[特首選舉] 我們要一位落場打波的特首

特首選舉，你同我都無票，嗰三位候選人打生打死，真係 Who fxxking cares！

不過，三位當中一位最後被選出 (或被欽點) 嘅人，未來五年都同大家息息相關，對佢有少少期望，都好應該啩。

我嘅要求，好簡單，亦好幼稚，就係希望嗰位係落場一齊打波嘅特首。

講下故事先：

迪士尼頻道，有套自己製作嘅卡通《飛哥與發仔》(Phineas and Ferb)，劇集入面有位邪惡科學家，佢製作咗一個機械人，叫洛文。

科學家雖然對洛文好差，成日羞辱佢，但洛文仍視科學家係爸爸，無時無刻希望令科學家開心。所以，洛文內心好孤獨，佢好希望有朝一日可以同科學家，好似一般父子 (美國式) 喺後園玩拋接波。

中間係機械人洛文，左邊係邪惡科學家。

喺香港，小朋友活在功課壓力之下，能夠跟他的父母一齊玩，大多時都係奢侈品。而喺現實生活之中，你與我喺艱難環境之下，獨自面對生活上嘅挑戰，而嗰啲應該幫助大家嘅高官達人，只係企喺場邊，指指點點。

我當然唔會視特首為我老豆老母，我只係希望，呢位特首可以站喺香港人一方，同大家一齊落場。無論呢場波係贏係輸，「要贏一齊贏，要輸一齊輸」。我哋嘅末來，應該掌握喺自己手中。

一幅圖代表千言萬語。

投票前夕，候選人2號突然造訪球場，訪問香港足球代表隊。之但係，現實情況就係咁：

林鄭辦公室短片截圖。https://www.facebook.com/carrielam2017/videos/191569771344976/

候選人2號，就只視球員為佢嘅布景板，講完。

至於佢眼中嘅香港市民呢？

大家自求多福啦。

按：根據選舉條例，要介紹所有候選人：1號曾俊華 、2號林鄭月娥、 3號胡國興