----- 廣告 Ad -----
身為一個運動網站編輯，平時當然會接觸唔少運動裝備，今次要講嘅產品，應該算係大眾化類別。喺過去疫情幾年，相信唔少人買過、著過、行爛過，甚至乎已經丟埋嘅行山鞋或者越野跑鞋 (以下統一叫「山鞋」)。尤其喺疫情後行山熱潮冷卻，唔少品牌劈價清貨，人人基本上都有一對喺屋企「看門口」。之不過，喺執平貨嘅同時，又有無諗過點先為之一對好嘅山鞋，屋企嗰對又啱唔啱自己呢?
先旨聲明，寫呢篇評測前，我係一個「被縱壞了的小孩」，正確嚟講應該係對腳「被縱壞」。何解? 幾年前試著厚底跑鞋山鞋，被嗰種「軟熟」嘅腳感吸住咗，而本身腳掌較大兼有少許扁平足嘅我，自然又會選擇一啲闊頭闊身鞋款，貪佢哋夠舒服，過去幾年如是。到今次收到 Topo Athletic 嘅兩款山鞋，著上腳第一個反應係: 「嘩，乜咁硬嘅!」坦白講，我都要著咗好幾日先適應返呢個感覺，貼地得嚟又好實在。
左邊為 MTN Race 3，右邊為 Terraventure 4
今次要試著嘅 Topo Terraventure 4 同 Topo MTN Racer 3，喺市面已經推出一段時間，亦見過唔少朋友仔著住上山。不過，喺度都不厭其煩分享返兩對鞋嘅spec，方便討論:
先講 Topo 山鞋同其他牌子嘅分別。如果有睇我哋之前專訪 Topo 創辦人 Tony Post，應該知道 Topo 造鞋有三大原則:
- 鞋頭闊: 腳趾有充足活動空間
- 鞋身窄: 緊貼中足，增強保護性
- 鞋踭實淨: 不會左搖右擺，加強穩定性
的而且確，無論係 Terraventure 4 定係 MTN Racer 3，上腳嘅感覺都係鞋頭好闊，去到鞋身中間就變返正常，對於被縱壞了嘅我，係覺得有少少窄。不過，令我覺得最大分別嘅係鞋踭部份，真係非常硬淨，無論點樣上落，腳踭位都非常穩定，每一步都令人好有信心。
從上圖所見，鞋頭明顯較闊 (左 MTN Racer 3、右 Terraventure 4)
Topo 山鞋另一個賣點，就係 low heel drop，即係鞋跟同鞋尖高度唔會相差太遠，更似赤足環境 (赤足即係 0mm, zero-drop)。Low heel drop 嘅好處係，會令你用更自然嘅方法跑步，減少傷患 例如膝痛嘅機會 (相反，唔少跑鞋嘅 heel drop 都去到8mm甚至更高，呢個亦係點解佢哋上腳後好似有股「推動力」，因為你其實係企咗喺塊斜板上面)。對於本身已經習慣low drop 山鞋嘅我，唔需要特別在適應，但如果未著過嘅可能要少少時間。
MTN Racer 3 鞋底較厚
去到實測部份，兩對山鞋我都喺日常返工同上山著過，感覺都有少少分別。正如前面資料所講，Terraventure 4 鞋底比 MTN Racer 3 較薄，兩對雖然同樣硬淨，但如果當日要行得較多較長，Terraventure 4 會比較易攰 (被縱壞了?)。MTN Racer 3 中底用咗 ZipFoam，回彈力較佳相信亦係原因之一，整體感覺 MTN Racer 3 保護性亦較強，會係長途使用之選。
Zipfoam 中底
最後講埋鞋底，Vibram Megagrip 彷彿已被奉若神明，有佢就等於天下無敵，但其實山鞋都有分全底定係鞋底個別部份有 Megagrip，Topo 呢兩款山鞋都係全掌有齊，抓地效果自然良好。
後記
上提到自己雙腳有少少扁平足，所以我都有接受過足科矯型師治療，亦配有訂製鞋墊。就如果佢哋專業人士所講，世界上唔會有一對「最好嘅鞋」，只會有「最啱你嘅鞋」；不過揀鞋時，都有個基本測試可以做: 下次買鞋前，先試試前後屈曲或左右扭動鞋底，如果好輕易就扭到/屈到嘅話，都幾乎可以肯定嗰對鞋會「著壞腳」。
至於 Topo 嘅 Terraventure 4 同 MTN Racer 3，當然就順利過關了。
作者: 測試員K
