Fitz > 運動 Sports > 跑步 Running > 我愛上了跑女 她愛上了麥理浩 (上)
我唔可以出我老婆 (前妻) 張相,唯有出佢啦。麥理浩 (左)

網上大大聲,現實得把聲! 我100%肯定,Fitz 嘅作者陳伯 (no offense) 肯肯定係一條溝唔到囡囡嘅可憐蟲!

點解我會咁肯定? 我誓神劈願咁講,因為我曾經 (注意,係曾經!!!!!) 同一位「跑步女神」共諧連理,但好可惜好可惜好可惜,我哋最後緣份告終! 令到我滿身 (仲係滿心) 傷痕!(陳伯《毒L,跑場覓真愛啦! (上)》,簡直係挖苦我!)

是咁的,我並唔係陳伯見慣見熟嗰班「倫敦金才俊」,我只係一個普通打工仔,返朝九晚九 (當然包括幾個鐘OT)。若干年前,喺公司溝咗件又係普普通通嘅OL (隔離 Department 嗰啲)。最初,大家都好開心成為一pair「普通」情侶。女友最鍾意上網搶1蚊機票,然後我哋砌夠四日長假 (當然有時要 sick leave),趕頭趕命飛去沖繩四日三夜除咗搭飛機去酒店 check-in 都唔記得去過咩地方 (剩係記得部飛機好多BB喊緊)。

講返運動,當時我哋兩個一啲都唔鐘意郁動,每年最大運動量嗰次,就係跟住《X假期》去大東山睇芒草,或者去大帽山睇冰 (結果封咗路,塞咗喺荃灣幾個鐘)。渣打馬拉松嗰日,仲因為唔可以喺崇光行去時代,而同差人嗌交!

好嘞,一年多啲,見人哋生個BB出嚟呃得下 like,於是就開始計劃結婚。

而家睇番,剩係張poster都令人有啲作嘔。

我哋同普通香港準新人一樣,籌備結婚第一件事,唔係徵詢家長意見,而係去會展「結婚博覽會」。呢啲博覽會嘅吸引之處,就係1蚊乜乜乜。就好似書展1蚊買到本書,美食博覽1蚊食到粒飽魚,BB展1蚊買到條尿片囉。不過我哋喺結婚博覽,又發現唔到有1蚊1圍酒,連1蚊張餅卡都無。最後我哋竟然拎晒啲積蓄,book咗婚紗book咗攝影師,去台灣懇丁影婚紗相。

而我嘅惡夢就正式開始了!

當時,我女友講咗句大家耳熟能詳嘅說話:「我要喺結婚時保持最佳狀態!」於是,佢走去減肥 keep fit 希望喺大半年後嘅婚紗相,既搵到條腰,又睇到幾條線。

佢食咗兩日紫薯之後,然後話胃痛放棄咗。後來,又聽人講做運動有更好效果。不過好彩佢當時出名 LH (編按:LH 網絡圍內術語,唔方便直接翻譯,總之好窮啦),所以佢唔係去健身室 join plan,而係落咗運動場跑步 (佢話自己中學時運動會攞過獎)。就喺嗰幾個月跑步嘅日子裏面,佢認識咗一個跑會,再跟埋人哋一齊跑。

結婚前,大家都係各自生活,所以我都唔知嗰半年對佢有咩改變。只係婚期越來越近,見佢嘅身型又越來越好 (至少有番條腰),內心當然好開心,我仲鼓勵佢多啲同班跑友跑多啲。

結婚之後嘅幾個月,就係我哋兩個最開心嘅日子。然後,佢跟咗跑會嘅跑友,參加咗毅行者。

而我就正式失去一段美滿嘅婚姻。

圖: WL

(三之一,待續)
本文為作者觀點,並不代表Fitz立場

Fitz 連結: https://fitz.hk/?p=99824


更多:
Fitz Facebook 專頁
毒L,跑場覓真愛啦! (上)
從跑步中見識香港人有幾仆街
Fitz Running 跑步


文章為作者意見,不代表Fitz立場。