黃浩聰9.10出戰意大利TOR330 330公里巨人之旅:「呢場係我退役之作」

黃浩聰 (聰sir) 將遠赴意大利，出戰9月10日舉行的 TOR330「巨人之旅」，並宣告:「呢場係我退役之作。」

尋「聰」之旅

近日整理今屆 UTMB 選手名單，發現香港有81人參加6個項目，但係名單之中獨缺黃浩聰，於是就send個message問下。

等待聰sir回覆時，發現 The North Face Adventure Team 已公佈聰sir即將參加 TOR330 賽事。於是，電話訪問就以唔參加 UTMB 嘅原因，轉為點解要跑 TOR330，然後就收到聰sir 要「退役」嘅消息。

UTMB做support

問: 點解你唔去 UTMB 呀?
聰: 我都會去 UTMB 呀，不過係做 support。支援參加 TDS 嘅小強 (曾小強 Stone)。亦會支援6位香港選手 (包括敏怡、Angie、滔、Norman、Sunny、俊文)，希望佢哋可以喺30小時之內完賽。

(當時心諗: 做support都係重要，不過 UTMB 明明係越野跑殿堂級盛事，呢個原因似乎不足以係缺席理由。)

TOR330「比賽唔係靠雙腳」

問: 咁點解會參加 TOR330? 香港人對呢場比賽都幾陌生喎……

聰: 其實 TOR330 喺大陸好出名，因為都係300幾公里比賽，佢哋會同香港嘅「四徑」作比較，話「四徑」係窮人比賽，TOR330 係富貴賽事。我決定參加呢項比賽，係覺得佢相當有挑戰性。

背景資料: TOR330 是意大利「巨人之旅」Tor des Géants 大賽其中一項，賽事在意大利阿爾卑斯山 Courmayeur 展開，該處亦是 UTMB CCC 起點。「巨人之旅」共有四個項目，分別為330公里 TOR330、450公里 TOR450，以及130公里及30公里。TOR330 比賽距離約330公里，總爬升24,000米，比賽最高點3,300米，平均比賽海拔約2,700米。

聰: 香港人參加過嘅 TOR330 並唔多，網上搵到嘅賽事資料亦好少，呢個係佢嘅挑戰性之一。再加上比賽要跑上海拔3000米，單係裝備上已經同一般比賽好唔同 (例如要帶冰爪冰斧)……

聰: 呢場 TOR330 我已經籌備咗好耐，覺得好富挑戰。例如我未跑過咁高海拔嘅賽事，補給同裝備亦同其他比賽好唔同。兩年前嘅四徑，我視為係 TOR330 嘅預備賽事。

問: 要玩到冰爪?! 咁你點樣操練呀?
聰: 我操練不足呀! 不過呢項咁艱難嘅比賽，除咗體力之外，仲要靠精神、意志，以及對環境嘅應變。所以話「比賽唔係靠雙腳」，我曾經喺四大極地跑過，希望呢方面嘅經驗可以幫到我。

(資料補充: 2018年聰sir走遍納米比亞、戈壁、智利和南極四站，以三冠一亞的成績獲得「四大極地超馬巡迴賽」的總冠軍，用最快速度跑過了沙漠、叢林、雪地的高山低谷。)

「退役之作」

講到冰爪，講到操練，當大家傾得慶高采烈之際，聰sir失驚無神爆咗句:「呢場係我嘅退役之作」…… 我靜咗幾秒唔識反應。以下係經整理嘅對話，留畀聰sir自己解釋。

「舊年嘅參加泰國UTMB，仲得到第四名，雖然成績唔錯，不過跑到有麻木嘅感覺，覺得無乜衝擊。」

「好似話 UTMB 我已經參加過四次，最好成績得過第六，連四大極地都跑過晒。有時諗，越野跑已經無乜好挑戰。」

「我絕對唔會離開越野跑圈，我期待可以培育更多新血，發掘更多有潛質嘅越野跑手。」

「以後大家都會喺越野跑比賽見到我，不過比賽嘅目的唔係以自己為中心，我希望繼續喺賽事之中鼓勵新一代越野跑手……」

聰sir 仲話，佢每次跑比賽都有一個任務，就係會幫媒體去場地影相攞料，所以會繼續參加比賽繼續做幫手。呢次 TOR330，大家一定要留意聰sir 嘅實地報料。