Fitz > 運動 Sports > 行山 Hiking > [樂施毅行者2018] 起步前最後要做的8件事

毅行日逼近,而家距離起步淨返好少時間,好多生活細節,都會影響到時表現,大家要注意!

1. 剪腳甲

修剪腳甲可避免行山過度,或鞋頭太窄,而有爆甲嘅情況。不過,臨起步之前一兩日先至剪腳甲,如果剪得太入,就唔夠時間復元。理想剪腳甲嘅時間就係大概一個禮拜前,視乎大家腳甲生長嘅速度,仲有記得唔好剪到出血呀。 (當然,亦不妨剪定指甲)

2. 剪頭髮

唔好太近起步日子去剪髮,男士剪髮要剃呢度剃嗰度,一剃到出血,到時毅行行幾十個鐘,啲汗水醃住你嘅傷口都咪話唔痛。

3. 剃毛

男士要剃鬍鬚,至於大家仲有咩地方要剃毛就悉隨尊便。不過,如果你真係覺得有此需要,就唔該早幾日搞好啦。令皮膚有時間適應。

4. 點算必要物資

由 Power gel、能量飲品、衣服鞋襪以至電筒頭燈,呢個時候應該要準備妥當。對裝備有咩疑問,一係買個新,一係問朋友借,務求唔好令自己有唔踏實感覺。注意係,呢個時候千祈唔好諗住著新鞋參賽。(有人臨時臨急要換新鞋,喺最後一個禮拜,唯有叫阿媽幫手,著佢對新鞋朝朝去晨運,務求盡快開鞋 。可請參考《[樂施毅行者2018] 最完備的物資裝備清單》)

5. 同屋企人溝通

毅行者絕非一個人嘅事,你唔返屋企咁多日,都應該好好解釋畀你屋企人知你去咗邊。最重要係,得到屋企人支持會令自己無後顧之憂。呢幾日,就搵個時間拎份地圖,同屋企人解釋毅行者係乜,順便叫佢哋捐錢,最好就叫埋佢哋去 checkpoint 支援你。

6. 確立支援點

Support team 應該一早搵齊人,而家先嚟搵,除非你係大明星,一呼百應啦。但齊 team 都要同大家制訂支援點嘅地點同時間。雖則話行走毅行嘅時間好難預,但唔該都最好定個約莫時間,令支援隊朋友唔使喺山頭白等。仲有係,起步前幾日約個時間交收物資,以及定好飲食清單。

7. 積極同隊員溝通

有時間大家就培養下感情啦 (見唔到面就 WhatsApp 吹下水)。四個人結伴行100公里,感情差係會好難捱。

8. 飲食要小心

唔係講起步前兩日加碳飲水呢啲,而係而家呢個時候,食得清淡啲,唔好剌激腸胃。麻辣火鍋就留返行完慶功啦。