9 February 2015
話說之前日一早執好晒袋，早睡早起，準備比賽日五點起身食完早餐搭頭班車出發。當日天都未光就起身，還比預期早到場地，似乎一切盡在掌握之中(除了漏了執返對眼，樣衰無極限)。但原來百密都總會有幾疏，最疏之一乃買漏梳蕉。
本來想買梳蕉可以早餐加料，又或者袋定喺身，去到未夠鐘都可以食吓。不知是否就係爭條蕉，又或者今早太早食早餐，到寄晒袋熱緊身時竟然見肚餓！心想著背囊裡面遙遠的包，但起跑時間又就到，唯有默念袁崇煥金句頂硬上。
出師不利又何止一單。一向跑步時都有用電話APP track GPS和時間，同時用來聽歌激勵士氣。點知，一起步嘅時候，一按start制，部陽壽將盡嘅電話竟然未跑先撞牆，以黑畫面來迎接我衝過起跑線嘅一刻……須 知道呢部老嘢(陰公，人哋得四歲咋)開關制已廢，死機一定要插電先叫得返醒，換句話說，我全程無電話用。無歌聽事小，無得track時間同pacing真的好無安全感，完全因不到時間。最慘的是，隻電子錶無電無得戴，於是睇時間只能靠手上一隻行•針•錶！真個是拎出來睇都驚俾人笑，你話情何以堪呢⋯⋯
----- 廣告 Ad -----
跑得衰就唯有賴地硬，賽道窄開頭幾K經常塞人，就住就住其實跑得仲辛苦。怪不得教練說他跑步無事，但行街總會面青青。3K左右，不知是否太緊張所以膊頭太 緊，右肩和手臂開始酸痛。得承認我意志很薄弱，起步一連幾個打擊已經令我無心戀戰，無想要追時間，於是跑到6K左右開始「小掩」痛，已開始跑吓行吓。皆因 比賽主題是玩具，我也湊熱鬧，帶了頂恐龍公仔帽上陣。沒有追時間，就唯有用恐龍仔安慰自己，都是leisure run啫。
途中明顯血糖低無力，一路期待途中有補給，但跑10K的我其實諗多咗，有水你飲已經好好，鬼叫自己食唔飽。半路見有運動飲品站，以為有救，衝埋去隊了一杯先知死—痰上頸，搞到之後有朱古力派都唔敢食。經一事長一智，下次都係飲水好了。
跑到最後1K大直路，碰上班上跑差不多的同學，打了招呼之後，她丟下一句：「最後1K，衝埋佢咯。」便加速揚長而去。我想她應該是想跟我說不如一齊衝，但無奈我已失去鬥志，也失去力量，只能繼續龜速前進。
衝線之後，雖然是第一次完成10K比賽，但沒有太興奮，因為看著epic fail 行針錶也自知比平時練習差，有點失望。但是反正是第一次，無論如何都PB，那就算了。啪返隻蕉，又繼續上路。
更多:
[練跑筆記] 第一次Interval 沒有放棄的理由
[練跑筆記] 街馬賽前回顧
Fitz Blogger Boni
Fitz Running 跑步
