿｜最刺激隊際賽辛苦過四徑 林成業感謝好兄弟同行 (hk01.com)
孫立民 — 年紀大，跑齡短，膝頭痛，根又硬。但照登鳳頂踩蚺蛇。強項是不顧 後果，唔怕樣衰。嘗試把山跑路跑精神，帶到職場管理，有興趣者可 到我的FB專頁跑番轉。
