中國與國際品牌 新疆棉花之戰
H&M 展開序幕
3月24日，中國官方媒體中央電視台於晚間節目發表網評，題為《H＆M 豈能吃中國的飯，砸中國的鍋》，拎返舊年 H&M 「關注針對新疆少數族裔被迫勞動」聲明大造文章，話 H&M「吃中國飯砸中國鍋」，國內以共青團為首嘅「紅軍」隨即一哄而上，呼籲全國抵制 H&M 商品。幾個為 H&M 代言嘅藝人紛紛花式跳船，同 H&M 劃清關係。而 H&M 喺網上商店嘅貨品亦紛紛下架，杯葛熱潮似乎一觸即發。
H&M 早前發表聲明，話繼續一貫方針，會通過全球認證嘅第三方來採購更可持續棉花，確保供應商遵守可持續發展承諾，不過呢個並唔係「政治立場」喎。
另一方面，大陸網軍將槍口對準其他國外品牌，有人羅列出一堆抵制新疆棉嘅品牌:
按圖放大
----- 廣告 Ad -----
名單之中嘅 Nike (耐克)，瞬間成為第二個戰場。
Nike 被翻舊帳
位於上海嘅Nike專門店
大陸網民發現 Nike 去年3月發表一篇名為 “NIKE STATEMENT ON XINJIANG” 公司聲明，內容話 Nike 供應鏈從未使用維吾爾員工，也沒有使用新疆紡織品和紡紗。
按圖放大
「耐克」(Nike 中國譯名) 隨即成為微博最紅嘅關鍵詞，唔少大陸網民睇完聲明後都話要抵制。抵制理由不外乎「一邊造謠抵制新疆棉花，一邊又想在中國賺錢?」或「國家主權不容侵犯，堅持抵制不守規矩企業！」之類。不過 Nike 暫時未有回應。
----- 廣告 Ad -----
新疆問題受西方國家關注
Nike 呢份2020年嘅聲明，其實係回應澳洲戰略政策研究所 (ASPI) 當時發表嘅調查報告，報告話 Nike 同 Apple 等跨國企業，都採用於受迫害嘅維吾爾人所生產嘅產品。
事實上，新疆問題多年來受到國際關注:
- 2018年: 國際組織「人權觀察」發表報告，引用大量具體案例揭示新疆鎮壓措施急劇升級。大量開設看守所、監獄、再教育營，關押超過100萬回教徒，強迫佢哋學習漢語、限制通信，以及取締宗教活動。
- 2019年: 《紐約時報》披露一批共有403頁嘅中共內部文件，證明有有多達100萬名維吾爾族、哈薩克族和其他少數民族嘅人民，被囚禁或軟禁。
- 2019年: 英國BBC電視台，首次公開新疆「再教育營」嘅實況，證明數以十萬計嘅回教徒被羈押
- 2020年: 澳洲戰略政策研究所 (ASPI) 發表調查報告，指數以萬計嘅維吾爾人被迫於全球知名嘅大型企業嘅代工廠裏面工作，包括 Nike 同 Apple
- 2020年: 美國智庫全球政策中心發表報告，指至少3個維族聚居地區，約57萬少數民族被迫離開家鄉，進行效率低下、高強度嘅棉花手工採摘工作。
- 2021年: 美國國土安全部指將在美國所有入境口岸扣留來自新疆地區生產的棉花和番茄產品。
- 2021年: 美國國會眾議院於2月提出法案，禁止從中國新疆地區進口由強迫勞動生產的產品，並對侵犯穆斯林人權的中國官員進一步製裁。
事實上，美國自2020年開始，已針對新疆問題，對多名中國政府官員實施制裁。而歐盟亦喺2021年3月，同樣制裁多名官員。同時，英國、加拿大、澳洲、新西蘭等西方國家，亦有聲明讉責中國於新疆嘅做法。
得罪方丈有咩下場?
面對西方各國嘅嚴厲指控及制裁，大陸亦採取多項「反制措施」，例如制裁多名美國及歐洲官員及議員，以及向中國國內法庭，對某些「涉案人士」提出控罪。
當中包括負責撰寫多份新疆研究報告嘅德國藉學者鄭國恩 Adrian Zenz，佢被新疆嘅法院起訴，控告佢嘅研究令當地造成經濟損失，要求賠禮道歉、恢復名譽並賠償損失。至於鄭國恩本人，就話對呢啲起訴一笑置之。
Adrian Zenz
而家央視帶頭起哄，抵制 H&M 同 Nike，又算唔算係官方嘅「反制措施」之一呢? 呢啲措施又會唔會成功，令呢股「反華勢力」「夾著尾巴逃走」呢? 咁就要視乎大陸民眾係咪「口裏說不，身體卻很誠實」了。
此外，Nike成功打入中國市場多年，同大陸各個界別嘅關係都係千絲萬褸，例如2017年同中國足球中超賽簽下10年嘅30億合約，亦贊助多個大型長跑比賽，咁呢啲關係絕對唔係話 cut 就 cut，大陸嘅抵制潮又會唔會波及呢啲活動呢?
----- 廣告 Ad -----
