Fitz > 運動 Sports > 跑步 Running > [HK168賽後感] 如何建立 / 把握你的小高峰
圖: finish the unfinished task,得來不易

毅行過後,有人問我做乜唔出下文分享下,其實今個賽季毅行一直都唔係我既目標 (或重點) 賽事。又或者咁講,如果你想以PB 100km去作為一個目標,毅行未必係一個合適既舞台。首先,4個人要無事無幹以最佳狀態跑完100km,已經係難。其次毅行係隊際比賽,最大意義係4個人一條心去完成,當然做到大家心目中既理想成績一定會好開心,但 full team 完成比一切 PB 都重要。

而且毅行係一個籌款活動,最大意義係透過大家既毅力完成100公里,去感染身邊既人支持/出錢,再去幫助有需要既人。所以如果你只係想了解自己既實力,香港有好多100km比賽可以去玩,例如: HK100,TNF100,TLT100,Garmin100……或者如果你係求一個PB 100km ,新比賽 Fast100 先係最好既平台。

圖: 上年自己準備不足,輕視左賽道,意志力差,結果人生第一次DNF。

2017人生的第一次DNF

上年去玩 Half 168,本身自己個人準備不足,輕視左條賽道,而且大上大落既路段都一向係自己既弱項。而且上年天氣熱,結果玩完八仙,紅花嶺,龍山,蝴蝶山,大刀後,落到林錦公路已經爆到7彩,謝到撻唔番著個人,個人又食唔落野,入夜發冷。嗰一刻好記得我坐左係林錦公路邊十幾分鐘,徐徐不停有小巴,的士係我旁邊刷過,最終軟弱打敗了我,我伸了手上了的士,人生的第一次DNF就是這樣……為此一直都有啲耿耿於懷!

所以其實 Half 168 復仇先係我上半季既重點賽事!

半年的計劃鋪排

圖: (參考而己) 每個人都無可能KEEP到全年365日都處於高峰狀態,要計劃一下自已的高峰週期 Ref: http://shuwst.pixnet.net/blog

早前上教練班,其中最大得著係學識如何設計 training plan 俾自己,每個人首先要訂下自己的目標賽事,再推算如何鋪排一個高峰期。因為每個人都無可能 keep 到全年365日都處於高峰狀態,所以要計劃一下自已的訓練週期!

如何鋪排你的小高峰

圖: 計劃好你的週期,迎接你的小高峰 Ref: AASFP

由6月開始,都為自己大約制定了訓練及報了一些比賽,簡單地講主要是分為4個階段。

  1. 一般準備期 (開始針對性訓練前,可以先做一些輕鬆的訓練作準備,建立好耐傷機能)
  2. 專項準備期 (開始針對性訓練,集中在心肺,肌力,速度及再強化個人弱項)
  3. 比賽前期 (在比賽前,作休息,調整,減量……etc)
  4. 高峰期 (迎接高峰出賽)

一般準備期

在開始針對性訓練前,可以先做一些輕鬆的訓練作準備,主要係希望建立耐傷機能,迎接專項既強度訓練,因為如未建立好耐傷機能,一下子進入高強度訓練,只會帶來受傷!

專項準備期

圖: 舖排了一系列的短途賽作準備,喜見有少許成果

開始針對性訓練,集中在心肺,肌力,速度及再強化個人弱項,除左日常訓練外,亦鋪排了一系列的短途賽作準備及測試,例如,要求速度/心肌(跑到嘔)的 Dark 45,較多上落攀升及 technical 路段的 Garmin 42,在幾個賽事後,已開始感覺自己開始慢慢上到高峰期,同時亦喜見有少許成果。

比賽前期

在比賽前,作休息,訓練調整,減量……etc,大家都應該識。

高峰期/比賽期

圖: 成功在高峰期完成毅行,4人8腿一齊完成,亦做到理想既成績

經調整後,感覺身體已經到達高峰期,結果毅行成功在 full team 完成之餘亦做到理想既成績,本身Plan 只係做15小時左右,最後在隊友,support 互相支持下。意想不到的以14:20 完成,真係萬萬估不到的結果。

圖: 感恩有大佬,好友既支持,成就這一點兒的成績.

而在毅行的強心針下,把握這個小高峰期,成功在 half 168 復仇,完成自已的承諾。中間過程真心辛苦,但總算以意志力撐過去,亦感恩有大佬一直的支持,除 support 外,有一個理解你,放手俾你去追逐夢想的另一半十分重要!

Sor9,Ching 們,就容我放一下閃!!

Don’t underestimate yourself

最後,其實每個人都可以擁有你的小高峰,只要有決心、計劃、訓練,加埋正確嘅方法,大家都可以搵到一個進步的 formula。 進步真係唔難 (但過程亦唔係易),但我相信每個人都有能力做到,因為回想幾年前,我都係毅行3X hr 步兵團團員。

再贈大家一句 Tom 成日同我講既說話: Don’t underestimate yourself!

圖: Don’t underestimate yourself! 感謝Tom,我的良師益友!

Fitz連結: https://fitz.hk/?p=109186


更多:
Fitz Facebook專頁
[Dark 45 賽後感] 那夜凌晨 我坐上了來回城門的外星紅VAN
[逆轉反勝] 與 Salomon 神人們玩接力
[HK100賽後感] 有種福氣叫「食得跑得」
[有毒慎入] 識玩,一定要帶女友去玩呢個 (前篇)
[怯~你就輸了!] 一對踏上大賽頒獎台的地球人
壞人 [email protected]
Fitz Running 跑步


文章為作者意見,不代表Fitz立場。