今朝跑完步喺炮台山投注站個位轉左，過馬路去城市花園酒店，前面有對老夫妻推住架裝鐵支雜物嘅手推車極慢咁過。
喺呢個行人綠燈著住嘅時間，一個光頭叔叔揸住架泥頭車慢速轉左，完全睇唔到馬路有人
你第一時間嘅反應係⋯（係咪好想小佢呢？）
我驚兩邊老人家都睇唔到大家，我企喺黃色間條上面，指住盞綠燈提佢，「綠燈呀，你轉錯咗呀，綠燈呀」
呢個時候路人甲以光速回應：「綠燈呀，你老味」。司機大叔未必聽到呢句，仲笑笑口同我講sorry。
問題係點解我同路人甲反應咁唔同，其實只係因為我知盞轉左燈同直去燈好多年前係同步嘅，我都試過佢改咗之後，揸電單車都一時轉錯咗。一個司機位咁高，唔太睇到路人嘅阿叔轉錯咗係好正常，最重要佢係慢速（佢有揸重型車應有嘅謹慎），唔係我就唔會美國隊長咁企喺架車面前要佢睇燈。
小人容易勸人難
記得以前有個廣告講曾志偉買菠蘿包，嗰一蚊喺社會不斷被再用，然後創造更多價值，其實呢一啖戾氣都一樣（我唔揀怨氣呢個字，係因為戾氣來自暴戾，係真係粗暴，唔係埋怨咁簡單）。
路人甲嘅戾氣早早累積，一朝早就洩出嚟，返工前個心都不斷小緊個司機，返到公司再講頭先條PK，然後班同事再和應個司機黐線（再估佢可能係內地嚟），再無限延伸。
個司機如果真心覺得被辱罵，又會鬧翻佢，然後再塞住條路，警察嚟，然後成條電氣道又發癲，成班經呢度嘅人心情都差，覺得香港唔好，日日都唔順，唔怪得之仔自殺等等，政府PK，大陸收工。
返返去故事開頭，如果一早話你知盞燈係有少少FAKE到人，又會唔會改變你嘅反應？
係咪有時我地反應過快過急過大？
去到食早餐，見到對面個朋友光速祈禱謝飯，我又謝飯，感恩有個主內弟兄共進早餐，我專登祈多d，祝福佢身體健康同食嘅嘢令我地有氣有力，完咗仲好奇緊佢祈禱內容之際，我同佢望食具兜都發覺無叉用，我先用匙更食住先，佢去隔離檯拎叉嗰陣，仲專登拎多支佢我。
同一個早上，同一條路線，天堂同地獄，戾氣同和氣，都一線之間
希望呢個小紀錄對你有叉用
更多：
Fitz.hk Facebook專頁
[恐襲波士頓馬拉松後感] 有一種城市叫波士頓
我們都患上危疾，名叫負面癌
馬拉松秘技之笑到最後
Law少 許耀斌@Fitz.hk
Fitz Running 跑步
人稱Law少，前電台主持及監製，酷愛體育運動，多次參加馬拉松及毅行者活
動，近年更嘗試進軍三鐵及渡海泳。對於跑步、對於行山、對於比賽，均有深刻而令人動容的看法。著有《原來在沒有盼望 的地方才需要盼望》。
>
