1977年夏威夷 O’ahu 歐胡島拉力賽頒獎典禮上………

參與者都係 Mid-Pacific Road Runner Club 中太平洋跑者會及 Waikiki Swim Club 威基基游泳俱樂部嘅跑步高手及游泳健將;頒獎過後酒過三巡大家在吹水狗噏聊天,其中本身亦係運動健將嘅美國海軍指揮官約翰.科林斯 John Collins 忽然引述某運動雜誌嘅報導, 話比利時單車手艾迪.墨克斯 Eddy Merckx 所測出嘅最大攝氧量係運動史上之最,咁應該也許可以推論出佢乃係最強嘅運動員云云!

Eddy Merckx

誰不知長跑高手阿 Jick 唔服氣話: “唔係喎阿 John sir , 踩單車不過係借助齒輪傳動同兩個車轆之嘛,點夠我哋長跑,實牙實齒就咁用對腳跑個馬拉松大嗱嗱42.195公里咁勁呀?”

話口未完游泳健將阿 Jack 又唔底得住頸加把嘴: “哈! 說話又唔係咁講喎, 你哋個環歐胡島單車賽雖則係有成180幾公里咁長, 馬拉松又42.195公里咁遠,但話晒都係喺陸上腳踏實地吖? 我哋個環威基基硬漢泳渡賽 Waikiki Roughwater Swim 足足要喺個茫茫大海度游3.85 公里喎,點會唔係我哋勁啲呢又?”

Jack Johnstone (左)

唔知點解咁啱經過嘅幾位單車運動員其中一位阿 Jay 聽到後馬上還擊: “挑, 唔哪係嘛,踩 180 我哋要喺架車上面連續轟五六個鐘,你哋嗰啲邊有得比呢又?”

如是者三項嘅運動員各持己見爭執不下, 拗到面紅耳赤磨拳擦掌恐怕就要打將起來一分高下, 好在喺呢個時候 John Collins 發揮指揮官本色, 大喝一聲然後深呼吸一下當頭棒喝宣佈:

“嗱! 咁嘞,既然大家都話自己最勁, 一於就好似醬爆瀨尿牛丸咁撈埋佢,嚟一次集各家大成, 一次過游晒佢踩哂佢跑晒佢,咪睇下邊個最勁囉,笨! ”

誰不知此語一出各人面面相覷然後居然舉手讚成,John Sir 於是馬上著手統籌呢個前無來者史無前例嘅比賽!

Gordon Haller 係世上第一位完成嘅「鐵人」。

1978年2月18號, 歷史上第一場長距離三項競賽:夏威夷鐵人三項全能賽 Hawaiian Ironman Triathlon 在 O’hau 歐胡島上舉行,比賽開始前,15位參賽者都收到一本賽事手冊,包含路線與規則。在最後一頁,John sir 係咁寫嘅:

“游足 3.8公里吧! 踩足 180公里吧! 然後跑埋個 42.195公里吧! 完成咗,你將有足以誇耀一輩子嘅成就,夠吹足一世! 邊個先完成呢項賽事,我哋將會尊稱佢 為真正嘅 「鐵人 IRONMAN」!”

最後,喺呢一日,塵世間第一塲 IRONMAN 鐵人賽事中,有12人順利完賽,哥登. 海勒 Gordon Haller 係世上第一位完成嘅「鐵人」,完賽時間係 11小時46分58秒!

Ironman Wetsite

時光荏苒歲月如梭,鏡頭一轉 …………….

2016年 11 月 香港上環某 U 字頭非常好食嘅著名日本菜食肆酒吧,MidageOnG 布吉 Ironman 70.3 慶功宴……….

跟39年前夏威夷歐胡島平行時空一樣,大家完成 70.3之後躊躇滿志,一邊杯上杯落一邊回味比賽前比賽中比賽後嘅點點滴滴, 酒過三巡大家在吹水狗噏聊天,忽然 邪教教主又係深呼吸一下又嚟一句當頭棒喝:

“其實 70.3太容易嘞,人一生起碼要完成一次 Full Ironman 先似樣,而226並唔係你哋想像咁可怕,只要半年 training 人人都可以完成到 ,係人人都得!”

鴉雀無聲!!!

教主: “真㗎喎,無點你哋,唔信問下大師兄 Chokson ,佢由連水都唔識游練半年一樣搞掂!”

店主 Chokson 剛好咁啱行過來,一如既往七三臉 chok 住回答: “係喎, 真喎,真係掂喎!”

大少爺 M: 咁不如就去 Cairns 226 啦, 出年六月,足足有半年練!
本人: “游跑我唔太驚,但踩180喎? 真係諗下屁股都痛!”
著名運動攝影師 MPP:”係囉,仲要上斜落斜再上斜落斜喎,好甘吓喎!”
隱形拿督 J:” 超,資料上都話喺機場附近比賽咯,機場喎,梗係平㗎啦,你幾時見過機場有斜路㗎?”

大伙兒:” 咦,又好似啱喎!”

大少爺 M:”Ok,let’s go, 226之嘛,怕乜啫?”
攝影師 MPP:” 咩啫咩啫,我都未去過 70.3,直去226?”
Chokson:” 屌7乜九03吖, 直去 226 咪慳番次囉!”
隱形拿督J:”佢有道理喎!”
公子 Y: “望乜啫你,你去我咪去囉妖!!”
本人:”我真係有啲淆底喎!”
Chokson:”淆乜九吖,得㗎嘞! 報名啦!”
教主: ” 不如大師兄都報名一齊去打啦!”
阿乜水 :”係囉係囉!大師兄去我都去!”
阿物水:”好! 大師兄去我實去!”
Chokson :” ……………. ”

大伙兒:”好喎好喎,一於咁話啦!”

最後 26 位院友報咗名!
而大師兄 果然甩底了!

於是,半年無間斷艱苦鍛練開始,陽光下流過以公升計嘅汗水,寒風中瑟縮過拼搏過,受過傷又再康復。正常工作加上繁重辛勞嘅三項訓練,難得嘅係居然無一個人退縮打退堂鼓!

時間彈指過,話咁快仲有三星期澳洲開恩兹 IRONMAN 比賽日如在眉睫 ……..

待續…

更多:
Fitz.hk Facebook專頁
[IRONMAN Phuket 70.3] (1) IRONMAN 是一件很浪漫的事情!
巖巖巉巉蝦兵蟹將從忐忐忑忑到戰意高昂出戰 Ironman 70.3
[Road to Ironman – 番外篇] 鐵人 · 有愛!
Fitz Triathlon 三項鐵人

分享
雷彬冶文
老餅廣告人,資深美指。貪威識食,惡死睖瞪,腌臢腥悶,姣斯躉篤!熱愛運動,業餘中嘅業餘三鐵運動員,酷愛貪靚臭美程度至長期健身控制飲食,考埋 PT 教練牌!