大量蔬菜點存放? 3大蔬菜保鮮方法

香港菜價近日波幅甚大，唔少人都買多些少菜以備不時之需。

近日香港出現多次「缺菜」危機，唔少人都買入大批蔬菜以備不時之需。假如大家屋企有大量蔬菜，點先可以保存得耐啲呢? 綜合網上各方專家講法，保鮮蔬菜有3方面要留意。

冷藏與非冷藏

首先將買入嘅蔬菜分開兩批: 冷藏與非冷藏。

非冷藏蔬菜

• 未切開嘅瓜類、球莖類蔬菜，包括南瓜、青瓜、大蒜、鮮准山、薯仔、芋頭、番薯、紅菜頭、紅白蘿蔔、蕃茄、洋蔥，以及椰菜、黃牙白等大葉蔬菜
• 上述呢啲「非冷藏」蔬菜可存放於室內陰涼乾爽地方，最好用疏氣蔬菜籃存放，以免積聚濕氣。一般可存放一星期 (擺得耐未必會變壞，不過有機會影響味道、質感)
• 薯仔擺得耐會出芽。台灣農業部建議國民唔好食用出芽嘅薯仔，話出芽仔有毒，要成個丟棄，切咗帶芽部份煲嚟食都唔好。
• 蘿蔔、紅菜頭等球莖類蔬菜，頭頂會連埋塊葉。買返屋企後最後切走佢，葉片會吸收球莖養分，令球莖難以保存。

球莖類蔬菜嘅葉子需要切走以便存放

----- 廣告 Ad -----

薯仔有芽不宜食用

冷藏類蔬菜

• 包括大部份菜葉類蔬菜、芽菜、粟米等
• 任何一種切開咗嘅蔬菜，都要包好放入雪櫃
• 去超市買嘅蔬菜，如果由冷櫃拎出來，返到屋企都要放喺雪櫃
• 盡量放入雪櫃嘅「蔬菜保鮮格」
• 部份蔬菜好怕過度低溫: 蕃茄越雪越易爛，節瓜好易結冰
• 將蔬菜放入雪櫃前，注意蔬菜濕度 (見下段)。

超市買返嚟嘅菜，如果由冷櫃拎出，返屋企都要放入雪櫃。

濕度要適中

• 任何蔬菜最大敵人就係水份。蔬菜水份過度濕潤，會令菜葉腐爛，過度乾燥菜葉會枯萎、變黃
• 非冷藏類蔬菜要存放於室內陰涼地方，唔好畀太陽照到
• 冷藏類蔬菜可依照以下步驟:
  1. 購買時盡量揀選無被淋濕嘅菜，貴少少都唔怕。菜檔通常會呢幾種菜浸水: 唐生菜、菠菜、油麥菜、通菜、西洋菜，如果唔係即日食用，就盡量唔好買呢啲浸濕嘅菜。
  2. 菜拎到返屋企，攤開一陣，吹走啲濕氣，拆開扎住菜嘅橡筋或繩，摘走帶黃嘅菜葉
  3. 用廚房紙濕少少水，將蔬菜包住。外面可再包咗一層報紙，然後放入膠袋
  4. 放入雪櫃「蔬菜保鮮格」(如有)，無嘅話放喺無咁凍嘅一格

唔係即日食用，盡量選擇乾身蔬菜

煮前浸水半個鐘

• 菜葉類蔬菜雪得太耐，縱使未變壞，唔多唔少都會「dry dry地」
• 煮呢啲菜之前，可先浸水15至30分鐘，除可洗走蔬菜農藥，亦可令菜葉變回青綠

早兩年網上流傳嘅圖片，有人真係買一堆菜返屋企。

無論蔬菜使唔使雪，存放屋企嘅蔬菜一定要隔一兩日留意下，見到有爛葉、變壞，甚至惹蚊蟲等情況，就要盡快處理。

資料: 東網、商周、儂儂