減肥，一定要用腦

是咁的，最近健身界流傳一條短片，講述內容一名大隻佬如何 vs 某傳銷公司的所謂體重管理教練:

*內含大量粗口

背景是某傳銷公司主要傳銷其出品嘅蛋白奶粉代餐，食咗佢唔洗食正餐就可以減肥、控制體重，其實都已經街知巷聞，甚至返工一定會遇到有人派傳單叫你試下佢地嘅營養代餐。

講返條片，內容真的非常好笑，大意為如下:

1. 對方為「體重營養教練」(實為Sales)，叫人飲一杯 Protein Shake 做代餐，唔洗食正餐就可以減肥。而大隻佬 Rock 哥反駁﹕鬼唔知食少D野可以減肥咩！係人都減到啦~  之後有錄音有真相。
2. 女 Sales 想以價錢攻陷大隻佬，講到自己嘅奶粉只要14蚊一杯，而大隻佬飲 Whey 多過你食米，反擊其實飲 Whey 一杯價錢只要5蚊。然後對方竟然用乾炒牛河回招﹕你係出面食乾炒牛河都要50幾蚊啦! (小妹表示: 一個乾炒牛河接近1千卡路里，除非我將個牛河做代餐，都仲有營養過你杯Protein Shake。)
3. 大隻佬表示自己飲開個隻 Whey 最易吸收，而女 Sales 開始話無論次: 隻奶粉吸收，唔代表你個人吸收架嘛~ 起碼有9成9人都吸收唔到，你係其中一個。(鏡頭一轉，大隻佬震下胸肌大叫: 你當我流架)
4. 返去條聲帶: 女 Sales 問大隻佬: 你平時飲多好水係未即刻去廁所? 點解你咁多尿痌? 因為你身體唔吸水囉~(黑人問號之傻的嗎? 飲水去廁所代表身體唔吸收水份? 咁係未即係我食完飯要去廁所都係我唔吸收? )
5. 最後女 Sales 出動女性最終絕招——發爛詐: 依家唔係你唔明，係你唔想明呀~ (小妹表示﹕你發爛詐都無用架，咁你講野真係好難明喎!)

代餐減肥，真係有用?

基本女性每日大約要2000-2200卡路里(19-30歲)，男性則要2600-2800卡路里(19-30歲)。 當然每個年齡所需、活動多寡都有影響數值，就算用到基礎代謝率 (BMR) 計算每天總消耗的能量 (TDEE)都會有出入。但可以肯定同係人都知嘅事實” 你吸收唔夠自己所需卡路里，消耗大於輸入，一定會瘦。

而代餐，將你每餐吸收卡路里由約500-600減低只有200卡左右，咁就一定會瘦。但長時間落去，你有無諗過身體入面會發生咩事：

1. 單飲奶粉代餐，缺乏澱粉質、脂肪及其他營養素，導致身體營養不均
2. 因為身體長時間處於營養不均同飢餓狀態，令身體出現訊息要儲存加多脂肪
3. 飢餓時消耗不單是皮下脂肪，更會分解肌肉，令新陳代謝減慢
4. 新陳代謝減慢，令身體儲存更多脂肪

成件事就會不停地獄輪迴，表面瘦咗，但入面儲存一大堆你睇唔見嘅脂肪。

• 磅輕，只係因為唔見左部分肌肉，而唔係脂肪
• 代餐，長時間只會變「減肌」

Nothing will work unless you do

減肥、控制體重、增肌定係健康，統統只有二種方法。做運動，同控制飲食。

依家網上好多咩五分鐘減肥法，其實都係吸引你去睇佢條片嘅手段。如果做三、五分鐘就可以減到肥，健身中心都要全部執粒。的確 HIIT 同 Tabata 以高強度的間歇式訓練係會有幫助，但最少都要做2-3組。而入面好多動作看似好易做，但因為講求急速，隨時做錯而整親都唔知。例如深蹲好易用錯膝頭發力，平板支撐 (Plank)、登山者 (Mountain Climber) 呢類動作，腰腹姿勢好易太高或太低，如果本身有下背腰痛更加要小心隨時傷上加傷，最好都係搵返個專業人士幫幫手先好做。

最有效嘅方法，都係努力做帶氧運動同增肌。帶氧運動超過30-45分鐘，已經可以令身體燃燒脂肪。而增肌唔係叫你去變杜汶澤，只係做返適量重力訓練，令肌肉線條結實已經足夠。肌肉可以提高返身體新陳代謝，每1磅肌肉每小時可燃燒6.5卡路里，而脂肪只能燃燒1.2卡路里 ，所以點計，都係做運動更有著數!

咁當然，最重要一環就係飲食，多菜少肉一定走唔甩，重要唔好食太多加工製品、糖分更加係人容易肥胖主因，身體需要適量油脂同鹽分，但對於糖分，就盡量唔好食咁多啦。

以上純屬個人意見同知識。

講到尾減肥同做人一樣，要用腦，唔係人話咁就跟住去做，話食咩就食咩架。

青藍 Facebook專頁 

Fitz 連結: https://fitz.hk/?p=97695

更多:
Fitz Facebook專頁
[陳奐仁健身神器] 戰繩 Battle Rope
談健身室安全
[Sportential 運動潛能] 八個健身室明星「成名大技」
Fitz Fitness 健身