Fitz > 運動 Sports > 三項鐵人 Triathlon > [在陶波遇上墨菲] 新西蘭 IRONMAN TAUPO 賽後記!

1949 年,美國愛德華茲空軍基地,空軍上校 John Paul Stap 正在進行一項名為 MX 981 嘅研究計劃,希望用高速載人火箭雪橇 Rocket Sled 測試火箭減速時嘅 G Force 超重反應,萬事俱備反覆檢驗之後,最後計劃都係因為儀器失靈發生咗事故而失敗! 團隊中嘅工程師 愛德華 A 墨菲 Edward A Murphy Jr. 上尉發現,一名技術人員本來負責連接線路到受試黑猩猩所佩戴安全帶上嘅感應器,結果讀數竟然全部係零,後來先揾到原因原來所有感應器都接反晒,但竟然無人發現 !墨菲上尉於是好感慨咁得出一條影響塵世嘅定律 “Anything that can go wrong will go wrong! 任你機關算盡,凡事只要有可能出錯,咁就很肯定會出錯!”

後世爲咗紀念墨菲上尉呢個震古爍今嘅偉大發現,於是用佢嘅姓氏尊稱呢條充滿大智慧嘅定律,是為“ Murphy‘s Law 墨菲定律“!

Lake Taupo大過新加坡

2018年2月28 號,經過大半年嘅努力鍛練,我減到得番154磅,體脂長期徘徊喺10%附近,自覺作戰狀態良好之下同 MidageOn9 大伙兒終於底達 新西蘭陶波市 Taupo。好藍的天,好綠的山,好清新的空氣,之前天氣預報嘅連續一星期雨天可能畀千幾個鐵人參賽者嘅念力影響變成晴空萬里,有時甚至揾滴雲睇下都無!興奮嘅心情令我哋忘卻時差,放下行李之後馬上出去揾嘢食兼睇下第一項游泳嘅比賽場地 Lake Taupo 陶波湖,呢個淡水湖非常非常之大,面積達到616平方公里,616平方公里即係幾大? 即係大過成個新加坡! 湖水十分清澈無風無浪,雖然淡水無海水咁浮但應該更容易游…….. 我以為! 雖然呢度要成夜晚八點幾九點先天黑,食過晚飯後大家都早啲休息,準備聽日去做選手登記同試單車賽道。

Ironman 喺 Taupo 陶波市應該係年度盛事,市中心內幾乎無間斷咁見到 IM Logo,起點,轉項區亦即終點附近更加係近乎 Monogram,任你識凌波微步都避唔到。做完選手登記 Check 完膠衣之後,大家盡快砌番好架單車,反覆檢查過 Garmin 碼表,Power Meter,心跳帶,轉波器電池一切妥當之後,喺教主帶領下去試吓踩單車嘅比賽路段,沿路風景好靚,靚到好似廣告咁,如果你記得大概就好似90年代嘅 Mild 7 煙仔廣告裏面藍天白雲,小黃花青草地樹影如梭嘅踩單車畫面咁上下! 踩咗十幾公里返轉頭,當我沉醉喺 Mild 7 場景裡面,忽然傳來好大嘅 “仆” 一聲,我知道我爆左呔,好在之前阿 Sir 同我講過條路好多碎石,心理上已經有咗可能爆呔嘅準備,Shit 一聲之後慢慢停落嚟,叫同伴先走然後用偉大嘅發明 Whatsapp 再 GPS 定位叫 Support Team 開車接我返去!

返到住宿地點檢討過今日嘅試踩,賽道並非之前講嘅全部平路,但真正大斜坡只有一條喺起步階段,其餘嘅地方應該好容易踩冇乜難度………我又以為! 至於跑步賽道踩車時見到頭段沿着湖邊跑,Athlete Informant 上面嘅顯示亦都係喺湖邊附近,我持住跑步係我嘅強項,心諗平坦嘅全馬對我應該冇乜大問題 …………我再又以為!

第二朝晨早0700 ,大家謹遵教主 Kim Sir 教誨,特登揀返真正比賽相同時間落去湖度試水,我哋以為好早,但去到湖度時發現已經有兩三百人喺度準備試水試緊水同埋已經試完水! 大家趕緊着好膠衣進行下水禮,清洌涼爽嘅湖水令睡眼惺忪嘅我哋即刻醒晒,神清氣朗咁游咗一千幾百,湖水相當好游,比上次喺 Cairns 嘅大風大浪差天共地! 我對上一次練水游足5公里都可以保持喺每100米2分鐘之內,咁好嘅情況令我更有信心游得好過上次! 返到岸上面從大家嘅眼神睇到,之前嘅猶豫不安已經變成信心與期待,咁多個月來嘅汗水與疲累,就等明天一次過換來跨過紅黑拱門嘅興奮同榮耀!

因為我之前已經打過一次226,完成賽事估計應該冇問題,但因為我今次希望做一個好啲嘅成績,小小緊張依舊難免,但嚟到呢個時候擔心乜嘢都冇用,準備好聽日要食嘅飯團之後,大家都各自早啲休息,好迎接期待已久嘅明天一戰!

水中起步

3月3號凌晨五六點,大家穿上游泳膠衣,將最後所需物品放喺T1轉項區,再一次檢查單車,呔氣之後緩緩步行去湖邊,如往常一樣一句 “終點見“ 之後,各自收斂心神準備開賽,今次游泳賽事起步同以前嘅唔同,唔係由沙灘衝落水而係要先游大概百多米,去深水區一路踩水一路等待起步,晨曦陽光之下成千人戴着唔同顏色嘅泳帽喺水裏面載浮載沉等待開賽,場面的確壯觀!

“砰“ 的一聲巨響之後賽事正式開始,我依照經驗儘快搵一個差不多泳速嘅喺後面勾住佢游,食佢嘅浪減輕體力支出,游咗一陣我我幾次換氣時都見唔到黃色浮波,我抬頭望吓原來我經已跟住人偏離咗賽道一大截,唯有馬上放棄勾人急急游返去浮波附近,好不容易又游咗左一大截,但我發覺神推鬼擁之下我又偏離左賽道,唯有咬咬牙加把勁游番返去,游過轉折點回程中間我又發現遇上水流划水事半功倍,捱左一輪終於望見終點,出力游到去踏上綠色地氈定一定神望一望錶,居然比我預計時間慢咗一大截,原來足足游多咗四百幾米! 冇得怪人只能只能怪我對自己對泳術估計太高掉以輕心!

玉帛相見

入到轉項區我攞住袋單車裝備,負責幫我嘅係一個老伯伯,但我望一望後邊有另一位 helper 係老婆婆,我除咗一半嘅膠衣登時停低,老伯伯問我 “仔,幹嗎了? Son, what’s wrong? “ ,我用眼神望一望向老婆婆然後話比佢聽我裏面光脫脫條條揈,老伯伯笑一笑然後話 : “我諗佢乜都睇夠啦! I think she saw enough! “ 我諗下又覺得有道理於是繼續除埋落去,當我揈下揈下對住伯伯時候,小喇叭我先發現原來伯伯後邊仲有個 helper 係女人! 但時間關係都唔理得咁多馬上一面食飯團一面換好單車衫衝出去準備攞單車!

攞咗架單車 Set 好 Power Meter 確定一切無誤,即刻推去起步點上車,”格” 一聲鎖上 lock 鞋之後,180公里單車賽程正式開始。阿 sir 之前已經俾咗一個 Race plan 過我,為咗保留體力每45公里按照不同嘅 Power 同心跳去踩,頭3公里一切正常,正當我個心定落嚟嘅時候,Garmin 碼錶上面嘅一切數據除咗距離同時速突然全部消失!我正在上坡亦估計希望係暫時性所以無理佢繼續踩,果然15公里之數據又出現番,我暗暗慶幸大步過。誰知踩多一陣又係乜都冇晒! 去到30公里我覺得唔係好掂,於是停低落嚟重新 set up 個 Power meter,再上車之後一切終於正常番,但行咗十幾公里之後情況又再出現,我知道我應該係遇上偉大嘅 “ 墨菲定律 : Anything that can go wrong will go wrong!“ 驚魂甫定之後我決定憑記憶中嘅感覺一路踩落去,按照阿 Sir 吩咐每45分鐘補給 Power gel 或者食物,沿途碼錶上面嘅數據鍾意就出現唔鍾意就唔出現,我只係知道我踩咗幾遠同埋時速。

今日天公做美一滴雲都無,南半球猛烈嘅陽光開始出嚟,汗水將我嘅體力慢慢帶走,沿路其實有好多暗斜上上落落,加上有兩大段路逆風而行,要頂住強風踩感覺好辛苦好吃力,去到 130 公里 墨菲定律 再發神功,雖然之前明明肯定叉滿電,我隻碼錶突然間顯示一句低電量跟住直頭熄埋罷工漆黑一片,嗰刻開始往後嘅 50 公里我完全憑感覺盲踩,我憑記憶總之大腿二頭肌邊忽肉抽住大約係百幾 watt,另一忽肉開始崩緊又係幾多 watt,猛烈嘅陽光曬到我個背脊開始痛,但睇到路旁嘅 IM 標示150km……… 160km,終於見到170km個牌,剩返只有 10 公里,睇下隻手錶我知道 PB 冇乜希望,但 IM 嘅精神係 Nothing is Impossible,我再加把勁盡力再踩,終於入到市區兩旁人聲沸騰,數以百計佢唔識我我唔識佢嘅觀眾挾道歡呼,我落返下手儘量用懶係有型嘅姿態衝入轉項區,除咗 lock 鞋跟手好唔型咁零速跌車,好在冇穿冇爛冇受傷!

真正嘅比賽其實從跑步先開始

三項鐵人圈子裏面流傳一句說話,”游泳係熱身 單車係過程,真正嘅比賽其實從跑步先開始!“ 三項裡面跑步係我嘅強項,特別係今次落車之後我感覺冇上次喺 Cairns 咁倦,但因為踩車嘅時候冇晒數據參考,令到我唔知會唔會判斷錯誤用多咗力! 但已經落咗地唯有盡力跑!

頭兩三公里我保持番被醒唔快唔慢以免抽筋,三公里之後我正準備加速,但嚇然見到前面嘅係一條斜路,步伐登時慢咗落嚟,唯有慢慢 jog 上去,然後又再落斜,如是者我先發覺原來賽道係有好多上落暗斜,同我預期中嘅平路相差好遠! 我唔敢跑太快驚再上斜嘅時候會爆偈,跑到十公里睇下隻錶嚇咗一跳,我已經好耐未試過十公里需要1小時15分鐘,但點辛苦都要殺埋佢,十五、六公里我呼吸開始困難口乾舌燥,小膁隱隱作痛,對腳好似踩左入水泥度咁舉步維艱,呢種久違嘅感覺竟然同我喺 陶波 呢度相逢!

我 撞 牆 !

正如所有姣婆都守唔到寡,所有阿叔見到靚女都眼碌碌,所有跑者都撞過牆! 撞牆唯一嘅解決辦法,就係調節呼吸,到咗水站嘅時候慢慢食返少少碳水化合物,飲啲運動飲料,或者乾脆啪幾粒糖,我全部做晒! 情況慢慢好轉,我又成功跨過咗一面牆!

終於過咗半馬,我身體好倦但意志極為旺盛,我絕對唔可以係我嘅強項倒下,我努力搾盡體能令雙腳提腿反覆向前,但忽然我發覺我老友呀 墨菲 又來搵我,我左腳鞋底唔知幾時入咗粒沙或者細石,磨到我腳板底好痛。下一個水站我停低落嚟除左對鞋檢查一下傷勢,天殺的石仔倒咗出嚟但我發覺我已經生咗個大水泡,每行一步都由腳底痛返上腦!但仲有十幾廿公里老虎蟹都要捱埋佢,於是我選擇胡思亂想分散注意力!

諗吓今晚完賽返去食營多撈麵定出前一丁?
諗下一陣間過終點幫我帶上獎牌嘅洋妞靚唔靚身材索唔索?
諗下聽朝瞓到日上三竿定係早啲起身搞掂腳底粒瘡?
諗下前邊個女選手屁股咁圓點解個樣咁寸?
諗下最重要嘅係一陣用咩姿勢衝過終點拼門?
諗下我下一個目標先搞掂七餐一宿存款充足還是打下一個 IM?
諗下我打到殘晒返去約邊日做飛素定先做全身皮膚護理好?

諗下諗下加上撞到隊友吹下吹下,唔經唔覺終點在望,最後兩公里,我鼓其餘勇拼埋最後幾滴力氣昂首闊步向前衝,進入最後直路,難得開賽十幾個鐘頭之後,兩旁依然有不少觀眾為每一位跑過嘅參賽者歡呼打氣,跑上紅色地氈終於跨過紅黑拱門,我開心到忘形跳起落地差啲仆街!

Welcome back, You are an IRONMAN !!

攞完獎牌攞完毛巾,工作人員即刻拉咗我去磅重,點知發現我比選手登記嘅時候足足輕左5公斤,佢哋好緊張猛咁話要幫我量血壓,又叫我訓一陣坐下飲啲糖水呢樣果樣,我唯有笑笑口咁同佢講,我淨係好肚餓不如你帶我去食嘢? 十幾個鐘頭裏面我淨係食過一個飯團,一隻蕉,幾塊餅乾,兩粒糖,同埋好多好多好多包 gel ,我諗我未來幾個月都唔會食任何 gel 狀形態嘅嘢!

食咗兩個麵包小小肉同一大杯雪糕之後,心神終於定返落嚟魂魄歸返位,我好倦但我好滿足! 雖然我唔可以成功做到 PB,但我又一次完成咗呢個艱難嘅賽程,至於 PB? 下一次囉,我得個五十幾歲,只要 keep 住玩同你鬥長命我一定去到 Kona!

每一次打 IM 都係一個好開心嘅旅程,除咗我自己之外,可能破咗 IM 齋報名而未能完賽紀錄嘅大馬拿督院友,拼命三娘法國C9,好很靚仔十分有型消防員,條褲永遠好短心口成日好低嘅貓女,MidageOn9 靈魂人物精神領袖眾人師母中國(裔)美(藉)人 陳女仕 JoJo 一一完成第一次 Full IRONMAN 賽事,教主姚氏 Kim Sir 更加中途訓覺都做出 PB! 幾位參加 70.3 賽事嘅 On9 Iron ladies 亦無驚無險順利完賽,可喜可賀! 再次証明 IRONMAN 並唔係可望而不可即嘅洪水猛獸天國階梯,只要有心只要肯苦練,人人都可以係鐵人!

今次同 墨菲 幾次反覆相遇可說係始料不及,但其實歸根究底都係我自己體能未夠強,Strength 鍛練得少,單車長課訓練不足,加上掉以輕心冇仔細研究賽道爬升幅度等,與人無尤! 但無問題,成敗不外成長學習嘅旅程。汲取教訓 前事不忘後事之師我下次一定做好尐!

只要有下次,總會有 PB!

下一場 Full IRONMAN 226 見!

Fitz 文章連結: https://fitz.hk/?p=89247


更多:
Fitz Facebook專頁
人若然忘記了愛,忘掉同時間比賽……!
[新西蘭Taupo Full Ironman] 明明已經過226 點解仲要452?
[Ironman Cairns 226] 一切從狗噏開始……!
[IRONMAN Phuket 70.3] (1) IRONMAN 是一件很浪漫的事情!
巖巖巉巉蝦兵蟹將從忐忐忑忑到戰意高昂出戰 Ironman 70.3
[Road to Ironman – 番外篇] 鐵人 · 有愛!
Fitz Triathlon 三項鐵人


文章為作者意見,不代表Fitz立場。