於西班牙 Sagunto 舉行嘅三項鐵人賽出現尷尬一幕，主場出戰嘅 Mateo Bustos，捱過游水、單車、跑步後，以為可以率先衝線贏得冠軍，點知「黃雀在後」，冠軍拱手相讓。
當時 Mateo Bustos 跑到距離終點拱門唔夠10米，以為勝券在握，就雙手高舉勝利手勢。不過，呢個時候另一選手 Germán Cister 喺盲眼位衝前，超越 Mateo，更衝過埋衝線帶。企喺後面 yeah 完嘅 Mateo，眼白白見住個冠軍獎杯被人搶咗，當場呆若木雞，唯有掩面跑過終點。
https://twitter.com/elgotet/status/1406622621005983744
事後，呢條戲劇性衝線短片於社交媒體瘋傳，有成2.6百萬click，唔少網民仲大力恥笑。不過 Mateo 似乎無嬲，仲喺自己 Twitter 出帖「慶祝贏得亞軍」，都算有風度啦。
資料: Runner’s World
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。
