[Merrell Challenge 2019] 野外不定向 重新出發

突然又已一年，睇返上年比賽篇文，依然百般滋味。好慶幸今年又有機會參加，正所謂「邊度跌低，第二度起返身。」既然上次南丫島已經係谷底，今次點都唔會差過上次掛……

當然，隊友仍然係最緊要，好想組返上年嘅組合，好在師父見過鬼未怕黑，但可惜才華橫溢嘅飛龍有要事在身，同唔倒我哋一齊玩，而咁啱有幸 KK 大師得閒，就夠腳可以一齊 Merrell 挑戰!

一年過去，今年得到嘅係更好嘅鞋履，消失嘅係衝冠嘅氣傲，不變嘅係對比賽嘅認真。

多謝大會贊助嘅 Merrell MTL Cirrus

喺開始前，經過非正式統計，己隊三個入面有三個唔識用指南針，兩個唔識睇地圖，兩個落山會腳震，兩個特別多廢話，一個肚痾進行中，一個早餐遲到，一個腳痛，大家藉口特別多。

康師父

KK大師

筆者

HNR 佛系24

賽前同HNR友隊ss超級大合照

----- 廣告 Ad -----

比賽開始，第一個 Task 係要向前跑一百米，然後係沙灘搵地圖，己隊勝在有百米飛人 – 人肉挖泥K，一出發應聲彈出，雄姿英發，係大外檔飛奔，然後好順利挖出地圖。問題係 KK 係路痴，挖完就企左係度，連少少睇地圖嘅衝動都冇。但唔緊要，先發制人，後發制於人，最緊要有型。

右一: 人肉挖泥K，大會短片截圖

喺我哋生活嘅年代，有句說話叫做「執輸行頭，慘過敗家」，己隊深明箇中道理。當師父同我趕上之後，第一件事都唔係睇地圖，而係……「死跟」、「死跟」，無恥到大叫埋出黎，唔好執輸嘛! 話說 CP1 係近淺水灣喺面，而我哋跟左師兄向左反方向跑，跑跑下先覺得唔對路，點解得我哋兩隊跑反方向嘅? 腦海叮左一聲! ”奶”野……倒返轉頭跑，已經要係主車群尾後追，即刻諗起我哋生活年代嘅另一句說話「偷雞唔到蝕渣米」。

去 CP1 大概要經過一段平路、一段斜路、一段山路，跑開平路嘅師父，難以抑壓住興奮嘅心情，係平路駁哂老命跑，心急到背脊都刻住「趕路中」! 雖然追返唔少時間，但同時 KK 都面有難色。

講返轉頭，話說 KK 比賽前一日同當日都係處於肚痾狀態，食早晨入到餐廳第一件事係肚痾，痾完再食……食完比賽再痾……但都仍然繼續，多謝佢嘅努力，辛苦哂。

一跑就見倒佢不在狀態，之後嘅斜路同山路更顯吃力，手腳並用，總算去到 CP1。

接住落嚟嘅係上樓梯、上樓梯、上樓梯、落樓梯，然後落返去馬路，沿路都算順利，係 KK 有的吃不消嘅感覺。落返馬路搵引水道入口，己隊其實有好大機會入錯位，但咁啱見倒毅行教室隊係第二個位入，唯有再施展跟蹤本領，結果教室揀啱路，兩隊就一齊向 CP2 進發。可惜「入水容易出水難」，由於大家跑得太開心，略過咗引水道嘅T字出口，繼續向前跑左，沿途遇到都係行錯路而走回頭嘅師兄，冇比提示之餘，仲幫我哋吶喊助威、加油努力。當時精神真係為之一振，結果跑到盡頭，有塊牌寫住「此路不通」，崩潰，師兄都未免太絕情。此時此刻，子華共鳴。

沿路跑返出去，見倒其他隊跑錯路，我哋駁哂老命同佢哋講前面係 “倔頭路”，動之以情。然後有啲隊仍然會繼續向前跑，好有儒家精神:「明知不可為而為之」; 又或者純粹係師父樣子太古惑，完全唔可信。但點都好，同教室隊搵返正確出口，齊齊抵達 CP2。

CP2 玩矇眼執野，KK 平時矇人矇得多，今次就同師父一齊矇，背對背擁抱，再踎低執番……絲帶、小球等。雖然畫面令人不安，但順利完成，出發 CP3。

斷背K師父

途中基本都係平路，放鬆跑跑下就到，臨到之前，KK 終於引唔住要爆 (石) 啦，衝左入洗手間。完全幻想到佢係洗手間入面一路痾、一路心急、一路責怪自己嘅情景。而師父同我其實係出面偷得浮生半日閒，友誼第一，開心第二，安全第三嘛，比賽!? 享受就好。如果問 KK 係咩驅使佢肚痾都玩定向? 係愛定係責任呀? 佢會答: 係 Merrell 呀! xxxx! (硬性植入式廣告)

CP3 大會準備咗水同食物比參加者，當然仲有啦啦服務，為征途中咁多位參加者充充電，繼續剩低嘅比賽，多謝大會。

出發 CP4，係馬路交匯處就好似人生交叉點咁，難免會有啲迷失，好彩巧遇外國人隊，引領正確方向，齊齊拍住上斜。言談間得知，原來之前佢哋喺引水道都跑緊入倔頭路，但聽咗我哋講即刻 U-Turn，而家引領返我哋正確方向。種善因，得善果啦，善哉善哉。Thank You so much.

上完斜之後就要上山去 CP4，地圖可見有三條路，A路係最短路程，但要爬石上，友隊大概就喺哩條路上，年少多好，最後上到聲嘶力竭，但留下左美好嘅回憶同腳毛，第時仲有機會仲可以同子孫分享經歷，一切都係值得嘅; 而一把年紀嘅我哋係B路上，梯級爛路啫，仲叫應付得黎。

睇師父嘅笑容同手臂就知道上聶高信山有幾輕鬆。順利登頂，「嘟」一「嘟」個 bib，就衝返落山啦。

己隊去 CP5 係跟藍色箭嘴方向，原路落返去，轉入深水灣道落斜跑行人路去山路入口 (紅色交叉位置)，但路痴嘅我哋，係紅色交叉完全 miss 左山路入口，然後有第二隊沿住綠色箭嘴係迎面上嚟，命運嘅相遇令我哋有一個好有趣嘅對話:

對面隊: 喂，「趕路中」，我哋係下面上黎，冇路㗎，唔使落去。
己隊: 我哋係上面落黎，都無路喎，唔使上去。

經過 “倔頭一役” 之後，大家都心存猜疑，但總唔能夠打破人與人之間嘅信任，兩隊企左喺度周圍望，原來入口就係我哋左手邊、佢哋右手邊，只係比欄杆隔住左，太好啦，之後齊齊衝落 CP5! 真係「出門靠山友」，唔係又唔知要走幾多冤枉路!

CP5 去6係行溪澗，大會有咁嘅路線設置唔驚訝，驚訝嘅係有唔少攝影師係山澗中幫大家影相，坦白講，就算參加者一身輕行落去都覺得好困難，攝影師們你哋係點走入去架呢，敬佩!

攝: Charles Mak@run-pic

沿途就算跌要跌得好看 攝: Charles Mak@run-pic

千辛萬苦，終於落哂溪澗，去返去石屎路。KK 見倒隔離有條河，就好興奮同我哋講:「我準備好落河跑啦，你哋O唔OK? OK就黎架啦。」但有石屎路喎，千言萬語，終於說服到 KK 打消河中漫步嘅念頭，跑返去 CP6。

終點前最後一個 Task 係玩「潑水接」。而睇手臂嘅粗幼就可以判斷倒邊兩個潑水、邊個接……

結果係……

好明顯兩位係瞄準小弟多個瞄準個杯，真係唔好得罪兄弟……我哋比其他隊用多幾倍時間浸滿杯水，兩位真係要驗一驗眼，最後運埋水就完成埋個 Task，快快腳跑去衝線。2hrs51mins完賽，比上年快得多，而且組別第八，總算對得住鄉親父老! Yeah!

然後賽後總結係:

• 比賽好精彩;
• 地圖同指南針只係裝飾品;
• 重要嘅係隊友同山友;
• 山鞋平路輕、山路實、溪澗穩;
• 三人行必有蠢豬;
• 開心就好。

Merrell Momentous

等埋友隊ss，離開深水灣一齊食野，期間聽住佢哋講瘋狂做錯嘅選擇: 應平路去爆林、應山路去爬石、應大路去小路……頓時多少往事甜在心頭，上年嘅我哋何嘗又唔係咁樣呢。蓦然回首，大概最錯嘅決定做就最美好嘅回憶，汲取最寶貴嘅經驗，然後明天會更好。

2020，Merrell Challenge，再見。

#多謝Merrell
#多謝Fitz
#多謝膠隊友s
#多謝毅行教室隊
#多謝山友ssssssss
#多謝攝影師sssssss
#多謝HNR

佛系24 Facebook專頁

Fitz 連結: https://fitz.hk/?p=117084