關於慢跑鞋，大家認識既多數都係果幾個A、M、N等既大品牌，它的重要性，我相信係每個跑者心中都覺得係不可或缺的一件利器，因為它影響著你的形像，舒適性，足部健康，當然仲有跑者們認為最最最重要的速度（簡單講著左係咪可以pb先？） 而隨著呢幾年長跑流行，長跑好似已經成為左好多城市既運動潮流（當然香港絕對已經係，睇下而家唔少本地賽事被秒殺就知），再觀其所有n字、a字等運動專門店，最當眼最吸睛的都係乜乜BB所著既跑步用品廣告，就知道戰衣戰鞋對跑手係幾咁重要（正所謂唔打得都睇得，個勢起碼比人感覺你pro呢下先緊要嘛！）
小弟亦相信大多跑者擁有至少1~20對戰鞋（你冇睇錯，我有朋友真係著緊20對跑鞋？！&~$*%）不過我覺得有操開既跑手，有3幾對看門口係好正常，有部分稍為嚴謹既跑手都係會咁分：平時easy run一對，衝圈既一對，LSD(簡稱長課)一對，越野跑（即係跑山澗水）一對，當然比賽要另外一對係常識吧！嗱嗱嗱，你睇，最少都5對起跳啦係咪先！正所謂唔同型號有唔同功能嘛！
而小弟自問真係唔算有鋪買跑鞋癮，3年半左右跑齡，走過至少12,000公里既路，擁有過既款式真心寥寥可數，可能你會問：「咁究竟有幾多對先？」老老特特，答案係由開始有跑步習慣至今總共10對，但唔同款式既只有6對，其中有5對包括大家都好喜愛既日本A牌2對（其一已操到報廢了，另外一對為現役比賽鞋），M牌(現役的) ，「唔知平唔平衡」（同樣已報廢），同埋仲有一對有點冷門既花旗國大牌「殺光你」（全新未開封），最後就係我擁有最多對既強國天津制簡稱W牌（其中4對已報廢，一對服役中）
----- 廣告 Ad -----
等等先，強國既跑鞋一般唔係李X就係特X架啦，再唔係冷門d滴x窿吧，什麼W牌都未見過「運毒家」，「芝加扑」，「馬拉蟲」有發售過喎，你係咪老點先？大哥呀，話明強國野就梗係去「各個公司」度買才是王道吧！又或者一d 好鬼大個橱窗老式鞋店都搵到，只不過你唔好諗住買呢對野，可以享有專業樓上鋪式跑者夢幻貼身service，亦都唔駛旨意幻想會有著住「吧托」類似徐婕妤質素既「夫摸園」會為你提供測試腳型服務，因為你只係比果三草野（冇錯係三草咁大把）去買，佢唔用x面幫你搵鞋試已經執到啦。
其實，好多跑者們亦唔會對我呢對鞋陌生（特別係70後的中坑波友），我亦相信好多跑者年輕時曾經著住佢係球場上儲過唔少里數，只係人到中年約腳踢波仲難過抽東馬，又或者我地呢個年紀，仲有踢波既亦大多都只會著「三葉草」或者「一剔」錫身好多，所以好多人都遺忘了陪伴我們一起長大的國產鞋（好奇一問，其實而家真係仲有咩人會著呢，而家連小學生都唔會吼啦掛）。
至於小弟何解會與它再度結緣，及與它由互相觀察到了解再去相戀，到而家再著住佢跑山又操全馬距離又有咩感受，最重要係點解要著住佢黎跑等等，小弟有時間希望再同大家分享一下。
