鷹鷹: 為什麼不可以不一樣 | 專訪三鐵王越野強的曾進傑

寫鷹鷹，心裡盤算著寫佢有幾猛定寫佢有幾慘? 出世有兔唇裂顎俾人取笑、自細過度活躍症 (果時未興呢啲標籤)、讀書成績不理想、做一份唔係咁有前景的救生員工作 (世俗定義)，表面證供起碼七、八個慘，十分 miserable。但在我前面如風衝落山坡的鷹鷹，沒有留下半點創傷的疤痕，佢知識豐富，分析力高，三鐵王、越野強，超正面、零個慘，十二萬分開心，另追加鷹鷹粉無數。

做完個專訪，我心諗，佢係唔係有過度樂觀症? (呢個世界好像只要搵到個乜症物症嘅標籤，就可以解釋和接受一切)。其實是我的膚淺和世俗，成就、幸福、豐盛，為什麼不可以不一樣?

「偏食」的鷹鷹

「我中學時有玩踢波同田徑，主要跑千5同3千，最大動力係外出比賽時唔洗返學。」
「你好抗拒返學?」
「超唔鍾意，完全聽唔入腦，我坐唔定，上堂傾偈瞓覺，交唔齊功課、走堂，經常被記過。」但鷹鷹不是技安或傻強，佢冇欺凌同學冇收陀地，只是找不到任何讀書樂趣，是讀書不是求分數啲 friend。課室對鷹鷹是一個牢籠，青蔥歲月就在球場、田徑跑道和在山頭磨蹭。

「你讀書咁唔掂，屋企冇壓力俾你咩?」
「又冇播，我家姐係會考廿幾分，係中大畢業。屋企總算有一個讀到書，交到數。家姐之前做編輯，現在從事藝術教育，我就教跑步，幫阿聰同火車sir教班，我地一個文，一個武，幾好。」鷹鷹搵到一個好靚嘅位俾自己，幸福感需要一點點智慧和創意。

「點解你唔自己搞番個跑班，你都好多鷹鷹粉。」
「我最怕做啲admin嘢。」因為行政工作等於要坐定定、企定定、眼定定，鷹鷹就係冇得定。

中學之後逃出學校牢籠，鷹鷹就在屋苑泳池當上了救生員，轉玩水，獨木舟、滑浪風帆、帆船、潛水。

「我做半年救生員，搵夠錢，跟住外出旅行玩半年，又試過去澳洲 working holiday 一年。都因為我坐唔定係屋企。」

「一個廿零歲男仔唔係要諗吓職業前景?」
「真係冇乜點諗，好多人係趁後生搵錢，等退休可以去玩，我就係一路搵錢一路玩。我而家都40歲，呢種生活模式冇乜大問題，我好開心滿足。」一條不一樣的路，屋企小朋友如果冇鷹鷹咁強勁臂彎、咁粗壯四頭，同咁豁達樂觀嘅心態，唔好學!

「當年在學校你是被定義為讀唔成書果班，老師會唔會唔like你?」
「又冇，老師都幾喜歡我，因為我唔搞事，老師成日話我有小聰明，家長會佢同我阿媽講，鷹鷹唔係讀唔到書，佢係唔讀書啫。」呢位老師的社交技巧好優秀。

「成績我好睇得開，我唔係唔勤力，我係田徑隊好勤力，自動自覺一日操兩課。我見到人地跑得咁快，我覺得自己都應該做到，就會好積極去做。但係我讀書完全冇呢個心態，好早已經認定考試讀書唔係自己嘅世界，唔係自己會行嘅路。」

「你以前讀書會唔會係果啲A仔 (ADHD專注力不足及過度活躍症)?」
「應該都係，不過果時唔係咁多呢啲評估。亦唔會有乜嘢支援。」以前係叫曳仔，既然係曳，當然唔會浪費資源係佢地身上。

「我學習能力都幾高，但讀書除外，鍾意吸收知識。出嚟做事嘅日子，我睇嘅書係讀書時成百倍。對於喜愛嘅嘢我可以好專注 (鷹鷹嫂應該好開心)。我對住架單車可以由朝到晚，遇到唔識嘅嘢會上網睇書搵答案，我最鍾意拆開玩具同物件又再裝嵌番 (仲裝得番嘅話)。不過就係唔可以坐定定係課室聽書。」

迷思: 鷹鷹是否偏食? 當香港學校只提供快餐、午餐、常餐，你唔啱胃口想轉其他，但發現其他餐廳都係一樣只賣快餐、午餐、常餐，咁你算唔算偏食?
「OKOK，咁我淨係唔想要炒蛋，改反蛋得唔得先?」
「sorry唔得喎，我哋規定左蛋只能炒，唔可以反囉!」

跑的鷹鷹

「有一天我搭輕鐵時見到有一個人在跑步，速度與輕鐵同步，覺得好爽，我好想有爽的感覺。於是開始試下跑2K，但超辛苦，爆晒。我好唔忿氣，佢做到，點解我做唔到，話晒自己中學田徑都攞過獎，於是迫自己繼續去跑。」

「點解你冇將呢個唔忿氣嘅動力應用係讀書方面?」
「因為讀書我未試過得!」

「你第一個路跑比賽係幾時?」
「應該係2007年我第一次參加10K賽，跑40分。」第一場10K就40分，除左骨格精奇，冇其他嘢。

「果場10K我見到有幾個女仔係我前面，有一個是梁影雪，我知佢係港隊，明白，但其他女仔我唔識。」
「你又唔忿氣?」
「我冇唔忿氣，但我知我可以做得好啲。跟住差不多場場10K賽事都去跑，跑到38、37、35，最快去到34分，開始見到阿紀、家豪 – 個背脊，家豪吹住水跑34，我就瀕臨死亡邊緣跑34。」

「第一場山賽是2012/13的 RTI (Round The Island)，認識了楚健、五金、火車，開始同佢地組隊玩毅行。」
「係你第一場毅行?」
「不是，我第一場毅行同朋友行左35小時，攰到想死，果時完全冇越野跑概念。見到別人可以12、13小時完成，後來同楚健、五金、火車組成 UFO，做到12小時，2015年想挑戰11小時，有幾年也試過同影雪和周佩恩組隊，都是做11小時。」

Flow的鷹鷹

「無論香港或國際，大小賽事都玩過晒，而且獲獎無數，你對越野跑還有什麼目標?」
「成績不再是我追求的，就是要夠爽!」
「乜嘢係爽?」
「就係增加越野賽可跑的比例，以前50K賽事，會行一半跑一半，後來是跑80%行20%，試過部份50K賽事我全跑，覺得好爽。」

「你成日都講爽，可唔可以講多少少爽的感覺是怎樣的?」
「我感覺爽嘅意思係『心流』Flow，當你好專注做一件事，你會完全沈溺其中，對周遭發生的事情沒有意識。我跑100K時會有，10K間中也有，玩team時最多。當在flow的狀態，亦是自己最高水平的時候，會感到好high。」

「我在山徑喪衝落斜時也試過有接近 flow 的境界。」我雖然係慢腳，但慢有慢 flow。
「係呀，越野跑落斜時好易有 flow 的感覺，我現在在連姐跑上波頂都可以進入 flow 的境界。」冇可能，我只會進入彌留境界。

示範地上最強上斜 

Videos powered by Hover Air X1

堅航拍落斜，隻機跟得貼

「我嘅經驗係你唔好刻意追求 flow 才會進入到，等於我不會刻意追求 PB，每次 PB 都係在我享受的過程中做到。有時比賽我係唔戴錶，就係唔想被一個目標時間去製造壓力。」也許能經常能進入心流境界的鷹鷹，就是維持他多年對跑對三鐵的熱忱。

(冷知識一:「心流」(Flow): 「心流」體驗 – 在顛沛流離的時代，過幸福充實人生的關鍵元素 | 樹洞香港 | TreeholeHK

「心流」 是由匈牙利裔美國心理學家Csikszentmihalyi 於1990年提出，指的是個人專心地從事活動達至欣然自樂的「忘我」境界。Csikszentmihalyi 訪問不同職業或興趣的人，例如登山愛好者、音樂家、舞蹈家、畫家等等，讓他們形容從事所愛活動/工作時的心理狀態。結果發現有以下的共通點:

(1) 快樂不知時日過 – 他們彷彿超越時光
(2) 專心一志 – 彷彿忘掉自我，自身與當刻環境融為一體
(3) 過程具有挑戰性，但仍會廢寢忘食、樂之不疲地完成
(4) 認為自己已達至最佳狀態、發揮得「極至」
(5) 即使不用任何外來的獎賞 (reinforcement)
(6) 工作的挑戰性 (challenge) 與個人能力 (skills) 匹配以及成正比關係

相當程度的挑戰性和能力是達至「心流」狀態的不二法門，但若兩者不吻合，只會感到毫無興趣 (apathy)、沉悶 (boredom) 或憂慮 (anxiety)。Csikszentmihalyi 相信，「心流」便是我們幸福快樂的泉源。)

一年參加60場賽事的鷹鷹

「你試過一年最多參加過幾多場賽事?」
「60場，包括14場海外。如果計連續3年，應該超過170場。」
(冷知識二：一年有52個星期)

「你有那麼多的假期嗎?」
「我做沙灘救生員時，每日可儲一個鐘OT，選擇星期六、日放半日假，用來參加賽事，儲起半日來參加海外賽事，多數星期五、六、日完成回港。試過去杭州參加三鐵，星期六去，星期日返，我同隊友講要踩快些，否則趕不上飛機，比賽獲獎，我哋同主辦當局講可唔可以俾左個獎我哋先，因為要趕住搭飛機。」

「我參加過很多世界上最大型的三鐵賽事，包括夏威夷 Kona 的三鐵世錦賽。當你身在現場，望見個海有幾百人在游泳，qualify 試時有5千部單車在列陣，那種氣氛令你感覺到你唔係最發燒果個，大把人癲過你、熱血過你。他們都是全世界最top的三鐵選手，就在你身邊走來走去，就好似跑山賽你見到 Kilian 係你隔離準備起步，你話high唔high?」梗係high，我地見到聰sir阿歹敏怡一齊係起步線都high啦。

「你參加過咁多山賽，有冇邊一場你覺得最有意義最難忘?」
「應該都係2015年同楚健、五金、火車一齊玩的毅行，我哋好有目標要打破12小時，有足夠的準備，逢星期三去荃灣衝斜路，走針草帽，星期六、日做長課，我哋一起玩山已有數年，相熟如一家人，完全認識大家的特色和強弱處。」

「跑毅行時一個人話去小解，其餘3個就算冇需要都會一齊去，省卻要等個別隊員去廁所的時間。最後我哋以11小時58分衝線，大家high爆，互相歡呼慶祝，突然其中一個好清醒，話要去打咭至計衝線時間，果時只剩2分鐘便會到12小時了，幸好還趕得切。結果是全場總冠軍，更打破當時華人的最快時間，別具意義。」

一個天生坐唔定、流著自我挑戰的血液、具打破舊紀錄的實力、可以在光明頂與群雄爭一日之長 (唔係只得selfie) 的人，他們心中那團火特別高溫和襟燒。

飛往另一境界的鷹鷹

「最近同阿聰食飯傾起，係越野跑我地一定會過去。我覺得係最top的時候引退最好，我唔想要行要捱番去終點，想衝線之後仲係好fresh，我開始會少點比賽，幫阿聰教下班，播下種，培育青少年傳承都好有意義。香港越野跑嘅未來唔可以靠我哋呢啲三、四十歲老鬼，希望可以發掘多幾個少年阿歹出嚟。」

「最近你代表香港去奧地利參加越野跑世錦賽，出發前中了 Covid，期間有什麼特別的經歷和感受?」
「我同阿聰、阿歹玩隊際，敏怡自己玩女子 solo。我 Covid 剛康復即過去比賽，初段超辛苦，感覺只有3、4成體力，跑幾K覺得好凍，要著風褸，成個山得我一個要著風褸，我知出事。上第二個山完全跑唔到，爆晒，要用 pole 支撐一步一步咁上，被4、50人超過，好失落，因為我覺得自己上斜應該好強。」

「去到第一個CP，老婆同我講我排緊一百四十幾，我知全部只得一百五十幾個參加者。但過左40K之後，落番低一點，溫度回升，我開始回魂，後段上番力，上斜時反超前40多過選手，雖然總成績未算理想，但覺得有個交代。」

「你病成咁，期間你點樣鼓勵自己撐落去?」
鷹鷹不用思考，閃電答:「第一，代表香港；第二，要為隊友；第三，我咁遠過嚟；第四，老婆係終點等我；第5，好多香港人睇住。」5個point，有兩個同香港有關。
「我跑左咁多場比賽，未試過代表香港。我雖然好怕被拘束，但代表香港的確是一份光榮和動力，而且能夠同世界頂尖高手同場角逐，可以說此生無憾。」

「田總出香港山路錦標賽時，影雪同我講你去玩啦，我話我都40歲，仲玩咩，阿雪話佢自己42啦，代表香港好難得。老婆話你40，再唔玩就冇機會玩，就算唔得都算試過。又係，我成日話乜都要試，冇理由試都唔試。事後諗番，如果我今年唔去可能會後悔。」

「論實力香港在亞洲是前列，唔明點解唔派多些選手出席，女子只得敏怡一個，特別是香港的年青跑手，應該獲得多些機會，我希望田總有看此次專訪…..。」(下刪10分鐘對話)

「你咁多年咁多場比賽生涯中，有冇遇過一些好大挫折? 有冇試過DNF?」
「冇乜大挫折，DNF試過3次。一場是玩三鐵，因為架單車爆呔，第二場是HK100，因為腳受傷跑了6K要撤。」

「仲有一次是跑學界1500米，原本我諗住我可以贏，一路守住前3、4名位置，但中段時被後面的跑手踩甩左隻鞋，我就停下來，沒有繼續比賽。事後阿sir問我點解唔繼續跑，我話冇左隻鞋仲可以跑嘅咩?只怪當時太年輕。其實就算遇到什麼困難，贏唔到，總要跑下去，就算 Kilian 都不會場場第一。完成了才無憾，想想我當年14歲嘅遺憾，帶到現在40歲。」

彩蛋

「鷹鷹你而家40歲，你覺得去到人生一個轉彎位未? 你點睇前面嘅自己?」
「有一日我坐係救生台，望住前面個海，諗未來10年廿年會係點? 一片空白，心諗不如試下其他發展空間，因為冇乜損失。跟住落寫字樓簽名resign。」好灑脫呀，一定係好型咁慢鏡行入去寫字樓。

「而家都擔心啲老人家，有一日佢地會走，所以而家會爭取機會同佢地食飯傾偈。以前真係好少溝通，結左婚後反而同屋企傾多左，因為老婆同我阿媽會互相交換下有關我嘅情報，多左話題。」

「另外最想係外國開間士多，帶埋隻狗 (記住仲有太太) 過去，對住個海或者個山，賣下汽水熱狗，得閒去游下水跑下山。」

「鷹鷹你成日去左操練、比賽，返到屋企成身嗅晒，又要攤屍一大輪，太太有冇啲壓力俾你?」
「呢樣要經長時間訓練太太，我成日都出去跑去游，佢已經習慣了。如果突然有一日見我坐係屋企，唔係病就係有啲唔妥。反而佢仲擔心。」

「太太工作同照顧母親都十分大壓力，因為我外母需要一些特別護理。佢覺得我去操去比賽，做一些佢做唔到嘅運動，某程度彌補佢嘅缺失，佢見我開心，佢就會開心!」突然見到一地都係安多酚。

親，其實去長沙灣幸福邨，地鐵、小巴、巴士，好多選擇，好多路線都去得到。