[越野跑鞋] Salomon Ultra Pro 試後感

最近少出越野跑鞋鞋評，無他，只不過係近數月來一直穿著 Salomon Ultra Pro 玩山。

起初未試時會有個疑問，既然已經有 S-Lab Ultra 這個旗艦型號，點解仲要出一個改版，我心中覺得是經濟版，可能是市場策略，S-Lab Ultra 價錢太貴，出對差唔多既，價錢平一截，引大家買就係咁簡單。

起初不抱太大期望，因為已穿著過 S-Lab Ultra 既筆者，心中想法是，就算係好著，唔會好得過旗艦型號卦? 點知一試之後，心中產生出一大堆問號，所以便繼續試，繼續試，一試就係三四個月。

結論是，真係好好著，好適合我依種自以為自己唔慢，其實唔係菁英跑手既普通跑手穿著，能提昇普通跑手的戰鬥力，很多時大家都有錯覺，著旗艦型號或者揀對貴啲，理應會快啲，法拉利快唔過本田咩？問題係揸唔揸得掂，S-Lab Ultra 設定其實是以菁英跑者的需求作藍本設計，但貼心的 Salomon 亦顧及到我這類高不成低不就的市場，特意打造出一對 Ultra Pro，希望我可以跑快少少，唔好著住對 S-Lab，但係跑得慢影衰佢地嘅品牌….

鞋身設定唔想講咁多，論文般既仔細評測大家都好容易揾到，同埋我又唔係收錢賣廣告，但都要講少少重點，例如 S-Lab Ultra 鞋底有保護片，而 Ultra Pro 無，但用了加硬的鞋底物料，所以當大家拎起兩對鞋既鞋底研究，會發現物料有少少唔同，同埋 Ultra Pro 既鞋釘長少少，總括咁講，講鞋底耐磨度， Ultra Pro 仲會好啲。

若果大家想揾對啱長途賽，能夠應付複雜路段既高穩定性賽鞋，Ultra Pro 會係你地選擇之一。

運動壹指禪 Facebook 專頁

Fitz連結: https://fitz.hk/?p=107047