[竟然係咁] 新鮮蔬果未必比冷藏好

傳統智慧話：「食雪藏食物一定無新鮮咁好。」特別對於要講求新鮮嘅蔬果嚟講，大家喺超級市場買到嘅蔬果同生果，係咪真係所謂嘅「新鮮」就最好？

咪住先，其實大城市嘅「新鮮蔬果」，又係點樣嘅先？

「新鮮」蔬果嘅運送：

1. 除非你有自家農田，可以即摘即食，否則所有嘅流程，蔬果都係由農民收割後，再運送一個中央市場，然後再包裝及發送。
2. 以美國為例，一般蔬菜生果，由收割到市場，足足要用三日或以上，先可以到消費者手中。
3. 而消費者買咗之後，一般會存放一星期左右，先至食落肚。
4. 美國農業部更指出，當地嘅蘋果及梨，收割後會被保存至12個月，先推出市場。
5. 擺咁耐嘅原因，係因為蔬果收割之後會變熟，熟咗就易爛。咁農夫就索性提早收割，由得蔬果放喺貨倉自己變熟，到以令蔬果喺超市擺放時，係以最佳狀態見人。

冷藏蔬果流程：

1. 蔬果熟透後，即時採摘及加工。
2. 加工時會放入糖、維他命等添加劑，以及用熱水去殺菌。
3. 存放雪藏蔬果時，蔬果不會因而時間而有所變質 (理論上啦)

新鮮 vs 冷藏 邊個好營養？
首先要指出，無論新鮮同冷藏嘅蔬果，研究都指出兩者喺保存嘅時間，流失嘅營養其實唔算多。所以只要大家買咗之後，盡快食用，蔬果仍然對身體有益。

不過，「新鮮」蔬果因為提早收割，部份營養並未完全建立，所以呢啲蔬果嘅營養價值比熟透嘅蔬果較為低，其中最缺乏嘅營養會係維他命C。而收割之後，部份嘅蔬果嘅營養會迅速流失，其中青豆喺收割3日之後，流失嘅營養達51%！

至於「冷藏」蔬果，有研究指冷藏會流失營養，而蔬果在冷藏前嘅加工過程，亦有可能失去食品裏嘅維他命B同C呢啲水溶性營養。不過，呢啲蔬果會喺熟透嘅時候收割，所以可以抵消流失嘅營養。

結論：無論「新鮮」同「冷藏」嘅食物，去到超市都係經過唔同加工同保存程序，營養上有得又有失。所以點都係即摘即食就最好！不過喺香港呢個連農田都用嚟起樓、堆泥頭嘅城市，想食真正新鮮嘅蔬果真係談何容易？

資料來源：Authority Nutrition

更多:
Fitz.hk Facebook專頁
蛋黃越深色越有營養?
香蕉就要「這樣吃」，破除飲食三迷思! 吃對方法更健康
Fitz Diet 飲食