我一直以為要揀一首行毅行嗰陣最應景嘅歌就係《當你走到無力》「當你走到無力繼續下去……」(你自己嗰首又係邊首,能夠一吓打入心裡面?) C AllStar 安仔 (陳健安) 竟然行行吓聽到「寧願滯留在此處,寧願叫時間中止」、「甚麼叫絕望,抬起眼望望」,一講就有意境,真係好《絕》。

搵安仔做個簡單訪問,事源2018毅行之後見到一張佢同 hotcha 成員 Regen 攜手 (但得兩個) 衝線嘅相,咦,毅行一向真係無乜 artist 會參加,大家都知練要花時間,行時間又長,又唔會好型好靚,分分鐘真係癲咗爆喊咁返嚟,咁點解仲要搏?

安仔話都係因為一名女子,上年又撩今年又撩,想喺29+1前完成一次毅行者,佢就係 Super Girls 成員 Cheronna (講商業其實跑全馬可能成效仲大,偏偏佢又揀以毅行做挑戰,佩服。) 就當安仔要諗一個鐘意挑戰自己嘅人埋班,佢就諗起 Regen,加埋 Cheronna 男友黃奕晨 Dixon 一行四人,六月就扑搥去馬。


同所有初哥隊伍一樣,除咗 Dixon 之前行過之外,其他人同樣都係面對點樣夾齊人練習先係最難。回想1/9第一次齊上練山行第四段,就因為大雨而由上山改成下海,喺冷氣房游乾水 (哈,山友當然無法想像),但以培養隊友之間嘅感情嚟講,呢種大戰都一樣有果效。一隊新隊除咗夾速度、夾體能、夾時間,最重要都係人夾人,所以先甜後苦之下,過咗兩日又喺山上同 Regen 切蛋糕慶祝生日 (山友最愛)。

第一次齊人,落大雨,游乾水。

如果大家有欣賞過安仔爆突六舊腹肌同花式足球,都知佢唔係省油的燈,喺練山時間不足嘅情況之下,佢就做去 gym 補練大脾肌,有時約完得返自己一個出發都照練。不過,隊友間嘅體能差距先係真要留意,行唔行得成、會唔會嗌交就睇點處理呢個問題。

好在喺正式起行之前佢上咗非常緊要嘅一課,有教練帶佢地跟其他人一齊行,有分快腳慢腳,安仔就決定跟教練喺當中嘅快隊,然後就學識「SHARE體能」,不論用揹袋/拖拉/後面推呢啲方法都可以將力量平均分配,呢個就係毅行者嘅 team spirit,而起行前好好歹歹都算行過哂頭八段。

龐大的Supporting team

入正題,開波當日,Cheronna 同 Dixon 都帶傷上陣,而Regen應該係最慢腳,當然每隊新隊嘅深刻位都一定係第四段,風雨交加,又要通頂捱眼瞓。安仔抗眼瞓嘅方法就當然係不停唱歌,一邊享受一山頭燈嘅演唱會境,當時狂 loop 嘅係 RUBBERBAND 嘅《未來見》「高峰的風景多美好,也共遍踏塵跟土」。同時,Cheronna 同 Dixon 都有搐到腰同拗到腳,原本唔過40小時嘅目標已經開始動搖 (加上幾乎站站都有人嚟支持,筆者角度當然明白時間會一路延長),呢個時候神兵就嚟,Nowhereboy 嘅 Van 同 Wendy 就喺城門水塘加入陪行隊伍。

喺隊友狀況越來越惡劣之下,臨去到鉛礦坳未上大帽山前,佢地認認真真開咗個會,作為發起人嘅 Cheronna 真係行唔到落去,但又覺得好衰仔。咁安仔都好直接表達佢無論如何都會完成埋佢,而佢睇到 Regen 眼神係想行,但又知道如果佢話行,Cheronna 應該會勉強自己死頂落去,就係咁得返安仔同陪行嘅上路,其他人剪哂帶。呢啲位又係要學習一個隊伍點樣為之同進退。

龐大的 Supporting team

咁點解最後又係會兩個人返嚟呢? 係因為一個杯麵呀。

喺剪帶隊友搵車走嘅時間,其實麵係會經過鉛礦坳杯麵站,宣佈放棄嘅 Regen 喺呢個時候見到仲坐喺度隊緊杯面嘅安仔。佢心生一念,其實係咪可以翻生毅行者呢?

原來係同一個站係復活到架……

喺安仔眼中 Regen 係最慢嗰個,但呢刻呢知佢好清楚自己嘅節奏,練習同正式都無俾人帶快,認識自己其實都係一種成熟嘅表現。

到面對最後未行過嘅兩段,安仔都有啲心急,對山上騙子已經係零容忍,佢話:「我要聽真話、唔好再話就到」(筆者都忍唔住笑咗)。佢話粗口真係成為必需品,XXX 狂爆粗,真係好 powerful,而每次見到Shocking PINK 嘅指示,就想大叫「又話完嘅!?」

係咁講粗口

將忍耐極限推到最盡嘅時間,亦係人最容易被感動嘅時間,相信唔少人都幻想過衝終點嗰陣自己會點點點甚或喊爆,但往往最想喊嘅位係就嚟到嘅時候,到最後幾百米,SUPPORTING TEAM whatsapp 傳嚟嘅鼓勵說話:「撐住呀,我地喺終點等你呀!」,反而係最令人感動。

相信毅行嘅47小時對安仔嚟講,絕對係幻海奇情,甚至乎令佢想寫一首毅行的歌,而佢更加覺得呢首歌一定要係兩個極端之一,唔係極積極就係極悲觀,兩種都一樣俾到力。

剩下兩人衝向終點
完成

最後當然問返句: 下年玩唔玩?

安仔話一定唔玩。

然後又好似有啲猶豫……
始終一次經驗就會留低一條伏線。

最後,安仔想特別多謝埋所有 supporting team members,無佢地就一定完成唔到。

Supporting team 喺終點等我地

筆者按:我亦借安仔呢段初哥經驗去引誘一吓對毅行有啲興趣但又有少少懷疑自己嘅準初哥們,隨時聯絡「獅子山精神隊」一齊行吓山先啦。

C AllStar Facebook專頁

Fitz連結: https://fitz.hk/?p=110334



更多:
Fitz Facebook專頁
[樂施毅行者2018] 人人都是毅行者 成績總結
毅行慢腳 被遺下的靈魂
Fitz 行山 Hiking

廣告


Law少 許耀斌
人稱Law少,前電台主持及監製,酷愛體育運動,多次參加馬拉松及毅行者活 動,近年更嘗試進軍三鐵及渡海泳。對於跑步、對於行山、對於比賽,均有深刻而令人動容的看法。著有《原來在沒有盼望 的地方才需要盼望》。