On Cloudsurfer 家族鞋款是品牌主打項目，繼3月推出 Cloudsurfer 2 後，今年7月再推出 Cloudsurfer Max，一對專為長課打造嘅訓練鞋，而兩年前推出嘅 Cloudeclipse 亦功成身退；Cloudsurfer Max 成為 On 入面中底最厚的款式。
有別 On 傳統鞋款，Cloudsurfer 系列一直沒有內嵌推進板，即 Speedboard，因此腳感相對軟身。由2024下半年 Cloudsurfer Next 推出開始，CloudTec Phase 中底有不同程度軟硬度作不同練習之用，On 對三款鞋有以下定位：
- Cloudsurfer 2: 日常 jogging 及輕鬆跑
- Cloudsurfer Next: 可用作 Steady 至 Tempo 速度稍快的訓練 (編按：唯中底偏硬，長距離訓練對小腿有比較大負擔)
- Cloudsurfer Max: 厚底緩震鞋款，進入賽季適合大家長課之用
Cloudsurfer Max 結構賣點
鞋面採用工程網布，質感柔軟，透氣孔均勻分布，鞋頭與鞋側透氣孔較大可以提升透氣性，係香港相對濕熱嘅天氣，也可以係長課過程中有效散熱，保持雙腳乾爽。鞋舌與鞋身相連，有助減少鞋面因跑步動作滑移，導致鞋帶鬆脫、鞋面不穩狀況發生。Heel counter 位置用上襪套式設計，所以係腳踭加上 padding 作鎖實腳踭之用，避免甩踭情況出現；這種組合比較少於慢跑鞋出現，多數用於賽鞋上。筆者初著上，兩邊 (腳眼骨頭) 位置有頂住嘅感覺，但適應一陣後，並冇任何不適，於長跑訓練期間亦完全不受 padding 影響。鞋舌兩側略有加厚，讓腳背保持舒適。
----- 廣告 Ad -----
中底使用雙層 CloudTec Phase™，前後掌落差為 6mm (前掌 31mm、後掌 37mm)，重量 292g (男 US10)，與其他款式單層 CloudTec Phase™ 比較，雙層 CloudTec Phase™ 自然提供更好嘅緩震表現，係長距離跑動過程中更加穩定，讓跑者係 10多公里課以上嘅長課練習中作持續穩定嘅輸出。鞋底於落掌位置有橡膠外底，增加耐用度，係柏油路面跑步冇出現跣腳情況。
跑後感
長距離訓練應以緩震鞋款再優先考慮，保護你過程中可以穩定完成，因此 Cloudsurfer Max 作為長課使用鞋款，筆者並沒特別使用在快速課節如 Tempo 嘅訓練上，但多次係 18-20 公里左右嘅長距離練習使用。雙層嘅緩震帶來舒適感，沒有任何腳部不適，但嘗試提速至 5:00/km 或更快顯得反應不足，需要更大力量去推動，保守估計長課練習由 5:30/km – 6:30/km 亦不會有太大問題。以上以我個人能力去感覺，肌肉力量較強嘅跑者或可以更快速度作長課使用。
總結
Maximalism 厚底鞋依然為現今大趨勢，有 asics 近排推出最新嘅 Megablast，Nike 有 Vomero Premium。On 自 Cloudmonster 開始一直係跑步 category 上保留 1-2 款厚底跑鞋，但美中不足嘅地方係 On 鞋款於市場上訂價偏高，長課練習鞋同類型有大量選擇，身為跑者若非外貌行先，大可選擇 Nike Vomero 18 或 Vomero Plus，New Balance 1080 v15，或者近期熱門嘅 Puma Velocity Nitro 4 (呢款可謂性價比之王)。
----- 廣告 Ad -----
定價：$1,490
尺寸：True to size
