仁心仁術ER畫面，卸下醫療裝備的Debbie (C位)，就是套上山的越野戰衣 (來自醫管局官網)
敏怡在港島區醫院任骨科醫生，去年參加 Mt Fuji 100mi (100 英哩)，拿下海外大賽的女子總冠軍。Debbie 是九龍某醫院的急症科醫生 (她們在港大相差一年畢業)，承接敏怡的氣場，今年 Mt Fuji 100mi 她是女子全場第八名(港一)，也是雷利的主席，三個身份，三種體會，三份情懷，交織成一個有汗水和淚水的故事。
沒有pole，只有兩包gel，走了一百英哩，還是笑容燦爛
默默走上 Mt Fuji 100mi 的頒獎台
4月24日下午5時，Debbie (蘇潔瑩) 站在 Mt Fuji 100mi 賽道的起跑線，與敏怡不同，賽前 Debbie 沒有牽引眾人的眼球，沒有媒體搶著報導她出入CP的時間，她默默在寒風砭骨的山徑奔馳，走過百哩長路，6613m攀升，衝過終點拱門時，Debbie 按停了手錶，27小時24分，比原定的30小時目標快了不少。
難得連續兩年都有香港女醫生上台，是女生太強，還是醫療界勁？
認識 Debbie 因是跑班同學，謙遜溫文，笑容燦爛，陽光女孩，很難聯想是時刻與時間和生死搏鬥的急症科醫生，更是罕有的本土百英哩的女子跑手，相信這裡一定藏有個前傳。
Fuji 100 出名難報，去年 Debbie 好不容易抽中了70K，後來發現賽期與好友的婚期相撞，糾結了好一陣子，到最後10分鐘Debbie 想 confirm 交報名費，但驚醒日本快香港一小時，報名門已關。當事人是悲劇，旁人往往是喜劇看，人生值得懷疑。
經過去年的蝦碌，今年 Debbie 決定一步到位直接挑戰 100 miles，賽前她參加了由敏怡搞專針對 Fuji100 的訓練班。「敏怡話富士應該易過V162 (在香港唯一100英哩山賽，攀升7744m)，攀升少咗，估計可以快 V162 一至兩個鐘，我當時心中暗喜。」有兩項補充資料：
1) Debbie 的 V162 (100英哩賽事) 時間是 30:45:14，女子全場冠軍。
2) 敏怡十分擅長激勵他人。
Debbie首個 100 miles 賽事 (V162)，輕鬆奪冠，難怪敏怡估她可以27、8個鐘完成 Fuji 100mi
「賽道好多路跑，頭廿K差不多都係較平坦嘅石屎路，代表攀升部份會較集中在後段。大會規定唔准用 pole。落斜部份有啲似清邁 UTMB 賽道，不過冇咁多浮沙碎石。」
默默上路，沒有開電話，不知名次，Debbie只希望30小時內完成
Debbie 雖然說 Fuji 100 的伙食弱，與 V162 的豪裝版補給相差 100K，但欣賞大會對女跑手如廁的安排，起點同頭幾個人流密集啲嘅CP都有女跑手專用嘅廁所，所以只有男跑手要排隊去廁所 (男跑手問: 公平咩？)。
「賽前我同教練 KFC 講希望做30個鐘內，佢話30個鐘應該可以頭十。我就set咗sub 30做目標。」
「比賽期間我冇睇手機，去到最後一個CP (還有18K)，食住好難啃嘅烏冬時，與男友溝通接放學，打開手機才知守住女子第8位。佢話同第7名相差約15分鐘。雖然好攰又咳，不過有 motivation 守住。」
有也是醫生的男友接放學，才是最大的動力跑返終點
「跟住3、4K都係石屎路，我有腳底筋膜炎，長跑腳板會痛。去到最後5K決定食第二包gel (gel是跑班教練賽前俾 Debbie，只在初段食了一包，其他食bar/waffle，醫生不傾向用化武？)。如果冇咗要追前面嘅動力，呢5K我一定會慢慢行返去。」最後跑出耀眼的成績。
完賽後的meme 時間
從低谷中走出來
Debbie 2016年畢業實習後在急症室任職，該部門與毅行者合作，派護士與醫療輔助隊合作在CP做醫療支援。
----- 廣告 Ad -----
「我2017年參加毅行，同敏怡組隊，因為佢之前 training 都做過急症室半年。我哋4個人都係第一次玩，用咗28.5小時完成，明顯係敏怡遷就我哋。」兩位女醫生亦同時開展了各自的越野之路。
2017年 Debbie 同敏怡第一次組隊玩毅行者，老套啲講，青春可人
「我2020年加入跑會， 上咗幾堂已經見到自己有進步 (咁樣講嘢，應獲減免學費)。可惜沒多久就要專心應付急症專科考試，只好暫時放低跑山。」
「2022年完成專科試，重新操番，但發現力不從心，一段長時間不在狀態，想過係唔係要放棄？」應該止蝕離場定死守博反彈？一係問AI，一係就交俾命運決定。
「去年因跑班女一受傷，教練邀請我組隊玩毅行。目標大約做14個半鐘，係好大嘅動力去推動自己。」
「咁啱2025上半年被借調往衛生署衛生防護中心工作，返九五工，可以定期返跑班。」不幸後來因大埔宏福苑火災毅行者取消，不知命運在做嘢定玩嘢。
Debbie 開始好勤力上跑班，參加長中、短途比賽，成績亮麗，包括V162（100 miles) 女子第一，UTMB Malaysia 100K 女子第三名，取得直入CCC入場券（可 upgrade 至 UTMB 的光明頂 )，今年往法國朝聖，是值得留意的黑馬。
雷利的守護天使
雷利衛徑長征 Raleigh Challenge始創於2000年，是衛徑的 signature race。但是一個被塵封了的老牌山賽，開始感覺呼吸微弱。Debbie 是現任雷利幹事會主席，她在大學時參與雷利的青年歷險計劃，拉開了世界之窗的一幕布簾，把陽光和視野，跨越海洋和民族，射進心靈。Debbie 深懷這份啟蒙之情，大學四年級時她沒有住 Hall 沒有上莊，一心參與雷利搞活動和參加越野賽。與雷利一起走過漫長的高山低谷。
雷利的價值觀，都在蘇主席身上體驗出來
「我2012年第一次搞雷利衛徑長征，有千三人參加，舊年只有3百多。」當年是一眾越野跑手引頸以待的少林寺，現時起步的拱門冷清寥寂。
每年的雷利 Debbie 都包攬很多工作上身，做物流、搵贊助、掛絲帶等。大清晨5點幾她已經到起點set up，黃昏時又在城門主霸的終點出現打點，等候零落的跑手衝線。入黑後，在寧靜的水塘旁她仍忙於安排頒獎，「請男子50+組別第三名XXX上台…..」沙啞的聲音劃破夜空，卻聽不到迴響。
集主席、義工、掛標、物流、司儀、公關、阿四於一身，雷利物盡其用，循環再用
「作為賽事搞手我有啲心痛同可惜，我諗可能是愈來愈多本地同國內外嘅賽事競爭，而且我哋亦唔擅長做 marketing 推。有好多嘢真係可以做得好啲。」努力不懈的 Debbie 正向其他賽事搞手取經。
「因為長途賽，CP 開放時間長，物流上 CP 比較難提供冰。前年有人反映冇冰凍可樂，我哋明白香港10月天氣都係超熱，雖然會花不少人力物力，上年CP我哋都堅持增加冰鎮可樂，因受跑手歡迎。我哋團隊有努力籌備，賽事補級、CP set up、完賽紀念品都有擺心機改善，但 turn out 參加人數未如理想….。搞雷利確實令我感到 burnout，有種讀書定工作都未遇過嘅無力感。」Debbie有些哽咽。
「呢個係香港其中一個最歷史悠久嘅山賽，超過20年，係好多年資較長嘅跑手嘅集體回憶，亦都係雷利嘅重要象徵。今時今日香港，好似咩都好容易消失，要保留有歷史價值嘅東西唔容易，我哋更加要堅持，好好留住佢。」
「我哋亦都有反思，點樣令到佢嘅價值唔好淨係流於歷史。希望令到個賽事，老土啲講，可以與時並進，提升跑手嘅整體體驗。」Debbie突然主席上身。
一班仆心仆命的義工們，保育著一項越野跑的集體回憶，致敬
在 ICU 的雷利，Debbie 說今年會有重大改革，希望以一個新面貌同大家見面。且看這位雷利守護者和急症科醫生如何施救，祝願廿年的老牌賽事能重獲生命氣息。
急症室看生命的脆弱與無奈
「讀大學時我考慮過做骨科或急症科，好多喜歡運動嘅同學都會考慮呢兩科。後來發覺自己對上螺絲鑲鐵釘等唔係好大興趣，所以決定讀急症。急症室工作令我可以接觸更多不同年齡、背景同病況嘅人，冇咁悶，又可以豐富自己嘅閱歷。」
Debbie化表香港急症科醫學院跑步隊出戰渣馬，醫管局冇迫佢跑馬拉松
「有個廿零歲嘅女仔嚟睇急症，話好唔開心，情緒有困擾，瞓唔到覺。第二次嚟急症時媽咪同佢一齊，媽咪其實好錫佢，俾錢佢搬出去住，可以免被家庭糾紛影響。女仔也願意同媽咪去睇精神科醫生，件事好似暫時安頓下來。」
「隔咗一個星期，聽到急救房有個女仔遇上交通意外，情況危殆，不幸後來救唔番。當時我唔係負責醫生，但有走過去望下。我一望病人個名就認得，就係之前那位女孩。後來網上新聞片段睇到，懷疑佢突然故意走出馬路，而佢當日朝早先同媽咪覆診完精神科。箇中原因可能只有佢同屋企人先清楚。媽咪係醫院已經崩潰…….」Debbi e第二次說不出話來。一瞬間，一個念頭，沒了一條生命，之前一切的努力都變得徒然、無奈。
「你做咗近十年急症科醫生，看盡生死一線間，麻木未？」
「未㗎，我記得事發當晚放咗工，心中仍然纏繞住我係唔係可以做好啲做多啲嘅思維。我要出去跑步，至可以平伏心情。」
「我哋急症室都做緊 end of life care 服務，一些臨終重病患者，時間無多，我哋會提供一間獨立房，可以俾家人陪病人最後一程。同時會處方特別藥物減少病人痛苦同癥狀，令佢哋有尊嚴渡過人生最後一段時間。急症醫生一路嘅 training 都係點去救番一個人，反而冇太多教點樣令佢哋更加舒服同安祥嘅離開。呢樣關顧親情需要嘅工作令我覺得好 rewarding。」
於清風吹拂的山徑，在蘇潔瑩身上不單感到蓄勢待發的一股勁，也看見黑夜裡螢火蟲的一點光!
歲月洗刷不去的……係愛呀
