C AllStar安仔的毅行初歌

由

2018-12-24

Fitz > 運動 Sports > 行山 Hiking > C AllStar安仔的毅行初歌

我一直以為要揀一首行毅行嗰陣最應景嘅歌就係《當你走到無力》「當你走到無力繼續下去……」(你自己嗰首又係邊首，能夠一吓打入心裡面?) C AllStar 安仔 (陳健安) 竟然行行吓聽到「寧願滯留在此處，寧願叫時間中止」、「甚麼叫絕望，抬起眼望望」，一講就有意境，真係好《絕》。

搵安仔做個簡單訪問，事源2018毅行之後見到一張佢同 hotcha 成員 Regen 攜手 (但得兩個) 衝線嘅相，咦，毅行一向真係無乜 artist 會參加，大家都知練要花時間，行時間又長，又唔會好型好靚，分分鐘真係癲咗爆喊咁返嚟，咁點解仲要搏?

安仔話都係因為一名女子，上年又撩今年又撩，想喺29+1前完成一次毅行者，佢就係 Super Girls 成員 Cheronna (講商業其實跑全馬可能成效仲大，偏偏佢又揀以毅行做挑戰，佩服。) 就當安仔要諗一個鐘意挑戰自己嘅人埋班，佢就諗起 Regen，加埋 Cheronna 男友黃奕晨 Dixon 一行四人，六月就扑搥去馬。

同所有初哥隊伍一樣，除咗 Dixon 之前行過之外，其他人同樣都係面對點樣夾齊人練習先係最難。回想1/9第一次齊上練山行第四段，就因為大雨而由上山改成下海，喺冷氣房游乾水 (哈，山友當然無法想像)，但以培養隊友之間嘅感情嚟講，呢種大戰都一樣有果效。一隊新隊除咗夾速度、夾體能、夾時間，最重要都係人夾人，所以先甜後苦之下，過咗兩日又喺山上同 Regen 切蛋糕慶祝生日 (山友最愛)。

如果大家有欣賞過安仔爆突六舊腹肌同花式足球，都知佢唔係省油的燈，喺練山時間不足嘅情況之下，佢就做去 gym 補練大脾肌，有時約完得返自己一個出發都照練。不過，隊友間嘅體能差距先係真要留意，行唔行得成、會唔會嗌交就睇點處理呢個問題。

好在喺正式起行之前佢上咗非常緊要嘅一課，有教練帶佢地跟其他人一齊行，有分快腳慢腳，安仔就決定跟教練喺當中嘅快隊，然後就學識「SHARE體能」，不論用揹袋/拖拉/後面推呢啲方法都可以將力量平均分配，呢個就係毅行者嘅 team spirit，而起行前好好歹歹都算行過哂頭八段。

入正題，開波當日，Cheronna 同 Dixon 都帶傷上陣，而Regen應該係最慢腳，當然每隊新隊嘅深刻位都一定係第四段，風雨交加，又要通頂捱眼瞓。安仔抗眼瞓嘅方法就當然係不停唱歌，一邊享受一山頭燈嘅演唱會境，當時狂 loop 嘅係 RUBBERBAND 嘅《未來見》「高峰的風景多美好，也共遍踏塵跟土」。同時，Cheronna 同 Dixon 都有搐到腰同拗到腳，原本唔過40小時嘅目標已經開始動搖 (加上幾乎站站都有人嚟支持，筆者角度當然明白時間會一路延長)，呢個時候神兵就嚟，Nowhereboy 嘅 Van 同 Wendy 就喺城門水塘加入陪行隊伍。

喺隊友狀況越來越惡劣之下，臨去到鉛礦坳未上大帽山前，佢地認認真真開咗個會，作為發起人嘅 Cheronna 真係行唔到落去，但又覺得好衰仔。咁安仔都好直接表達佢無論如何都會完成埋佢，而佢睇到 Regen 眼神係想行，但又知道如果佢話行，Cheronna 應該會勉強自己死頂落去，就係咁得返安仔同陪行嘅上路，其他人剪哂帶。呢啲位又係要學習一個隊伍點樣為之同進退。