Fitz > 運動 Sports > 三項鐵人 Triathlon > To Play or not to Play! 總之贏到七個一皮!

2018年10月7日,MidAgeOnG 五十幾位成員將會征戰台灣澎湖,參加 Full Ironman 226 賽事,其中大部份都係第一次破處之戰,論年紀,論實力,論經驗論往積,可以話係甩皮甩骨巖巖巉巉鬼五馬六,但我可以肯定每一位都會帶著勝利嘅笑容衝過紅色拱門,五十幾位都係贏家!

你贏,因為你夠膽報名夠膽參賽,下過半年苦功企喺起跑線上,準備面對3.8K嘅游泳,180K嘅單車路賽,然後仲要跑一個42.195K嘅全馬賽事,你哋應該……應該啫……無人會贏到冠軍,但好肯定你哋已經贏咗好多人,好多唔敢參加甚至諗都無諗過報名嘅人!

你贏,因為你將會完成一場226公里嘅賽事! 試問下未參加過 Full IM 嘅朋友226公里有幾遠? 應該大部份會答你好遠好遠好很遠,遠到不得之了! 而你當日許下呢個承諾定下呢個目標,流下不知幾多嘅汗水然後完成,你,當然係一個贏家!

你贏因爲你走出自己嘅 Comfort Zone,平時濕平行街行幾個街口都嗌倦,馬拉松? 乜鬼嘢嚟㗎攞命咩? 踩單車? 黐孖筋大埔去到大埔墟已經人體極限啦吓嘛,游水? 游出浮台無問題游返去海灘都差啲想叫水上的士! 但最後,你完成晒全長 226 公里嘅賽事,咁都唔算贏唔通要去打仗?

你贏因爲你唔Q理身邊說三道四撥完冷水撥熱水再陪撥番冷水嘅花生友,話你唔得話你唔掂話你犯賤攞苦嚟辛牙聳䚗嘅好事之徒,到佢哋用仰慕嘅眼光望住完成比賽嘅你時候,會真心而謙卑咁同佢講一句 : 其實你都得㗎肯練就得無點你,但忍唔住由心度笑出嚟!

你贏因爲到你夜闌人靜獨處,或者三更夜半扎醒屙夜尿嗰陣,你會發現你嘅人生同其他營營役役,渾渾噩噩只懂為口奔馳揸住個手機由朝玩到黑嘅佢哋,多咗一份精彩多咗一份回憶,即使他日老來同阿孫想當年,都可以好巴之閉咁同佢講: 爺爺嫲嫲或者公公婆婆我呀,當年係 Ironman 嚟㗎問你服未?

不過又其實贏唔贏都係次要,最要緊嘅係 好玩!蔡東豪先生著作裡面都有提及嘅跑者哲人作家 Dr. George Sheehan 寫作中經常提及嘅一個主要概念係 好玩 Play! 跑步因爲好玩,運動因爲好玩,參加鐵人賽因爲好玩,人嘅存在,同好玩不能分開,To play or not to play 我玩故我在!

Dr. Sheehan 佐冶仔從小到大嘅志願就係做醫生結果亦如願以償當上大夫,直到44歲忽發其想,咦,我大學畢業之後就無運動過仲識唔識郁呢,於是二話不說除低醫生袍穿上運動鞋,落街起步就跑,然後跑遍全美大大少少馬拉松賽事,亦成為跑步文學嘅表表者!

佐冶仔事後話 ,做運動一開始時只係應付中年危機嘅一塲遊戲,但始料不及呢個遊戲令佢從新發現自己,目光開闊咗視野遠大咗,越玩越開心,越玩越揾番自己,揾番曾經唔見咗嘅童年自己!

隊友們,好好享受你哋嘅第一塲 Full IM,記得諗定衝過紅色拱門嗰一剎那擺乜嘢 Pose 做乜動作去留低呢段難忘一刻,同埋,玩得開心啲!

“If you have a body, You can be an IRONMAN! “

Fitz 連結: https://fitz.hk/?p=104513


更多:
Fitz Facebook專頁
等等,我條頸斷咗,畀少少時間我!
[在陶波遇上墨菲] 新西蘭 IRONMAN TAUPO 賽後記!
人若然忘記了愛,忘掉同時間比賽……!
[新西蘭Taupo Full Ironman] 明明已經過226 點解仲要452?
[Ironman Cairns 226] 一切從狗噏開始……!
雷彬冶文@Fitz
Fitz Triathlon 三項鐵人


文章為作者意見,不代表Fitz立場。