越南，一個叔叔從未踏足嘅國家，對佢嘅認識僅限於 Pho、越南法包Bánh mì，同由細細個喺油麻地八文樓老趙開始食嘅越南菜。好幾個月前確定參加呢塲 Half Ironman 70.3 已經被告知最難克服嘅係高溫，但叔叔心諗，布吉島咁熱嘅地方我都打過，蜆港應該無問題啩? 有幾熱啫?
人類嘅苦難從來都源於無知與自滿，叔叔今次又親身証實咗一次。!
比賽前個幾兩星期，重感冒加熱咳，夜晚仲發冷，被迫停晒所有練習，條氣依然未暢順番，心肺功能感覺好似回晒塘咁，但既來之則安之，唯有諗住頂得幾多得幾多，真係頂唔順再算。
比賽前兩日飛抵越南蜆港，日正中午，一落機立刻感覺到四個字…..
熱！好鬼熱！
去到酒店會合教練隊友，Check in 攞選手包，砌番架車已經下午五點左右，趁太陽伯伯開始收工氣溫下降同教練出去試車試跑，跟手儘快休息希望養精蓄銳打塲硬仗。不幸嘅事情發生，我隻 Garmin 碼錶明明充滿電，點知完全無反應開唔到，搞咗好耐都唔得，好在練車時發現前方路上 7km (係，三鐵人對距離好敏感，你試下問下玩三鐵嘅朋友，佢應該可以話你知幾多K前面有七仔，幾多K有投注站，每日揸幾多K車返工等等) 有家 Garmin 店，必要時明早去買隻新碼錶。
----- 廣告 Ad -----
第二朝晨光初現起咗身，趁大伙兒未一齊食早餐決定去海灘試水，一落樓已經聽到澎湃嘅海浪聲，行到去海邊只見洶湧嘅波濤，幾乎兩個我咁高嘅白頭浪連綿不斷咁打向沙灘，我同一班應該都係準備明天比賽嘅敢死隊努力嘗試游出去，但游一陣又被海浪打返轉頭，循環不息，最後大家互望苦笑，無人成功游到出去只好返回岸上，打笑 chit chat: Let’s see how’s tomorrow 。據知晏啲有人試水時遇溺呼救，被都係試水嘅著名 MidAgeOn9 教主 Kim sir 及現場救生員救起，幸好無恙，事主感激不盡，希望認 Kim sir 做契爺，但與本故事無關。
游完準備出去買碼錶，Trifitness 其中一位善用電腦搵嘢嘅 “搜尋王” WhatsApp 我，問我有無試過 Hard Reset 隻錶，一試之下回復正常，返香港一定要請搜尋王食早餐加凍奶茶，以報救錶之恩。
下午大會 Official Briefing 果然宣佈因應現場海面環境，明早游泳賽道 Swim Course 可能有改變，總之就天有不測之風雲，聽朝睇下點樣行啦。大伙兒開始盡量避開太陽，爭取休息食多兩碗飯，黃昏時份 Rack 好車約定聽朝03:15早餐見。
一宿無話瞓醒覺，伸展一下飽餐戰飯，各自攞齊嘢去 T1 按游跑踩次序放好，最後檢查一切正常之際，大會正式公佈，因為實在太大浪，安全起見 Swim Course 由游 1.9km改為跑300M落水，向前游100M 再平行海岸線游700M ，然後上岸跑返去 T1 轉項。全塲 1300 幾人望一望波濤拍岸嘅海面，無乜人有異議之下大家排隊準備 Rolling start 。(PS. 早兩年某塲 IM 賽事，有選手 Swim Course 失蹤，最後被發現遇溺身亡，可能因為咁樣大會比較偏向保守同小心。)
----- 廣告 Ad -----
“終點見，All the best !”
好耐無講呢句，同隊友講完之後排咗一陣就到我落水，跑咗一輪游咗一陣之後，水面上工作人員示意我哋轉九十度平行岸邊游，咦? 點解可以企喺到嘅，啲水浸到我心口低少少而已，但話口未完一個兩三米高嘅大浪又冚埋嚟，游幾下企下跳下又一個大浪，潛入水避一避再游游跳跳企企，好快完成咗呢個全新體驗嘅 Swim course，即刻衝去 T1 轉項區，著番鞋襪帶上頭盔，飲啖水最後重中之重將所有外露肌膚狂噴防曬，然後推住架車咬住包 Gel 走去起點，”Kar” 一聲 Lock 上單車鞋，向住前面 90km 邁進。
頭 20km 表現正常，但汗水已經不斷沿住頭盔流向下巴，更從頭頂無間斷滴落防風鏡之內，但話咁快又蒸發咗，突然間我前面一位女仕炒車，前空翻加轉體重重撻喺地上，佢個水樽飛咗出嚟正正楔喺我前輪之下，我成架車打滑偏側，危急中本能抽一抽頭好在又救番無事，35km 我望一望隻錶都係35不過係35°C ，我件黑色 Tri Suit 雖然顯瘦，但不斷幫我吸收陽光，每個水站都要攞冰水壺補充同淋落身上降溫，60km 我個頭有少少痛，暴力出汗令我開始乏力，拆開最後一包 Gel 囫圇吞棗食埋，80km 喺最後一個水站攞咗兩支冰水，忍唔住除低風鏡兜口兜面淋落去，再淋埋後頸同心口，精神為之一振，Lock 番右腳鞋，出埋飲奶之力，衝返去轉項區，終於完完整整 Rake 番架車，換上跑鞋髕骨帶，帶番太陽帽太陽眼鏡，再狂噴一次防曬跑去 Run Course 開始最後一程賽事。
36、37°C 嘅半馬拉松21公里賽事，大會非常貼心，每隔一公里就有三五個好大嘅大水桶，裝滿凍水同冰塊俾選手降溫，每兩公里嘅水站冰水，電解質飲品，冰凍可樂西瓜菠蘿 Gel 更無限量供應，而今次大會工作人員更加係叔叔打過咁多次 IM 最有 Heart 最貼心最有 Passion 嘅，只要你喺水站一停低或者跑慢少少，各類飲品補充儕即刻包圍住你，工作人員更會用細細個密封膠袋入住一兩條長條冰柱，俾你放入 TriSuit 前心後背凉一下，我絕對相信喺如此高溫之下，如果無呢班 AA+ 工作人員同無限冰水個個兜頭淋，人人噴濕身，好可能無幾多人可以完成賽事。
火熱氣溫之下叔叔其實每兩三公里都諗好唔好退賽，心跳由踩上單車之後 Keep 住 Zone 4 Zone 5 ，但我知道如果今次選擇退賽，下次一辛苦一定就會一次污兩次穢，再選擇退賽，而且很肯定俾教練鬧死兼長期恥笑，一於頂埋佢。”Quitting is not an option!” 依稀記得係 IM 網站睇過嘅 Quote ，亦係大部份玩 IM 人嘅金科玉律。
15km 第二個 Lap 最後一個折返點，仲有 6km，估計我已經流咗好多公升汗水，望一望隻錶去番 Zone 4，抖擻一下精神，慢慢加快番步伐，希望衝返終點。
最後 2km，一個熟悉又親切嘅身影加一把沙啞嘅聲音出現，跑馬地 MidAgeOn9 教主 Kim sir 又一次喺路邊等我，陪我吹住水跑咗 1km 然後又去接佢另一位 MidageOn9 隊友。最後 1km ，我忍唔住喺最後嘅水站遂位多謝 Volunteer，佢哋真係 Best Volunteer I have ever met in IRONMAN races 。
最後 200M ，跑入沙灘跑返上紅地毯，向住前面嘅紅黑拱門衝過去，企喺拱門之下，我終於呼出一口大氣，好鬼熱好鬼辛苦，但我都完成咗，我頂!
----- 廣告 Ad -----
完賽之後全日都未有胃口，只係補充番啲我好需要嘅養份，酒精！啤酒白酒香檳隊咗好多杯，分別同隊友及 MidAgeOn9 老友吹水之後返房好快進入沉睡狀態，我估我完賽嗰陣應該起碼輕咗3、4kg，直到第二晚我上磅都依然比賽前輕咗 1.5kg，今次仲唔有藉口食乜咁食!
朋友阿茂利同我飲完支 2012 Veuve Clicquot La Grande Dame ，聽完我講成個過程之後問我 ……
“超，幾十歲人玩啲咁鬼辛苦嘅嘢為乜啫? 無啲容易嘅玩咩?”
叔叔順手開埋支 Palmed d’Or，倒多杯俾佢，漫不經心咁答佢……
“If it is easy, they call it Marathon, not Ironman!”
茂利 : “妖!”
[ 完 ]
“If it is easy, they call it Marathon, not Ironman!” Direct quote from Ironman website. 唔係叔叔手筆，不喜勿插。
